قصيدة للزهراء ع {نكبر ردت البنيه}كأني بالامام علي ع ذهب الئ قبر الزهراء ثاني ليلة من رحيلها وجلس يبكي ويقول ..... نكبر ردت البنيه يام الحسن سويه هوه انه قالع خيبره شسوت فرگتچ بيه ...شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ نكبر ردت زينب سوه ازغيره بعدهه من رحتي بدموع الهظم متروس خدهه اسمعهه من تبچي تصيح امي شيردهه شيردهه وهيه ابحضن التراب اعليه راح ايطول الغياب يا زهره حيلي اشويه .. شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ ليل الهجر ما احمله يا بعد الضلوع شگد صعبه بمچانچ اخلي بيدي الشموع مكسور گلبي وخاطري وبالفرگه مفجوع ضلعچ هظيمه ام حسن ماطاب اعليه راح ايطول الغياب لجر النفس مابيه .. شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ هاظمني كلشي بموتتچ يا شمعة الدار عفتيني وحدي وبالعيال التبچي محتار كل مابچه حسين وحسن بيه تشب نار اشتاگيتلچ يا اغله الاحباب اعليه راح ايطول الغياب يا دمعتي مجريه .. شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ مجريه دمعة حيدره لضلعچ المكسور للدار خل نرجع سوه شلچ بالكبور مو گبرچ تمنيت گبري والله محفور من البارحة يالدمع سچاب اعليه راح ايطول الغياب بس ساعه مري اعليه.. شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ دارچ خليه وصوت بس انعاوي بيها زينب وحگ عشرتنه يذبحني بجيها تبچي وتصيح امي الكبر مالاگ ليها وياها كون انعصر بالباب اعليه راح ايطول الغياب زينب تون يوميه..شسوت فرگتچ بيه ❥❥❥❥ـــــــــــــ❁❁ـــــــــــــ❥❥❥ #للشاعرة غدير الحساني