‍ ‍ ✅ افسانه مَئر و اِشکارگُو (یا اشکاری‌گو) یتا روز، مَئر و اشکارگو خِرابِه (جنگل) دله دور زونه. وشونه میون صوُوِت بیه که کادوم اتا صوایی زودتر خو جه ویشار وونه و اِفتاب کفنه وِنِ سر. مَئر بئوته: صوائی افتاب اول مه رو کفنه بعد اون انده حِوون رو. اشکارگو بئوته: ته جه پیش‌تر مره افتاب گرنه. خِلاصه وشون دِتا میون، حرف خله دَکِش‌بَکِش بَیه. اشکارگو بئوته: فردا صوائی مَیِّن وونه. مَئر بئوته: چیتی خانی معلوم هاکنی؟! اشکارگو بَئوته: شومبی یتا تپه سر خاسمبی، افتاب که در بِمو، مَـیِّن وونه اول کِنه سر کَفِنه. مَئر هم بئوته: خا بُوریم. وشون بوردنه یتا بلند تپه سر بخاتنه که افتاب تِه بزو، وشون ره چَک هایره. صوائی بَیه و اشکارگو ویشار بیه. بدییه افتاب دکته ونه شاخ تِک. ونگ هدا: های مَئر! کاجه دری؟ بِرو هارش افتاب اول مه شاخ ره بند هائیته و مه کله گرم بیه. ویندی مه حرف راست بیئه؟! مَئر صدا بموو و بئوته: آهای اشکارگو! افتاب اول مره بند هائیته اشکارگو بئوته: ته کاجه دری؟! مَئر جباب هدا: ته شاخ سر کِلافه بزومه بخاتمه، صوائی افتاب اول مه سر دکته. اشکارگو ره خله غِض بیته. یک دفه خاشه کله و شاخ ره مَکِم تکون هدا، مَئر ون شاخ سر جه دکته بنه. اشکارگو کله ره جِر هاکارده و مَئر ره دندون بهیته و هورت بکشیئه و بخارده. بعد خاشه پیش بئوته: افتاب اول مه سر کفنه و مره گرم کانده. تا زنده هستمه هر کاجه مَئر بَوینم وره خارمه.                                **** اون گادِر تا اِسا، مَئر هر کاجه اشکارگو ره بَوینه، فرار کانده. قدیمی سِرِه‌ها دله مَئر دهیبو اشکارگوی شاخ ره یشتنه سره دله یا کَت دیم زونه و دیگه مئر اون خانه ره دیاری نمو. اَره این اُوسنی پیش بمو که اشکارگو هر کاجه مئر ره بوینه وره خارنه و ونه زهر، اشکارگوی چِش گوشه جمع وونه و خله کمیاب دارو هسته. قدیم آدما گوتنه اشکارگو چش گوشه تریاک دره، مُشک و عنبر دره که هر درد وسته دوائه. اینتا ره هم بائورم و بدونین که اشکارگو وقتی مَئر ره خوارنه وه ره خله تِـشنا وونه اَما اوُ نخوارنه. اگر اوُ بخواره می‌یرنه، این زهر، هم ونه چش گوشه جم وونه و مشک و دارویی خوشبو وونه هم اشکارگو گوشت خله مریضی‌ها وسته دوا هسته. اسا اهل دانش خله په‌گیری هاکاردنه، گونه اشـکارگو یـتا گادر که خاراک زیاد بـخائه و چَلبی نیاز داره یا خانِه ونه شاخ زودتر گَت بواشه گوشت خارنه. اشکارگو = گوزن مَئر، مَر = مار میِّن = معلوم ✍نجما نجار 📸: فضای مجازی 🆔 تاپور، فرهنگ و هنر مازندران @Taapoor #اشکارگو                  #اشکاری‌گو #مئر_مار                  #افسانه #گوزن                      #باورهای_قدیمی #طبیعت                   #هزارجریب #نجما_نجار