TO‘RTLIKLAR Izg‘irin cho‘chitgan gulga soqchiman… Chirog‘i uzilgan yo‘lga soqchiman... Menga dashnomlaring bas ayla, nodo‘st, Senga o‘xshamasdan yashamoqchiman... * * * (“Siz... Sen... U...” turkumidan) Kimlar uchun oylar sachradi, Kimlarga xush “voy”lar sachradi... ...Ot choptirib o‘tarkan KIBR, Menga esa loylar sachradi... * * * Osmonimda moh yolg‘iz… Yuragimda «oh» yolg‘iz... Yolg‘iz bilmangiz meni, Ko‘ksimda Olloh yolg‘iz... * * * Sayoz qalb tubida dur bo‘lmas emish… Betavfiq yuzida nur bo‘lmas emish... Balki zari bo‘lar, zo‘ri bo‘lar-u, Nodon – xato quli, hur bo‘lmas emish... * * * («Siz... Sen... U...» turkumidan) Yo‘lda bir kimsa-ku, ming firib borar… Cho‘zilgan har shoxni sindirib borar... Alhazar, biylatmay farishtalarni, Yelkaga shaytonni mindirib borar... * * * Charchatmangiz – orzu bu hayot… Cho‘chitmangiz – ohu bu hayot... Pok yo‘llarin aylang ixtiyor... Yo‘qsa, bo‘lgay og‘u bu hayot... * * * Vatanlarning nurlanishi – she'r... Millatlarning hurlanishi – she'r... O‘qib-o‘qib, angladim yana: Yuraklarning tirnalishi – she'r... * * * O, bu bosh soxtamas, aslga intiq... O, bu yosh sershiddat naslga intiq... Qishning bulutlari ortida qolib, Quyosh inqilobiy faslga intiq... 1998 yil. @Gulchehra Nurullaeva Instagram YouTube Facebook