عباس هابيل الزينبي

بـ أرض طوس غابت الگمره
سلامات يا ضنى الزهره
...................

مرتين مات الموته بالغربه
كل نسمه تدخل ريته حربه
بكل نبضه يصرخ ياهلي گلبه
الما يمه اخوته موتته صعبه

بالوداع ينكسر ضهره
...............

بس الله يعرف حالته شلونه
الحد موته تنزل دمعة عيونه
بس الغرب راحو يدفنونه
چاوين اخوته ما يشيعونه

اويلاه محد ايحضره
..............

يا ارض طوس اتوشحي بحزنج
راح اللذي يشيل الخطر عنج
راح الحشا ما خيبه الضنچ
لـ الله بسمائه وصلي ونچ

الرضا مات وحسرته بصدره

...............

ابعث عزائي الموسى ابن جعفر
حزنانه كلها البالبحر والبر
چن دله گلبي وفرگته المجمر
حزنانه كلها البالبحر والبر

خسرناه بحسره وبعبره
.................

والسيده معصومه اعزيها
هليله ليل افراگ واليها
بفگد الرضا هاليوم اوسيها
ضلت بعد من ينشد اعليها

بلا اخوان كسرتچ كسره

#عباس_هابيل_الزينبي
#الليالي_الرضويه

شامخ ماكدر يخفيك ذباح
حته بذبحتك متعلي برماح

.............

كبير هواي بس متواضع هواي
يتشرف تدوسه بجدمك الماي
الشمس يم نور وجهك بانت فياي

مثلك ماشرق بالدنيا مصباح


............

ياروح القدس ياسيد الاحساس
شذرة محبسك اثمن من الناس
من گالولي محتار اعله عباس

اتخيلتك جبل وايده اعله الاصفاح

............

ذبحوك ونسو دم الكرامه
تشربه الگاع وتخضر نشامه
يضل ينضح مواقف للقيامه

دم المنضلم خوف السفاح

...........

كل هاي السمه وهاي الوطيه
ارخص من دمع بنتك رقيه
حسين بكلشي انته الأولويه

ومو مني الحچي هذا الاصحاح

............

ضنهم ما نعرفك من يخضبوك
بالسبعين الف رادو يرهبوك
بطبول الحرب ضنهم يسكتوك

وانته بكل هدوء نشزت الاصياح

#عباس_هابيل_الزينبي
#محرم_1446

عمّه سِيف اِنطيني
وَحده ظَل احسيني
-
نزل العزاء | ليلة ٢٥ محرم ١٤٤٦ هـ
الحاج #باسم_الكربلائي
للشاعر #عباس_هابيل_الزينبي


#محرم_1446 | #الليالي_السجادية

أيام الاميرة راحت ايامي
سبية وروس اخوتي تمشي گدامي
............

مامتعوده امشي بضلمة الليل
يحزام الضهر ماضل بعد حيل
عجاج تراب خويه وفزعت الخيل

وانه محيره وتتعثر اجدامي
..............
اخوي اويه الهوه بالريه ياناس
مثل النعمه دوم الاخو ينباس
فوك التاج تاج يصير عالراس

هيبه يشيل راسي ابمشيه كدامي
..............

الاخت من دون اخوها شلون ترتاح
تضل امحيره ومكسورة اجناح
عگب الراح تصفك راح عالراح

گلب الماله اخو متجرح ودامي
.............

بعد جفوف اخوتي صارت حبال
هاي الماتمر لاتخطر ابال
خويه تمرمرت بايتام واعيال

هاي الماتمرني حته باحلامي
..............
حيرانه ومنو اليرحمله حيران
اختكم حايره ومن دون وليان
وكت العازه خويه يريد خوان

لا حادي البقالي ولا بقه الحامي
..............

زينب عالهزل ماضني ترضون
انتم عالرماح وتبجي العيون
يخوتي ام عون ماضلل الها كل عون

نار البيه تشبه نارها اخيامي
..............
اهل الشام تكره سفرة الشام
شحال العبرته بحبال وايتام
عيوني امن الطبك ماتقبل اتنام

طاحت روحي لمن طاحن اعلامي
..............

جنت مدلله من چنتو وياي
وكت خلاني اصفك فوك يمناي
تعبنه عساهه ابذمته الماي

ياضامي الاسكته والضعن ضامي
..........


#عباس_هابيل_الزينبي

قد حان وقت الاربعين.
وجهت قلبي للحُسين
...........
ابْرزنامة الحبُ الحُسينيه
حانتْ زياره الاربعينيه
هاي الشعيره الكربلائيه
انخلقت لجلها احشود شيعيه

ما ننسى دربك يالحنين
.............
هذا الوقت كل عام انتضره
من البحر اتوجه النحره
الخطوه الاولى تبدي بالبصره
وماتنتهي اله بطوفة الحضره

خادم اضل طول السنين
..............
يبقى العراق بكل زمن غايه
من كل بلد تگصدله مشايه
هذا الوطن منبع الوفايه
يحب الحُسين ورافع الرايه

بيه الوطن سالم إمين
..............
قصة عشگ كل عام تتكرر
بين اليزور وبين ابو الاكبر
الملتقى يم مذبح المنحر
عالفرگه يا مولاي ما اگدر

عاشگ لحد قطع الوتين
..............

شلي ابجدم مشايه ماتطلع
انْشلت عساهه وكون تتگطع
ايصيح الحُسين شلون ما افزع
لو ما اكض شباچه ما ارجع

يحسبني من الزائرين
.............

هذا المشي طول الزمن دائم
منا لحد ما يضهر القائم
بهذا الدرب من الزغر هايم
بكل خطوه اواسي زينب وفاطم

متمسك ابحبله المتين


#عباس_هابيل_الزينبي
#المشايه

فعلى مثلِ الحسينِ فاليضجِ الضاجون

..............

خيولهم جابوهن اثگليت وزن
من تدوس الكاع ترجنها رجن
هسه يمكن طحنن اضلوعه طحن
وعافن الحوراء مشدوهة ذهن

دمه الطاهرُ يجري وله تجري العيون
فعلى مثلِ الحسينِ فاليضجِ الضاجون

..............

شحال زينب من تشوفه الوحده
وفرة السبحه علي فرت العده
لا ولد يلحگ اله اولا والده
كلها صرعه ياهو ضل وتنشاده

ولرزءِ الطفِ هذا فاليبكِ الباكون
فعلى مثلِ الحسينِ فاليضجِ الضاجون

...........

منين مايندار يتلكا رمح
مخضبه بدم شيبته وجه الصبح
جسمه من كل صوب بي لچمه وجرح
جامد الدم عالجفن ما ينمسح

وعليه الخيلُ تجري ضامئاً يُسقى المنون
فعلى مثلِ الحسينِ فاليضجِ الضاجون

............

للمخيم واصله اصوات الانين
بالحجر صابوه وادموله الجبين
فوك صدره اتربع الشمر اللعين
يضحك ومن الگفه حز الوتين

فعلى مثلِ الحسينِ فاليعجِ العاجون
فعلى مثلِ الحسينِ فاليضجِ الضاجون


بتسع اصابع ضال وبلايه نحر
ياهو ميت ضامي يم جرف النهر
مثل يوم حسين ما عاد الدهر
مو لطم لاكون يكتلنه القهر

وربيباتُ الخبا بالأسرِ يُضربْنَّ المُتون
فعلى مثلِ الحسينِ فاليضجِ الضاجون

ضل غريب ولا اله واحد فزع
من ضهر مهره على ضهره وكع
والمثلث من خرز ضهره طلع
هل مناصر صاح بس محد سمع

فعلى مثل الحسين فاليذب الذابون

عباس هابيل الزينبي
#عباس_هابيل_الزينبي
#ليلة_١٠_محرم

يمه مو وكته العرس خليني
بالشهاده يكتمل نص ديني
…………….
يمه جاي يصيح هل من ناصر
وسفه المحير الزمن ضل حاير
اليوم موتي شلون ااخره الباجر
صدري مشتاك اعله دوس الحافر

احزام ابوي الحسن يمه انطيني
.................
مثل الاكبر راح اروح وما ارد
هذا طبع الطف ولا يهوه الورد
شارب بشارب ييمه اليوم اشد
وانتي من الخيمه صيحلي اعد

عمي ابو فاضل انه مربيني
……………..

اليوم اطبهم زلزله ما طب صحو
يمه حته اسمعها من عمي الكفو
يمه كون العمي ايينادي العدو
حسين هنيالك عله هيج ابن اخو

كربلاء تتزل ابچفيني
................

الموت هم ذواق يختار الشباب
وين المرتب يغطي بالتراب
ايچفن الما زغرن اعليه الثياب
مو كحل تتكحل عيونه بخضاب

فدوه لحسين انه كل اسنيني
……………..

يمه للطف انه من مهدي نذر
الحسن لحسين ذاخرني ذخر
گلي علمهن ضلوعك عالكسر
للحوافر يبني بالطف الصدر

انه من مهدي نذر لحسيني
………..

للخيم ما اريد ارجع منجرح
يمه بالطف فاز كلمن ينذبح
مو خساره الموت وي عمي ربح
راسي باچر ويه راسه اعله الرمح

رمح الاكبر يمه بينه وبيني
.........
#عباس_هابيل_الزينبي
#الليله_الثامنه

ياوهب سولفلي عن احساسك
والحسين بكبره دنك باسك
.......
انه ماكاطع حبل من السبي
وانته كاطع منحرك لابن النبي
بعد مو نصراني اسمك يالأبي
واجب انسميك وهب الزينبي

طيب الله يا وهب انفاسك
.............

اني اذا شباج كضيته افتخر
شحال لو مثلك صدر يشبك صدر
ىوالله اموت يجوز كد ما افتخر
على شوف حسين ينفع ياصبر

يااصيل الاصل ذره بساسك

احچيلي من حسين حين استأذنت
من صفنت بعينه سولفلي اشفت
والله زلمه شلون هالكد سيطرت
انه لو بس لامحه احلف چا متت

ومهر اليدوسه رجعلك داسك
..............

بالكنائس اسمك ايكتبو حرز
مثل عيسى للنصاره انته رمز
الرايد ايچز ذكرك ابنحرك يحز
گله بالدم انكتب تحلم تچز

المأذن تفتخر واجراسك
.............

ياوهب سولفلي عن هذا الشعور
عالمخيم انته والكافل تدور
حاشه لله ذره ماعندك قصور
خيمه عندك تسوه الاف القصورر

لهسبب عالخيمه حذفو راسك

#عباس_هابيل_الزينبي
#الليله_السادسه

سبحانه شهل وسامه
گمر ولابس عمامه
هـيــبــه
وبكل شده يدك صدره
هـيــبــه
محروس بعين الزهره
.............

احلا من شمس الضهيره
يشبه الماي وغديره
طرف عينه لو يديره
الكل تصلي عالنبي
يبتسم تمطر ترافه
ولو زعل ترعد وسافه
ماكو من عنده بعفافه
شكد حلو هذا الصبي

نبدي بسم الله نسولف عنه بس لا ينحسد
شلون اشبها بورده وادري يروحله فدوه الورد

فدوه العينه وحلمها
سبحان الي رسمها

هـيــبــه
واحلا من العين الخضره
هـيــبــه
محروس بعين الزهره
..............

تارس الدنيا بحنانه
گمره ما تترس مكانه
من يوگف بصف لوانه
عيناً مثل عمه الگمر
عيونه من كد ما وسيعه
احله من ماي الشريعه
تبخره عمته الوديعه
تشمر وراه جرف النهر

يشبه العباس عمه نسخه من عنده تره
الجيش من شافه تعجب هذا سبع الگنطره

القاسم هذا نازل
هم يشبه عمه كافل
هـيــبــه
ايتعب حته اليختصره
هـيــبــه
محروس بعين الزهره
...................
بجفه ماخذها الوصيه
بزوده رايح للمنيه
سفره عنده الغاضريه
ما رجف گلبه ابد
مختصر كل المراجل
بيه الاكبر و ابوفاضل
لا يخاف ولا يجامل
دمدم النشمي ورعد

جر حسامه وصاح وينه الفكر ايمر بالخيام
هذي اخر فكره جانت وانتهى كل الكلام

اليوصل للمخيم
راسه بالسيف ايتثلم

هـيــبــه
اليوصل كال اكطع نحره
هـيــبــه
محروس بعين الزهره
...............

باليمين اشمحله سيفه
نازل اوبعيونه حيفه
مثل ابو مارده ضيفه
للنبل صيح هله
ابكيفه سوه الي يريده
بنضرته صاد البعيده
حنته من دم وريده
احله شاب ابكربله

جاسم شما يخطي خطوه يرجع الجيش الوره
انه لو ما عرفه جاسم چا صحتله حيدره

اتعنه الهم سيفه بيده
نسخه من جده الصميده

هـيــبــه
ويذبح بالسيف و خزره
هـيــبــه
محروس بعين الزهره
...............

سمه بسم الله ورسوله
ااتحرز ابأسم البتوله
عجب الجيش الاجوله
بهالعمر ما مرتبك
من دخل للغاضريه
ما رجف من المنيه
ازغير وكله حميه
اويه العساكر يشتبك


اتحزم وسل بيده سيفه ورسم لوحة ملحمه
اختلطت الحنه بچفوفه والعرس اصبح دمه

هـيــبــه
ما ثنه الحيد ابسطره
هـيــبــه
محروس بعين الزهره

#عباس_هابيل_الزينبي
#محرم_١٤٤٦_1446_2024
#ليلة_٨_محرم

حيدر امير الانس والجان
والما يبايع علي خسران
انه غديري
وحيدر اميري
...........
بالروح انتخبته
نسمات وشهگته
السبابه بدمه الروح
الاصبع ما حبّرته

بعالم الذر والاخره
الوحده مرشح حيدره
الجن والانس فرحانه اجت
لزمت على بابه سره

واحد تسلسل ما اله ثنين
بهالقائمة بس انته ابو حسين

نسمة عبيري
انه غديري
..................

ما حاجه الدعايه
من الله الهدايه
غيره لو يموتون
تضل عنده الولايه

ما حاجه لـ اعلان وتعب
لا حاجه لاموال وذهب
عالفقره ربك نصبه
من هالشعب والهل شعب

شال ايده عيناً شيلت الباب
غيرك ولي ميصير ابو تراب
بيدك مصيري
حيدر اميري
............

گلهم سوو منبر
اريد الملاء تحضر
خاطر ما يكولون
ماشفنه احنه حيدر

شال ايده وصلت للسمه
نصب علي حامي الحمه
الماشفته عيونه عسن
صاباها ياناس العمه

وبصوته صاح وسمع اعداه
حيدر ولي من كنت مولاه

بالحب سفيري
حيدر اميري
................

بسد الشجره لبدو
خطه وحفره حفرو
كالو علي ميصير
وسر البيعه دفنو

نكرو البيعه والعهد
لواحنه لو ما كو بعد
لو دمنه لو حيدر علي
بصف شجره وعدو هالوعد

ماطاعو الباري ابجلاله
بجيناتهم هايه النذاله

براحة ضميري
حيدر اميري
...............

علي مصعد ضغطهم
علي مخردل صعبهم
بس اذكر علي وشوف
يطلع كل حقدهم

البـ نخوه ما الهم عرف
يكرهونه چي زلمه كلف
اكبر وصف الهم جبُن
وحيدر علي ما ينوصف

خوف العمه منك يخافون
من تنذكر كلهم ويرجفون

انه غديري
حيدر اميري

عباس هابيل الزينبي


#عباس_هابيل_الزينبي
#عيد_الغدير

مولايه حسين اني امشي وراك
من دونك اتيه خليني معاك
منو الالي انه دونك اموت اعيش ممنونك
خليني. معاك. خليني معاك
………….

مثل البالحرب. ويتيه الدرب
بهل موقف صعب. أنه
عني لو غبت. اوزعلك طولت
احسبني متت. انه

اقسملك بل قل هوه
انه من دونك ما اسوه
اعطش بمراضاك اروه
بس اقبلني
ما اعيدنها وما ازعلك
خادم الك انه ولهلك
ابابك وامنيتي اندلك
بس اقبلني

مولايه حسين تقبلني عبد
تسمعني واعيد اقبلني يلتسوه لـ اعد
اريد اضل انه جونك. اموت اعيش ممنونك
………………..

شهرك من يهل. دم عيني تهل
ابجي وما امل. الك
انه من الزغر نذروني نذر
والحد الگبر. الك

ارجفلك مثل الرايه
ما احبك حب بي غايه
ترخصلك حته ادمايه
ايجنن حبك
فاتح گلبي وبيباني
ادخيل اسمك لاتنساني
يحسين اسمك عنواني
ايجنن حبك

ماعندي بديل بس انته هواي
من شفتك اجيت وعفت اهلي وراي
احب اضل مجنونك. اموت اعيش ممنونك
………………..

بداية قصتي. المجالس دنيتي.
عليها عيشتي. اجر
انه من المهد. والك منطي عهد
ادور للأبد. ااجر

ابچي بمهدي يهزوني
ليش انحب ماعرفوني
اعليك ابچي مايدروني
ابجي المولاي
واعي واعرف تكليفي
شوصف يصعب توصيفي
بكيفك عايش موكيفي
ابجي المولاي

ياعشگي عليك دم ابچي چنت
من مهدي حسين بيك اني همت
فده هلي لعيونك . اموت اعيش ممنونك
………………..

جننني العشك. لا ما افترگ
اقسم بالسحگ. اضل
بكل مجلس اجي. عطفك ارتجي

مولاي ارجوك اقبلني
لاترفضني استقبلني
مذنب وانته التصلحني
لا ترفضني
من كونك ما هاويني
غيرك ياهو ايلفيني
ابداعة زينب يحسيني
لا ترفضني

من دونك اتيه انطيني اديك
راكع وذليل لو تقبل اجيك
بخيت اصير بضنونك .اموت اعيش ممنونك
………………..

امحزم لك اضل. ويأمرني الطفل
خادم ما امل وعد
مو بس انكسر والطم عالصدر
اسحك عالجمر. وعد

خادم للخدام افخر
مو اله اصعد عالمنبر
بس كون اسمي بكل دفتر
خادم خادم
كل يوم بروحي العاشر
ومثل ام عون ابچي وحاير
ما اهم الكسر الخاطر خادم
خادم خادم

الخدمه محيط ميحدها جرف
وانه يمها احير ماعندي وصف
وعد وعد ما اخونك. اموت اعيش ممنونك
………………..

باجر بالكبر انتضرك تمر
راح ابقه انتضر. تجي
اتهون وحشتي. تخفف عصرتي

مر وما احمله البين
انتضرك تمر يحسين
وبجفوفك تغمض العين
فدوه امروتك

كلشي بگبري ميطمن
منتضرك عليه تحن
من دونك ولا اأمن
فدوه امروتك

امنيتي تجي تهل فوكي تراب
امن تجيسه بديك ميمسني عذاب
الخدم تجي يردونك

#عباس_هابيل_الزينبي
#محرم_١٤٤٦_1446_2024

جسام لاتغفه عالرمله
جسام اغفه بحضن رمله

..........

من يمته صار ادفه الرمل مني
يالعلمتني نومك ابحضني
جفنك غمض يا يمه بس جفني
كلما غفيت ابدمعه يندهني

جسام حضني ودلالي احله

...............

بدموعي يمه اعجنلك الحنه
انعوض الهلاهل باچر بونه
امْهنه يبني ابموتك امهنه
متاكده عرسك احله بالجنه

جسام منك فلا اكو اغله

................

من نومتك فز يابعد عمري
ضهري انحنه يالبيك اشد ضهري
للشيب ردتك يالولد ذخري
بچفك ييمه انزل الگبري

جسام هالفرگه مو سهله


...............

مو وسفه موتك يالولد نعمه
ابخيت اليموت بحضن ابو اليمه
حسين ابچفوفه ايحس اله بدمه
قبلك منو الكاسر ضهر عمه

جسام بيك الحُسين اوله

................

عيونك احبهن لا تغمضهن
لو ضيعتهن بيش اعوضهن
چنت اعله روحي عيونك افرضهن
ويصيرن احله لمن اتغضهن

جسام يا اجمل القتله

................

منتضر اشوفك معرس اوليدي
ماحسبتلك تنذبح بيدي
شسواك حزني يالچنت عيدي
سالم وريدك فدوه اله اوريدي

جسام ابصدري عسه النبله
................

#عباس_هابيل_الزينبي
#محرم_١٤٤٦_1446_2024
#ليلة_٨_محرم

غافي غافي لو نايم اوليدي يذباح
غافي غافي لتناغي عبدالله بالرماح
راح العزيز وماخذ الروح
عطشان راح وردلي مذبوح
.......

لهسه اعله مهدك حاطه هدوم
واتخايلك من يمهن تگوم
ردتك ذخر للعازه مضموم
عبدالله رد موتني الفراگ

ليش الدمه مخرب معانيك
البيها چنت يوليدي اناغيك
معقوله ماتسمعني احاچيك
كلساعه اگلك گلبي مشتاك

الام اذا راح الولد دنياهه تصبح ضلمه
ضلت بنفسي من اندهك وتگلي جايچ يمه
عبدالله مو هينه تره نحرك يسيل بدمه

ريتك ريتك اتفز او اشوفك واگف احذاي
ريتك ريتك ترجع واشربك بيدي الماي

مو بالجلد بگليبي الجروح
عطشان راح وردلي مذبوح
.............

يالما بده موسم دلالك
اكعد واموت انه ابدالك
دزلي بحلم لو بس خيالك
مل الجفن كد ما نطرناك

من كون الك بالطيف جيه
بشرني احط حنه بديه
وما افز لحد جيت المنيه
لو صوتك يفززني والگاك

ما نايمه عيوني تره ومنتضره تسئل وينك
مو كلك الدنيه تره ما تسوه رفة عينك
متانينك انه وحسرتي يم مهدك امتانينك

وينك وينك عبدالله رد بداعة حسين
وينك وينك ماضل دمع نشفت تره العين

جفوني بغيابك تجري اسفوح
عطشان راح وردلي مذبوح
...........
راسي وجعني من السياط
وشديته يمه بحبل الگماط
من كل كتر يوليدي العياط
وراسك يعاينلي من الرماح

ردتك يبعد امك يمهيوب
اتعبرني من عثرات الدروب
فگدك تره مرمرها الگلوب
البيها چنت يايمه سباح

گلت بكبرتي انته سند وتحير باچر بيه
تاليها نحرك ينگطع عبدالله چا ها هيه
اگعد يبعد امك تره امك صفت مسبيه

رايح رايح وانه بقيت ابجيلك ادموم
رايح رايح ومن مهدك انه امناطره تكوم
ابچيلك دهر لو ترجع بنوح
.عطشان راح وردلي مذبوح
................

يسئلوني اگول ابمهده غافي
نايم يمن نوم العوافي
ها يا زمن شتريد كافي
كبرته بالهم والتواسيل

يالما شبعت امن الدللول
ياهو البعمرك يمه مكتول
ماجاي افهمك يمه شتگول
ما ينفهم حچي المچاتيل

عبدالله اهزن بالمهد ماحسبت بي خالي
اكعد يبعد امك تره مو هينه فكد الغالي
من بعد ضحكك يالولد الدمع يبرالي

اوليدي اوليدي لجنازتي رايدتك اچتاف
اوليدي تاليها هيچ الوحدي انعاف

چنك گمر عالغبره مطروح
عطشان راح وردلي مذبوح
...............

ضهري انكسر يالبة احشاي
ياماي گصتي وذابحك ماي
كل ساع اعاين بلكت وياي
شيريدني يوليدي الزمانك

كل ساع ادورك بلكت الگاك
بنفسي تردلي واگعد وياك
من شفت هدمك طرزه دماك
روحي انغمه اعليها بمكانك

بعد امك الدنيه گضت من غمضتها عيونك
من النسمه اخاف اعليك انه بالگبر گلي شلونك
ياطير بعدك ماطرت شمسوي ويذبحونك

كافي كافي شلي بعمر مو انته وياي
كافي كافي اخذو اعزازي الدنيه والماي

موتي بكتلتك صار مسموح
عطشان راح وردلي مذبوح

#عباس_هابيل_الزينبي
#محرم_١٤٤٦_1446_2024
#ليلة_٩_محرم

لاتلوموني عل حب الحسين
لاتلوموني على حب الحسين
..................

حسين المحيرني والصايرلي راي
حسين فكده علتي وشوفه دواي
شوف عيني حسين بالدنيا وضواي
انه اشم احسين ما شمن هواي

لاتلوموني عل حب الحسين
.............
حسين عابر حته مرحلت العشك
حسين نبضات الگلب بسمه تدك
يعني اموتن لو تصير ونفترك
شلون اعيشن والهوه الي ينشهگ

لاتلوموني عل حب الحسين
.............
ولدي ضحيت او احس امقصره
ردت وياهم اضلن عالثره
ويه زينب ردت اروح اميسره
اولا اضلن عله العتبه امناطره

لاتلوموني عل حب الحسين
.............

ابني وصيته گبل يوم الطفوف
كون من دمك ترويها السيوف
يبني يستاهل تضحيله بچفوف
فدوه عينك والمهم هوه يشوف

لاتلوموني عل حب الحسين
.............
بغير حب حسين ما دك الگلب
وطن يصبح لليذلونه الغرب
حسين راحة بال للوكته صعب
حسين للجنه يصير اسهل درب

لاتلوموني عل حب الحسين
.............
الما يحب حسين مايسوه نوه
وهوه والماكو احسبنه سوه
والله بيه استحسف ايشم الهوه
عبد للضلمه اليكرهك يا ضوه

لاتلوموني عل حب الحسين
.............
#عباس_هابيل_الزينبي
#محرم_١٤٤٦_1446_2024
#الليله_الرابعه

نزل الموت الاحمر
نزل بهيئة الاكبر
قد اعذر من انذر

.............
١
هجم هشم/ روس العسكر والقاده
كفو منو / اليگدر لـ اوليد الساده

يشبه عمه وزمرة دمه
سيف ودرگه ودرع نشمي وما ينجرع
منهم ياخذ حيفه
بوكت الشده احزامه يشده
وچفه يودي الصقر عفيه اربات الگمر
بالطف كلشي بكيفه

بي شمره من اجداده
هيبه اوليد الساده
ايحير ما يتحير
.................
٢
الهوه الضوه / بالطف كلهن بجفوفه
زعل ارتجل / قائدهم رد بي خوفه

هيبه معدل بس من يزعل
بيهم يردم ردم يكسر ضهر الزلم
وثابت ما ينحني
يصعد مهره شبل الزهره
وعمته تنادي هله يا فارس كربله
النشمي الما ينثني

عمته اتشدله احزامه
عمه ايلفله اعمامه
راح الهم يتبتخر
.........
٣
علي وعلي / يشبه جده وصولاته
ترف عصف / يوم الطف بحملاته

لو سل سيفه كلشي بكيفه
لو طب للموزمه يشبه حامي الحمه
شايل غيرة علي

مثل النسمه بس بالهمه
لو دمدم لو زعل عيناً خير العمل
يا گاع اتزلزلي

شچوه وبيهم يخض
يخسف بيهم الارض
نسخه اصليه الحيدر
................
٤
كسر ضهر / الخيل وضهر الخياله
برز ارتجز / بكيفه ايسوي اليحلاله

كله امروه وشايل نخوه
بس لو طب للحرب وعلي يرعبهم رعب
عيناً كالقارعه
شد اعمامه وسل صمصامه
نار وتلهب لهب تعبهم ما تعب
فارس ما ابرعه

ابن الغانم هلك
كفو يا هيبة هلك
رد بس ابلا منحر
...................
٥
صگر جسر ما يتراجع يتقدم
كهل شبل من الاكبر يتعلم

فتل الشارب عكد الحاجب
سترك يارب هجم يشوف العسكر غنم
ايعزب بيهم حلف

بيهم يخزر يكسر يشمر
كطع بسيفه الهوه اهتزو مثل اللوه
حته اللون انخطف

شنهي السبعين الف
نزل الزلمه الكلف
حط من عدهم معبر

#عباس_هابيل_الزينبي
#محرم_١٤٤٦_1446_2024
#الليله_الثامنه

انه الزهره اجيت وكلبي لهفان
ادور عزه وليدي وين ما چان
.............

قميص احسين انشره بكل محرم
اثر طعنات بيه وباقي اثر دم
اون وابچي عله اوليدي التخذم
حيى اعله السواد وتطفى الالوان

..............
اجيت بدمتعي ومكسوره خاطر
على الطحنو ضلوعه بالحوافر
ابچي و الْلطم اويه اهل المنابر
اعله حسين التوذر عله التربان

..............
اهيئ بالعزه بأيام عاشور
ارحب باليجيني ومهجته اتفور
باخير المجلس اكعد گلبي مكسور
هلا ومية هلا بخطاري الـ احْنان

..............
يخدام المجالس والله احبكم
بكل مجلس اجي وامسح دمعكم
اسبح واذكر بكل مره اسمكم
حته الماحضر بس گلبه حزنان

..............
الخدم صح مو قليل وكلش هواي
لچن ماتيهتكم كلكم اوياي
انه اعرف حته اليوزعون بالماي
على حسين الذبيح المات عطشان
..............

#عباس_هابيل_الزينبي
#محرم_١٤٤٦_1446_2024
#الليله_الثانيه

شكراً لله خادم اسمي
لطمه ودمعه زمرة دمي
بكل نبضه ياحسين بكل دمعه احسين
ياحسين ياحسين
..................
منين ما اباوع غريب بهالزمان
غير الحسين وخدمته ماكو امان
عايش بغربه واحب واحد غريب
اكثر امن امي احس بيه الحنان

حاء اوسين وياء ونون
انه ابهل احرف مجنون
امن اذكرهن متضل عيون
يبچن دم اعله المذبوح

احرف من اذكرهن غير
يتملكني احساس الطير
طلسم وتحس كلهن خير
اذكرهن والهم يروح

عايش والله بخير الخدمه
يارب ديم اعليه النعمه
ياگلبه شكد حنين
ياحسين ياحسين
..................

شهرك امن العام انطره يالحنين
اتعلعلت والساعه احس بيها سنين
مثل يعگوب انه اناطر يوسفي
ويوسفي شهرك حبيبي ياحسين

اتلگيته بدمعي الاحمر
متحضرله ارد اتطبر
وداعة نحرك ما اكدر
اصبر ماذيني افراگه

عايش دومك بحساسي
ثارك ما عايف راسي
فدواتك اهلي وناسي
تصيحك روحي الحراگه

متهمني الناس انته تهمني
الله يحبني بس اتحبني
تسوه اطبرلك جبين

ياحسين ياحسين
..................

ياحسين تريدني احچيلك صدك
مو مصالح جابني اعليك العشك
انه ميهمني صدر ديوان اصير
شلي بي مادام صدرك منسحگ

ماجيتك جيت غايه
عبد وشفتك مولايه
مستلسم رافع رايه
وراكعلك وانته اميري

بغربه وحسيتك اماني
متيه واسمك عنواني
سجلني ولا تنساني
سامحني بكل تقصيري

بكلشي مقصر مدلي چفوفك
بصافي النيه لا ماعوفك
جيتك وبكل يقين

ياحسين ياحسين
..................

انه كلي ذنوب وبابك اجيت
غير چفك كاض چفي ما لگيت
الدنيه تغرني وحملتني الفاينلت
واعله شباچك يبو اليمه انحنيت


مغمض ما اندل كلشي
بوصلتي الگلب وامشي
دمعاتي تكل رمشي
الحُبك عطشان ارويني

الحزنان اليدخل صحنك
يطلع من يمك يضحك
كل هذا وينزف جرحك
ما تتوصف يحسيني

ياالما تتوصف شيوصفك
حته امن ادراكي اكبر عطفك
ياحبل الله المتيّن
ياحسين ياحسين
..................
#عباس_هابيل_الزينبي
#محرم_١٤٤٦_1446_2024

تاسع جرح للمذهب اليوم
خله النواضر تبچي اله دموم

...............
انته ياتاسع جرح بچه الزچيه
خله دمعتها دمه عالخد سريه
ذكرتها سيدي بالغاضريه
بالحسين الضل ثلاث اعله الوطيه

مثلك حبيب الزهره مضلوم
.............

ياشباب وما تهنيت بشبابك
ياابوجعفر مو سهل والله مصابك
شيعتك ملتمه هليله اعله بابك
يالحنين ايتعب ايعذب غيابك

يبن الرضا ويلاه يمسموم
................

سيدي ابحر الشمس باقي وسافه
وانته ثغرك ما نطق غير الترافه
ياكلف يالموتتك مثلك كلافه
يالشبابك يسوه الف اه وحسافه

حر الشمس غيرها الرسوم
.............

ياكريم ابعطفك امفضل علينه
تكضي حاجتنه قبل من امد ادينه
وجهك المصباح ومضوي المدينه
شلون نغرك سيدي وانته السفينه

سفرة عطائك عامره دوم
............

يا ابونه الما يسد واحد مكانك
ياحنين ومحد ايعوض حنانك
كلشي يرعب سيدي بحاجة امانك
ياغريب ومارحم مره زمانك

ما راعتك ياسيدي الگوم 
..............
انته ياباب المراد الـربنه راده
السجده بعتابه تره سر السعاده
حضرتك صارت كهفنه للعباده
عظم الله لنا اجر الشهاده

يكرمنه چفك وانته محروم
...............
#عباس_هابيل_الزينبي
#محمد_الجواد

حدثوهم عالجره والصار بينه
حدثوهم جدي هدمه امسلبينه
حدثوهم حدثوهم
.............
يالتصعدون المنابر جدي صعدو فوك صدره
والمثلث مرد چبده وطلعه من خرز ضهره

الله واكبر والهضيمه
متخضبه اللحيه الكريمه
يصعد شمر صدره حريمه
ويذبحه من مكفا جريمه

حدثوهم بالذبح وكت المنيه
حدثوهم باله يم بنته رقيه
حدثوهم حدثوهم
................

اولو حجيتو اعله الشريعه والنهر مايه يسيله
اتذكرو العباس عمي مستحي امن اخته العقيله

يركضله راح حسين ملهوف
وكل ما يكوم تعثره لجفوف
رد للخيم وللون مخطوف
باكت كمرنه يصيح الطفوف

حدثوهم محني رد احسين ضهره
حدثوهم عالنهر رد ناسي عمره
...............

ولو صلتو العمتي زينب حيرو شتكتبون عنها
بالجثث حارت تدور وين اخوهه اوين ابنها

ضلت تشمهم من النحور
مثل اليشم عودان البخور
مثل الرحه فوگاهم تدور
خلص عمرها كله عاشور

حدثوهم ردت الگيد ابئديها
حدثوهم والعده اتشمتت بيها


.................

ولو فرح مركم يشيعه اتذكرو رمله وضناها
ودته عريس ابنها بدمه متحني اجاها

ردتك ييمه اليوم ضيجي
وبموتتك نشفت ريجي
دكعد يبعدي ويا رفيجي
كض ايدي انه ايعثر طريجي

حدثوهم رمله ما زفت ابنها
حدثوهم شيبت من هم حزنها
حدثوهم حدثوهم
...........

امرنا احيو يشيعه واحنه ما ننسه امركم
بليلة الوحشه العضيمه يالخدمتونه نمركم

يالتحضر بمجلس حزنهه
وتساعد الزهره اعله ونهه
تحضر تره الخدام ابنهه
بالعصره والسطره بجفنهه

حدثوهم احنه ما ننسه حزنهم
حدثوهم نحضر ابْساعة دفنهم
حدثوهم حدثوهم

#عباس_هابيل_الزينبي
#الليالي_الجعفريه

عاهد الصادق للموت هالخدمه ماتنساها
...............

اكتب عهد من المهد للتابوت
تنادي حسيناً واحسيناً للموت
وصي اليدفنك بالگبر والزاتوت

غيرك وسيله يحسين فوك الگبر يقراها
...................

احيوا امرنا الصادق ايكررها
يريد المجالس سيدك تحضرها
هالنعمه من الله فلا تخسرها

الصادق شعائرنا هنياله من احياها
..............

تعبها روحك بالعزه وعوف افلان
يحچي بمزاجه لو يصرح فلتان
ملاچك حسين انته مو ياهو الچان

هالخدمه تاج وعالراس سبط النبي خلاها
...............

عاشور اجه ولاتهتم شما يحچون
عنك مرائي عادي خل يگولون
الماعدهم احسينك اكيد ايغاروون

وادم الما عدها حسين بيمن لعد تتباها
.....................

باچر جوازك بالحشر حسراتك
تطفي جهنم دمعه من دمعاتك
يشفعلك حسين وتجي مولاتك

ام الحسن ماتنساك تحضرلك اتلگاها
..................

الخدمه مثل الجمره تحتاج چفوف
تحملها ما تتركها لو تعرف خوف
معنه الخدامه تعرفه لا مو بالشوف

بس صفي گلبك لحسين تعرف شنو معناها
...............

علك بيارغ والبس هدوم السود
امن الليله بالدم ابصم او انطي اعهود
ايضل العزاء قائم لـ يوم الموعود

هاي الشعائر توفيق هنياله من نالها
...................
#عباس_هابيل_الزينبي
#الليالي_الجعفريه