Khadra Daahir Cige, inta ay ahayd shaqsiyad masraxeed oo aad ugu fiican hibadeeda, waxaa ka badan inta ay ahayd diktoor daahsoon. Si fudud oo aan la qiyaasi karin ayey qalbiyada dhaawacan u dhayi jirtey, waa sababta dhalisay in dadyow farabadan isku raacaan in codka Khadri badiyo unugyada dhiigga cad — ogobeey, sida qofku u leeyahay unugyo dhiigeed oo cadcad kana ilaaliya cuduradda jireed ee malga, si la mid ah ayuu u leeyahay unugyo ruuxeed oo cadcad, kana ilaaliya dareennadda dila — waa kuwaa unugyada ay koriyaan heesaha Khadri. Khadri, waxa ay nolosheeda u hibaysay hibadeeda. Muxuu sameyn lahaa qof sida Khadra leh hibo codeed oo laab saafi ah iyo maan xalan ka imaneysa, oo aan ahayn in uu hibada lafteeda naftiisa u sadqeeyo? Khadri qofkaas ayey ahayd. Qof aan sinnaba loo illaaweyn codkeedii deggenaa ee ruuxda oontiri jirey. Waxay ahayd qof laysu baanto, sida dhakhtarna dadka ula tacaala, oo u daweeya. -Abdullahi dhaqane🫡