YANGI KITOB TAQDIMOTI Bugun Alisher Navoiy nomidagi O‘zbekiston Milliy kutubxonasida adabiyot jonkuyari, maʼrifatli inson Keldiyor Xo‘jayorov haqidagi “Himmat va maʼrifat yog‘dusi” kitobi taqdimoti bo‘lib o‘tdi. Unda O‘zbekiston xalq yozuvchisi Erkin Aʼzam, O‘zbekiston xalq shoiri Usmon Azim, O‘zbekiston Yozuvchilar uyushmasi raisi o‘rinbosari G‘ayrat Majid, filologiya fanlari doktori, professor Nurboy Jabborov va boshqalar so‘zga chiqdi. G‘ayrat Majid o‘zining 70 yoshini qarshilagan Keldiyor Xo‘jayorovga O‘zbekiston Yozuvchilar uyushmasining esdalik sovg‘alarini topshirdi hamda yangi kitob o‘zbek kitobxonlariga muborak bo‘lsin, dedi. “Ijod nashr” nashriyoti tomonidan 2000 nusxada bosilgan kitob “Adabiyot, sanʼat va jamoat abroblari eʼtirofi”, “Xalqaro eʼtirof”, “Ijod ahli nazari”, “Tengdoshlar ko‘ngil izhori”, “Izdoshlar ehtiromi” nomli besh bo‘limdan iborat bo‘lib, unga Keldiyor Xo‘jayorov haqidagi maqolalar, sheʼrlar jamlandi. Kitob o‘z o‘quvchilari ko‘nglini manzur etadi, degan umiddamiz. Fozil Farhod