السلام عليكم
اليوم راح ننزل جداول اوقات التسنين عند الاطفال
و اتمنى تشوفون الأوقات الموجوده
هوايه امهات يتسألون :ابني عمره ست اشهر مطالعتله اسنان ليهسة.. ابني عمره ٨ اشهر مطالعتله اسنان ليهسة ..ابني عمره ١١ شهر مطالعتله اسنان ليهسة
وهكذا
حبيت اوضح نقطة مهمه جدا انه بالطب اكو شي اسمه معدل
واكو اختلافات من طفل لآخر قد تسبق او تتأخر عن هذا المعدل
هو مو قانون و لا فرض انه ابنك او بنتك من يقبط ستة اشهر تكعدين الصبح تلكيه مسنن
وحتى تسلسل الاسنان بالظهور ممكن يختلف
يعني اللي يسنن بعمر السنه مو معناها هذا مو طبيعي او بي شي
شوكت تبدين تخافين او تتسائلين ابنچ ليش تأخر و شوكت تبدين تقلقين و شوكت تبدين تراجعين بي؟؟!
من يعبر السنه و هو ما مسنن
وهم يعتبر موضوع مو مخيف و بي مجال للسنه و نص
مثلا بأمريكا ينطون مجال لعمر السنه ونص يلة يدورون اسباب تأخر التسنين
أطباء الاسنان هنا ننطي للسنه
طيب
هسة ابنچ صار سنه و بعده ما مسنن شنو راح تسوين ؟!
اول شي تراجعين طبيب اطفال اللي راح يدزك تحاليل عن مستوى الكالسيوم و فيتامين دي و تحاليل أخرى ضرورية
طلع طبيعي و ما عنده شي عند طبيب الأطفال
تجين تراجعين طبيب الاسنان يفحص اللثه موضعياً خاف بيها تليف او تثخن و ياخذله اشعة للتأكد من وجود الاسنان و معرفة سبب تأخر بزوغها
في هاي الاثناء و قبلها كل ما عليج ان تسويه كأم هو الاهتمام بتغذية طفلچ تغذية صحية و تعريضه لأشعه الشمس لأكتساب فيتامين دي و لازم بشكل يومي
وكذلك اهتمي بنظافة الفم و تنظيف بقطعة شاش نظيفه و عمل مساج للثة بأصبعچ ويكون نظيف و تدعكين اللثه بلطف ذهاباًو اياباً
اتمنى تكون الفكرة واضحة
تحياتي للجميع اتمنالكم صحه دائمه
#_أسنان
