إنتَ مش سيء، هي بس يمكن الحياة حطتك بظروف غلط، صحصح وعيد ترتيب أمورك وتحدى ظروفك، كلشي غلط عملته، لسا معك فرصة تصلحه، يلا بلش.. وإنتَ مش بشع، إنتَ يمكن تطلعت بالمراية الغلط، أو يمكن المراية مكسورة أو عليها غبرة، جرِّب تطلَّع بعيون حدا بحبك، مش شرط إنتَ بتحبه، حاول يكون هو بحبَّك، هالإشي كفيل يخلِّيك تشوف إنعكاسك بعيونه وكأنك ملاك.. إنتَ مش منسي، مش وحيد، صدقني في حدا إنتَ بتخطر على باله كل يوم، أو عالأقل بتخطر عبال حدا كل فترة، بس كل ما تخطر على باله، بتغيَّر مزاجه للأفضل، يعني إنتَ سبب سعادة حدا، ف إبتسم إنتَ كمان من حقك تكون سعيد.. إنتَ مش فاشل، هي يمكن الفُرص ما كانت بصفَّك بكثير مواقف، يمكن الحياة شوي صعَّبتها عليك، بس تذكَّر إنه ربنا ببتلي المسلم بقدر تحملّه، يعني إنتَ قدها، ولولاك قدها ربنا ما خلّا إبتلاءك بهالمقدار، لذلك إرفع راسك، وتنفس بعمق وقوم من استراحة المحارب يلي إنتَ فيها وانطلق من جديد، أحلامك لسا بستستناك💪🏼 إنتوا مش عاديين، ولا حدا فيكم عادي، إحنا كلنا مجرَّات، كل واحد بداخله عالم بحد ذاته، فيك تتحكم بكمية الخير والشرّ بداخلك، بكمية الزهر وكمية الشوك، بكمية المحبة وكمية الكره، يلَّا كل حدا يرتب عالمه زي ما بحبّ! 🖤