- "مش هنفرح بيكي قريب؟".. ممكن نستبدلها بدعوة لطيفة زي "ربنا يكتبلك السعادة والرضا دايمًا" - لما تتصل أو تبعت لإنسان بقالك فترة مكلمتوش، ممكن بدل ما تقطمه، وتبينله أد إيه هو مش كويس ومبيسألش.. ممكن تقوله إنه وحشك وإنك عاوز تطمن عليه.. مش لازم تتبع سؤالك عليه بكلام مؤذي. - لما تبعت رسالة لإنسان وميردش عليك من أول مرة، أو يرد متأخر.. مش لازم تحسسه إنه ارتكب جريمة.. كلنا بندور في سواقي، وهتيجي عليك لحظة وتتحط في موقف تقصير زيه.. عادي. -إيه الفايدة أو الحكمة في إنك تسأل إنسان سؤال معين أنت عارف إنه بيضايقه ومبيحبش يتسأله! - لو شفت إنسان في لحظة ضعف بيغلط، استره.. تعامى عن اللي شُفته واحتفظ بيه لنفسك وبس.. هتيجي عليك لحظة والله تطلب الستر فيها من ربنا.. ودي أكتر حاجة لازم تتردلك في حياتك.. اللي بيفضح لازم يتفضح، ولو بعد حين. فوِّت، متقفش عـ الواحدة للي حواليك؛ عشان لو ركزت مع روحك هتلاقي برضو ليك غلطات ولو اللي بيحبوك قرروا يقفولك عـ الواحدة، كلكم هتخسروا بعض.. كله مضغوط وكله تعبان وكلنا بنعافر عشان نلاقي نص فرصة للحياة في واقع ظالم ومؤذي.. هوِّنوها على بعض عشان تهون.. مش لازم نصعبها على بعض أكتر ما هي صعبة.. كُن خفيفًا.
يعني ايه اقف اطبخلهم في البيت واسألهم ايه رأيكم في الاكل يقولولي حلو؟ هو ايه ده الل حلو بس؟ اقل من موضوع تعبير لا يقل عن عشرين سطر يوصف مدى حبكم وامتنانكم واعجابكم وانبهاركم بأكلي مش هقبل بيه ولو عملتولي تمثال في نص الصالة كده اكون شاكره ليكم جدا..
