من أحداث اليوم: إجت امرأة عالعيادة ماسكة ايديها عبطنا وموجوعة... (شكلا اجتماعية وهيي حبابة مبينة يعني)فتحَتْ حديث مع امرأة ومعها بنتا ومن حديث لحديث بتسأل الأم إذا مزوجة بنتا . قالتلا: لاااء لساتا صغيرة! أنا هون انبهتت من السؤال بس حاولت أضبط حالي. بعدا سألتها الأم: خير إن شاء الله شو حالك؟ الامرأة: والله عم يوجعني بطني صرلو يومين ، وزوجي بدو أولاد صرلي فترة ما حملت. الأم: يلا خير إن شاء الله ، يعني ما عندك أولاد؟ الامرأة: امبلا عندي بنتين وصبيين. أنا هون دحشت حالي بالحديث:وأنتِ بدك وحابة؟ الامرأة: طيب شو إذا ما جبتلو أولاد بيتزوج عليي. أنا هون رجعت انبهتت، ضحكت وقلتلا الله يرزقك يارب. هالمرّة ماما بتتدخل بالحديث: طيب ومع هالوضع الصعب برأيي حاجة أربعة ليقدروا يعيشوا حياة منيحة. الامرأة: والله الوضع صعب بس هو هيك بدّو .. ونحن مهج*رين ما عنا شي منزرع بندورة لنعيش.. أنا: أنتِ من حلب؟ الامرأة: لا والله أنا الرقة وزوجي من الحسكة.. واتهجرنا وإجينا عالساحل ، بس والله بدك الصراحة الساحل أحلى بكتييير❤️.