قولدانۋشىلار تەلەگرام جارناماسىنان قورىقپاۋى كەرەك. نەگە ەكەنىن تۇسىندىرەمىز پاۆەل دۋروۆ تەلەگرامدا جارناما قالاي جۇمىس ىستەيتىنى جايىندا ايتىپ بەردى. 1. چاتتاردا جارناما بولمايدى. جارناما @durov سياقتى ۇلكەن ارنالاردا عانا بولادى. تەلەگرامعا الەۋمەتتىك جەلى رەتىندە ەمەس، مەسسەندجەر رەتىندە سەنىم ارتاتىن قولدانۋشىلار ەشقاشان جارناما كورمەيدى. 2. ەشقانداي تارگەتيڭ بولمايدى. قولدانۋشى دەرەكتەرى جارناما ماقساتىندا پايدالانىلمايدى. 3. ءبىز تەلەگرامدا بۇرىننان بار جارنامانى جەتىلدىرىپ جاتىرمىز. تەلەگرامداعى كونتەنت جاساۋشىلار قازىردىڭ وزىندە ارنالارىندا جارناما ساتاتىنى بەلگىلى. بۇل - قولدانۋشىلارعا جاعىمسىز اسەر قالدىراتىن، مەزى بولاتىن رەتسىز نارىق بوپ تۇر. ەندى تەلەگرام ارنا يەلەرىنە قۇپيالىققا باسىمدىق بەرەتىن بالاما ۇسىنىس جاساۋ ارقىلى وسى جاعدايدى وزگەرتەدى. قولدانۋشىلار جارنامادان باس تارتا الادى، بىراق پاۆەل دۋروۆتىڭ پىكىرىنشە، قۇپيالىققا باسىمدىق بەرەتىن جارنامالار ارنا يەلەرىنە بولاشاقتا تابىس اكەلەتىن جاقسى بالاما بولادى. باسقا بالاما - دونات پەن جازىلىم. تەلەگرام ۇجىمى وسى ەكى ماسەلە بويىنشا دا جۇمىس جاساپ جاتىر. "ءبىزدىڭ تۇپكى ماقساتىمىز - قارجىلىق تۇرعىدان تۇراقتى جانە ءوز قولدانۋشىلارى ءۇشىن ەڭ جاقسى ستراتەگيانى تاڭداۋ ەركىندىگى بار كونتەنت جاساۋشىلاردىڭ جاڭا ساناتىن قۇرۋ. ءداستۇرلى الەۋمەتتىك جەلىلەردى قولداناتىندار جەكە دەرەك جيناۋ مەن مانيپۋلياتسيا جاسايتىن الگوريتمدەردەن تىم ۇزاق ۋاقىت زارداپ شەگىپ كەلدى. بۇنى وزگەرتەتىن ۋاقىت كەلدى" - دەيدى پاۆەل دۋروۆ.