س/ ازاي أوصل للخشوع في الصلاة؟؟ ج/ 1️⃣- أول حاجة خلينا نتفق إن الخشوع حاجة بتزيد وتقل يعني هتلاقي نفسك في فترة كويس والخشوع تمام وفترة لا ، في صلاة كويس وحاسس بخشوع وفي فرض تاني لا فده حاجة متغيرة بس اقل درجة تكون عندك من الخشوع.... هي خشوع الجسد يعني تركع كويس وتسجد كويس وماتتحركش كتير 2️⃣- تاني حاجة انت بتاخد محاولات للخشوع والمحاولات دي مش هتلاقي تأثيرها تاني يوم ولكن انت هتفضل تحاول لحد ماتوصل لمرحلة الخشوع 3️⃣- لو عاوز تخشع ادخل على كل صلاة كإنها آخر صلاة هتصليها في حياتك كإنك هتصليها وتموت على طول وهي دي الحقيقة انت اكيد هتموت بعد صلاة وانت مش عارف أي صلاة فاتعامل مع كل صلاة انها الفرصة الاخيرة 4️⃣- تقف في صلاتك من غير حركة زي مااتفقنا وفي مكان هادي بعيد عن الماتش اللي شغال والمسلسل اللي في الخلفية ..كل ده هيشتتك وماتبصش حواليك خالص...النظر يكون لموضع السجود 4️⃣- لما تجيلك الوساوس وقت الصلاة استعذ بالله من الشيطان وتتفل على ايدك الشمال تلات مرات من غير ريق خالص 5️⃣- قوم للصلاة مع الاذان على طول وافصل عن كل حاجة شغلاك ..بلاش تصلي وانتي سايبة حاجة على النار وتفضلي مشغولة طول الصلاة بيها وبلاش تصلي وانت عمال بتفكر في الماتش وياترى مين كسب ...كده عمرك ماتخشع افصل خاااااالص 6️⃣- قبل الصلاة اقف مع نفسك ١٠ ثواني وفكر في انك هتقف حالا قدام ربنا فأحسن وقوفك أمام الملك وابدأ صلاة وفكر في كل آية وكل ذكر بتقوله فيها وحس بمعانيه الجميلة بلاش تقول كل حاجه بسرعة لان كده عمرك ماهتحس بجمال الذكر اللي بتقوله 7️⃣- بلاش تصلي كل مرة بنفس السور ده اكتر سبب للسرحان وعدم الخشوع ...نوع في السور اللي بتقرأها احفظ جديد وصلي بيه ورتل بهدوووووء هتحس بجمال الايات دي 8️⃣- ادعي في سجودك وفي كل وقت اجابة للدعاء ان ربنا يرزقك الخشوع 9️⃣- بعد ماتخلص صلاة ماتطلعش تجري ...بالراحة الدنيا مش هتطير قول أذكار بعد الصلاة وماتنساش اللهم أعني على ذكرك وشكرك وحسن عبادتك 🔟- آخر وأهم حاجه ...الصبر ...خلي نفسك طويييل واوعى تزهق ..طول ماانت على الطريق لازم هتوصل بس المهم تفضل على الطريق .. كوكب_بنات