*بصوا دا بوست عن الصلاه والوضوء بالتفاصيل 🌻* البوست ده أنا هتكلم فيه عن الصلاة بالتفصيل هنصلى إزاى وعدد الركعات وكده إزاى نصلى صلاة النبى صلى الله عليه وسلم :)) وهى الصلاة الصحيحة ومحدش يكسل عن قراءة البوست عشان دى مسألة حياة أو موت ، جنة أو نار إذا أصلحتوا صلاتكم أصلحتم سائر عملكم والعكس صحيح :)) فمتفتكروش لو نتوا قاعدين تعملوا طاعات وعبادات أد كده ومش بتصلوا صح يبقى هتنجوا ، الصلاة أولا وبعدين أى حاجة تانى مفيش حاجة مهمة فى حياتك أساسا أد الصلاة دى إلى مش فاضى ياخد البوست ويأجل قرائته لأى وقت تانى تكون النفس فيه هادية مبدأيا كده أحنا الصلاة فى الإسلام 5 فروض ، الفجر الظهر العصر المغرب العشاء الفجر : ركعتين | الظهر : 4 ركعات | العصر : 4 ركعات المغرب : 3 ركعات | العشاء : 4 ركعات دول عدد ركعات الفروض ومش هتكلم فى السنن دلوقتى كيفية الصلاة " يعنى نبدأ صلاتنا إزاى " أول حاجة طبعا أستحضار النية بإنك هتصلى الفرض ولازم ناخد بالنا إنه النية فى القلب يعنى مبنتطقش بيها ، يعنى مثلا إنى أقول بلسانى اللهم إنى نويت أصلى الفجر ده كلام غير صحيح أستحضار النية فى القلب والوضوء : هتكلم فى الحتة دى شوية معلش بصوا يا بنات .. الوضوء الفرض إلى علينا هو كالأتى 1 : بنبتدى بغسل الوجه ( بغسل وشى من أول منبت الشعر فى راسى من فوق كده لحد نهاية منطقة الدقن ) مرة واحدة 2 : غسل المرافق ( من بداية ضوافر صوابعى خالص كده لحد كوعى 3 : مسح الرأس ( بنمسح شعرنا كده لحد أخره من ورا وبنرجع تانى لأدام وبردو يجوز مسح ربع شعرك ) 4 : أخر حاجة رجلينا ( بنغسل رجلينا كلها وخدوا بالكوا لازم المية تيجى على أعقاب الرجل " الحتة المدورة الى ع جنب رجلينا دى " ) " يَا أَيُّهَا الَّذِينَ آمَنُوا إِذَا قُمْتُمْ إِلَى الصَّلَاةِ فَاغْسِلُوا وُجُوهَكُمْ وَأَيْدِيَكُمْ إِلَى الْمَرَافِقِ وَامْسَحُوا بِرُؤُوسِكُمْ وَأَرْجُلَكُمْ إِلَى الْكَعْبَيْنِ ... " طيب أومال نغسل أيدينا 3 مرات ونتمضمض ونستنشق 3 مرات ده أيه ؟ دى سنة عن النبى صلى الله عليه وسلم وطبعا أحنا بنعملها أحياءا لسنته بس أنا بعرفكم صفة الوضوء الصحيح ده وإلى هو فرض عشان أحنا ساعات كتير بنتمم السنة فى الوضوء وبنترك الفرض إزاى ؟ يعنى أبسط مثال إحنا بنغسل أيدينا 3 مرات ولما نيجى نغسل دراعنا وكده مش بنجيبه من أول الصوابع زى ما المفروض يعنى ، إنما بنبدأ من نهاية الكف لحد الكوع وكده غلط .. أحنا مأتممناش الفرض فكده الوضوء غير صحيح ربنا مش هيحاسبنا ع السنن فى الوضوء بس هنتحاسب الفرض فيه تانى حاجة أنا بعرفكم ع فروض الوضوء دى عشان لما المية تبقى قاطعة تفهموا انه نص أزازة مية هيكفينا نتوضى .. ومنتحجحش انه مفيش مية ونسيب الصلاة xD معنى كده إنى متوضاش زى ما كنت بتوضى الأول ؟ لأ طبعا ، يعنى أبسط حاجة أحنا بنعملها كل يوم الوضوء فأحنا بنحيي فيه سنن النبى وده هيزيد فى أجرنا وثوابنا أكيد ومننساش يعنى انه ذنوبنا كتير فمحتاجين كل حسنة :)) يلا بقى ندخل فى الصلاة أنا هشرحلكم الركعة الأولى بالتفصيل وهنمشى بالمبدأ ده على كل الركعات إلا فى قراءة سور القرءان يعنى أول حاجة بنكبر تكبيرة الأحرام " ودى أول تكبيرة بنقولها فى الصلاة " بنقول #الله_أكبر وبعدين بنقول دعاء إسمه دعاء أستفتاح الصلاة وده (سنه )وارد عن النبى صلى الله عليه وسلم وياريت نحفظه ونقوله بأستمرار وبنقوله ما بين تكبيرة الأحرام وقراءة الفاتحة وصيغته كالأتى اللهم باعد بيني وبين خطاياي كما باعدت بين المشرق والمغرب، اللهم نقني من خطاياي كما ينقى الثوب الأبيض من الدنس، اللهم اغسلني من خطاياي بالماء والثلج والبرد * بعد ما بنقول الدعاء ده بنقول " أعوذ بالله من الشيطان الرجيم " " بسم الله الرحمن الرحيم " ونبدأ بقراءة الفاتحة وسورة قصيرة من سور القرءان ( لو الصلاة جهرية زى الفجر والمغرب والعشا بنقول الفاتحة والسورة جهرا فى أول ركعتين وإذا كانت سرية بنقولها سرا زى الضهر والعصر ) * بعد ما بنخلص قراءة القرءان بنكبر تانى ونركع وفى الركوع هنا بنقول " سبحان ربى العظيم " من مرة وممكن الزيادة والرسول كان بيقولها 3 مرات فأحنا هنعمل زى ما كان النبى بيعمل ^^ وكمان فيه ذكر أو دعاء كان بيقوله النبى فى الركوع وهو : " سبحانك اللهم ربنا وبحمدك اللهم اغفر لى " قدرتوا تقولوه قولوه مقدرتوش خلاص المهم سبحان ربى العظيم وخلينا فاكرين أحنا بنحاول نصلى صلاة زى صلاة النبى * بنقوم من الركوع وأحنا بنقول سمع الله لمن حمده ، ربنا ولك الحمد ! * وبعدين بنروح ساجدين مع الله أكبر وبنقول " سبحان ربى الأعلى " من مرة وأكتر بس هنقول 3 مرات زى ما النبى كان بيعمل و أكثروا من الدعاء فى السجود بقى براحتكم بس نخلى الدعاء ده ثابت كده لإنه من الأدعية إلى كان الحبيب صلى الله عليه وسلم دايما بيقولها .. #الصلاه