ШЕЪР КАЙФИ
Тилак Жўра ўтган асрнинг 70 йилларида Тошкент давлат университетининг журналистика факультетида ўқиб юрганда (сиртдан ўқирмиди-ей) ҳилватгина, доим кулиб турадиган ёқимтой йигитча эди. Шеърлар ёзарди, уялиб-уялиб ўқиб берарди. Ишқилиб ўша пайтдаёқ ўз тенгқур қаламкашлар орасида анча танилиб қолган эди. Мен ўша йиллари қалам тебратадиган шоирларга бағишлаб "Ҳажви аҳли қалам" деган ҳажвий шеър ёзган эдим. Бу шеърда Тилак Жўрага шундай сатрлар бағишланган эди:
Шеър кайфи қандай билмоқчи бўлсанг,
Рўбарў келавер Жўра Тилакка,
(Бу ўринда қофия учун унинг исми охирига олинган эди). Кейин Тилакжон университетни тамомлагач таржима кафедрасида ўқитувчи бўлиб ишлади, фан номзоди диссертациясини ёқлади, аммо ҳамон ўша-ўша тортинчоқ, кулиб турадиган йигитчалигича қолди.
Афсуски умри қисқа экан, бу ёруғ дунёдан эрта кетди. Ундан яхши шеърлар киритилган бир неча китоблар, дўстлари дилидаги хотиралар қолди. Тилак Жўра деганда ўша шеър айтиб ўзича яшнаб-қувнаб юрадиган, юзидан табассум аримайдиган йигитча қиёфаси қолди менинг хотирамда ҳам.
Мухтор Худойқулов, ёзувчи, филология фанлари доктори, профессор.
https://t.center/tilakjura1947
