ميمر استقبال شهر محرم الحرام
كل الهله ... بهالقافله
التمشي وگمرها العباس ... من المدينه لكربله
~~~~
قافلة سبط المصطفى مسراها
گطعت دروب لكربله منواها
وكـافلها فـيّـه ورايته فوگها
وأخت الگمر ... لفيّها النظر
وهودجها لو مال ام عون ... چف الكفاله ايعدّله
~~~~
بصوت الهله لراعي الهله وضعونه
نستقبله بدمع العشگ لعيونه
ماعدنه غيره ولا نعيش ابدونه
ابدونه العمر ... مُرّ اعله مُرّ
من غير ابا عبد الله ... كلشي خساره حاصله
~~~~
كل الهله بگد المحنه البيهم
بوجه الحسين وعيلته وساقيهم
وأرض العراق اتقبل برجليهم
اعيال ام حسن ... جتّ بضعن
وگـاع العراق اعله الكون ... اتميز بهاي العايله
~~~~
أرض السواد اتشرفت واتعلّت
بخير الحسين اتفردت وانجلّت
امن الباري هالنعمه العظيمه نزلت
هذا البلد ... ايضل للأبد
يبقه وقف حب حسين ... للمحشر بهالمنزله
~~~~
گلب الموالي عالن استعداده
بجية حبيب الله وعشگ عُبّاده
الراد السبط معناها الله الراده
والما رضه ... بحبه وحظه
لو يعبد ادهور ادهور ... ماتنقبل أي نافله
~~~~
بثوب السواد امحرمه اتلگيناه
طول السنه شهر الحزن تانيناه
وگلب الزچيه بكل عَزَه واسيناه
بدمعه ولطم ... وصوت الهظم
أيّ واحسيناه ايصيح ... وآه اعله نبلة حرمله
~~~~
ارواحنه اعله العاشـر اتـون وتنوح
كـل البواچي والنعي اعله المذبوح
ابلا غسل لا فيّ لا نعش ضل مطروح
شيبه اختضب ... ثوبه انسلب
الله عله الضل اوحيد ... وبچه المحاجر مقتله
~~~~
اخيام الهله طاحت لمن ودعّها
واعياله ضاعت واخته التّجمعها
حارت عقيلة هاشم بمدمعها
كلشي رحل ... وأخته اعله تل
ادركنا يحسين تصيح ... خويه الضعينه امعلعله
~~~~
سجاد الگريزي
سيدي ياحسين عمري نذرته الخدمتك
رابط قناة تلكرام
👇👇https://t.center/joinchat/AAAAAEOnUV6imLK-dTwaMQرابط قناة اليوتيوب
👇👇https://www.youtube.com/watch?v=ugFiDQkvfjQ&feature=shareرابط حسابي بالتيك توك
👇https://vm.tiktok.com/ZM2XyaqLA/للتواصل
@Hussein95iq
