🔴اول اكله للطفل دائما اكول ما اكو جداول بالاكل للاطفال و انلغت بس اكو قواعد اساسيه نبني عليها خيارتنا باختيار اول اكله للطفل اول قاعده هي شوكت نوكل الطفل ؟ ٤ اشهر لو ٦ اشهر اللي يكولك ٦ اشهر مو خطا لان منظمه الصحه العالميه تكول الاكل من ٦ اشهر و فقط حليب الام بأول ٦ شهر و اني من جماعه الاكل بال ٤ اشهر لان البحوث الجديده تكول انه التحسس يقل اذا اكلتي طفلك بال ٤ اشهر إلى ٦ اشهر و طبعا وفقا لشروط أولها انه الطفل ضاعف وزن الولاده و ثانيا انه بدأ يسيطر على راسه و يرفعه و وثالثها انه من ينام على بطنه يرفع صدره و أخيرها انه من تخلين الملعقه بحلكه ما يدفعها بلسانه . . لهنا اني كاتب عن هذا الموضوع طيب شنو الاكلات اللي تنطي بالبدايه حتى تختارين اول اكله تاكليها لطفلك اختاري اقل اكله تسوي تحسس و انتوا اكتبوا شنو هذه الاكلات؟ عن نفسي جدا افضل تبدين بالرز و بالأخص المنزلي لان غني بالحديد و سهل الهضم معتدل الطعم و بعدها ضيفي للرز الخضراوات اللي تعرفين انه ما تسوي تحسس و ما سامعه انه تسوي تحسس مثل منو؟ البطاطا القرع الجزر الشجر الفاصوليا الخضراء و غيرها و من الفواكه اختاري نفس الشي مثل الخوخ و بعدها سهله كل ٤ ايام ضيفي اكله جديده و اللحم؟ الدجاج اولا يدخل بتكوين الشوربات من البدايه و بعدها اللحم انصدم من امهات يكولون ما نوكل لحم الا بعد السنه !!! زين مو الحديد خلص بال ٤ اشهر إلى ٥ اشهر اقلها وكلي بعد ٦ اشهر اذا خايفه البيض؟ براحتك بعد ٦ اشهر و لا تنسين القاعده منو يسوي تحسس الصفار لو البياض؟ إذن الصفار اولا لان يسوي تحسس اقل بعد ٤ ايام عادي ضيفي البياض اذا الامور اوكي منتجات الحليب؟ بعد ٦ اشهر يعني بالمختصر بعمر ٤ إلى ٦ اشهر انطي الاكلات اللي هي اقل اكلات على مقياس التحسس و بعد ال ٦ اشهر شويه شويه زيدي ارجع و اكول اذا انت قررتي تبدين بالشوفان او الفواكه او اي شي تحبين فأنت مو غلط هذه خيارتك و هي محترمه بس اني خليتلك الخطوط العريضه للأكل و انت حره بس اهم شي لا تنسون الحليب مهم و ضروري اول ٦ اشهر بعد ٦ اشهر تتراجع اهميته و بعد السنه يصير ثانوي جدا و ما نريد نشوف مميه بفم اطفالنا بعد السنه و ٣ اشهر حتى نحافظ على تركيب أسنانهم الحلوه آخر شي الاكل الجاهز لو اكل البيت؟ اكل البيت اكل البيت اكل البيت اكل البيت اكرر لو ما يحتاج بعد؟ اكل البيت لان جاهز طازج نظيف ما خايفه عليه من الخزن و سوء الخزن و المواد الحافظه و اكيد اصرف و اقتصادي أكثر د. سيف سمير البياتي اخصائي طب الاطفال