يالنايم بليه مهد نوم الهنا والعافيه تلوليلك خيوط الشمس عالرمح عينك غافيه يالصوبك سهم القدر صايرلك بگلبي أثر رمحك چبير عله النحر وعالرمح عينك غافيه _____ نحرك زغير عله الرمح وراس الرمح صاير مهد عبدالله عينك من غفت گتلك دللو يالولد ناغيني يالصوتك عذب مو وكت هالنومه بعد من هيبتك وأنت طفل شفت الرمح صله وسجد عرشك رمح وأنت طفل وركانه نشاب النبل أمك سبيه عله الهزل وعالرمح عينك غافيه ___ جرحك ترف مثل الورد وتضمدك نسمة هوه چنت الضوه بعيني وغبت ومابيه أعيش بلا ضوه يانهر بضفافك عشت هرش العمر يبني التوه يالردتك لتالي العمر للشيب لوظهري انطوه لومال حملي تعدله ماادري يبني بكربله تنام عله نبلة حرمله وعالرمح عينك غافيه ____ ياوردتي شلون الورد يغفه عله سنان الرمح چنت أسهر بليل الحزن ومن وجنتك يطلع صبح ياحلم عاشرني عمر صعبه الحلم من ينذبح يوليدي گلب الوالده مايشفه لمن ينجرح جرحك فلا شيفه بعد خالي يضل يبني المهد نايم دللو يالولد وعالرمح عينك غافيه ______ يوليدي بدروب السبي امشي وتصدلي بنضرتك تحچيلي قصه عله السهم قصة عشگ وي رگبتك عبدالله باچر بالحشر تشكي المصيبه لجدتك ويَّ چفوف أبو فاضل عسن للباري تعرض قصتك برگبتك لوشافت سهم جدتك ياذيهه الألم گلبي تفطر ونثلم وعالرمح عينك نايمه ____ نايم ونسمات الهوه تلچم ييمه جروحك تمنيت اظمك بالگلب خاف النسيم يلوحك خافن تفز من نومتك روحي تلولي لروحك يالردتك لتالي العمر واگعد بفي صروحك ماذيك احس يبني الرمح حطلك على جرحك جرح وحطلي عله جفوني ملح وعالرمح عينك غافيه ___ خادم الحسين ابو اسحاق الفحام