***
...GA
Sochingga berkinay, bagʻrimga bekin,
Diydor qiladimi bir bora zafar?
– Kelasi safarga kelaman, deding:
Gulim, kelmasachi kelasi safar?!
Qoralovchi kim-u, bunda oqchi kim?
Oqlovchim, qalbimni tim qora etding!
Ishq ne bildim!
Senga
bildirmoqchiydim,
Bilganingni qilib, bilmasdan ketding!
Dilim tilimlangan, koʻzlarida nam,
Tilimiz,
dilimiz ayro,
bu ne ish?!
Meni koʻp charchatdi bilsang jonginam,
Koʻngilsizliklarga koʻngilli boʻlish!
Xurshidyuz,
ezdi-ku sogʻinchning gʻami,
Yurak zirqiraydi,
vujud qulamas.
Bahor kelsa gullab ketadi zamin,
Bahorim, kelmasang – koʻnglim gullamas!
Erkin HOJIMUHAMMAD
@bumening_olamim
