عندي ليك كم كلمة اسمعهم مني ..💛 متسمحش لغيرك يقلل من إنجاز ولو بسيط عملته.. محدش عارف الكواليس فيها إيه.. محدش عارف السهر والعياط والكافيين اللي بوظ معدل النوم الطبيعي والمسكنات، محدش يعرف. محدش بيشوف الصورة كاملة غيرك لذلك محدش ليه يعطي رأي كامل أو تقييم أصلًا. حقيقي أي إنجاز يتعمل الفترة دي سواء ف الدين أو الدنيا سواء علم شرعي ف دورة كملتها، سورة حفظتها، أذكار انتظمت عليها، ورد واظبت عليه، قيام ليل بقالك كام يوم بتجيبه كل دي إنجازات عظيمة تُحسب " ومقصدش هنا عد الأعمال ولا فكرة المَن، أنا بتكلم ف نقطة المجاهدة ومحاربة النفس والشيطان" حتى إنجازات الدنيا إنجازات تُحسب...لو كان كورس كملت حتى نصه، مذاكرة خلصتها، امتحان دخلته، مشوار الجامعة دا مثلًا أنا بعتبره إنجاز رهيب والله..كل دي حاجات عظيمة ربنا وفقك ليها. ف متسمحش لحد مشافش الخلفية فيها إيه ييجي يقولك"وأنت عملت إيه يعني! ، ما مش عارف مين جايب كام، على فكرة أنا خلصت اللي أنت بتقول عليه، على فكرة أنت معملتش حاجة جديدة... إلخ" ، والرصة اللي بنسمعها دي. حقيقي إن الواحد يصمد يوم كامل بدون صدامات نفسية دا إنجاز ولا أروع والله. اليوم اللي بتجاهد نفسك رغم إنك تعبان ومقريف ومودك وحش بس لازم تكمل سعي دا يوم مميز. المادة اللي جبت فيها النص رغم تعبك فيها يُحسب ليك التعب دا عند ربك، الشغل اللي كان فوق طاقتك بس خلصته ف كام ساعة إنجاز عظيم.. وغيره كتير من الحاجات اللي بتمر ف يومنا. ... #الخلاصة💛 ظروفك غير ظروف غيرك، عثراتك ف الطريق غير عثرات غيرك. اللي الساحة كانت فضيالك فيه ممكن متبقاش فاضية لغيرك لما ييجي يعمل نفس اللي عملته، ف اللي تعب دا عمل مجهود وجاهد مودز وعقباته عشان يكمل ، ف متجيش حضرتك تتفلسف عليه ! لو مش هتشجع غيرك على إنجازه البسيط، على الأقل احترمه واسكت . الكلمة حقيقي تأثيرها بيفرق جدًا، كلمة حلوة منك كفيلة تدي إنسان طاقة رهيبة ، ترفعو فوق ..وكلمة تانية بدون وجه حق ممكن تغير مسار يومو أصلًا ، تنزلو سابع أرض ! اكفو الناس شر السنتكم واحباطكم . وحاجة كمان تانية .. أكبر عدو للإنسان " هو نفسو " ثم وسوسة الشيطان ..عشان كدا لازم نحافظ على الأذكار لإنها بتحمي حتى من أفكار الإحباط دي. لازم تعرف إننا خُلقنا للسعي سواء ف الدين أو الدنيا.. مهما كان الإنجاز بسيط فاحمد ربنا إنه أعطاه ليك وسيبك من كلام الناس ، وانجز وافتخر بنفسك ونجاحاتك . ... " ياصديقي سِر ، لا تَقِف فالدربُ لا يأتي إليك ، والحلمُ لا يجري ليسقط في يديك، هي هكذا الأيام، سعي دائمٌ إن تَلتفِت للخلفِ .. تخسر ما لديك.💛" •Positives •🌻 @Fadfadah98.