#الجزء_الاول #صندوق_أمريكاني ماكنتش عارف أعمل إيه ولا أتصرف إزّاي.. صوتها وهي بتعيط كان بيقطع قلبي، ولما خدت نفس عميق وحاولت ماتهزّش وسمعتها للآخر... كملت كلامها، وبعد ما حكتلي، رديت عليها وانا خلاص هتجنن.. -وحياتي عندك ماتعمليش في نفسك كده، خلاص، انا.. انا هحجز وهنزل على طول. -انا خايفة يا أدهم ومرعوبة أوي، مش عارفة انا أصلا عملت كده إزّاي! - طب بكره أو بعده بالكتير هتلاقيني عندك، أكيد في حاجة غلط وهنفهمها، ارجوكي ماتخافيش يا حبيبتي. - انا مش عارفة أسيطر على نفسي خالص، اللي بيحصل ده.. غصب عني والله. -نورهان.. اسمعيني يا نورهان..عشان خاطري بلاش تهور، نورهاااان.. يا نورهان!.. أنتي سامعاني؟ قفلت التليفون في وشي، اتصلت بيها بعدها كذا مرة؛ لكن ماردتش عليا، وبعد كذا اتصال.. موبايلها اتقفل خالص، حسيت بقبضة في قلبي وقررت ساعتها إني أنحي كل الخلافات اللي بينا وأتصل بعمي يمكن يلحقها على ما أنزل... -ألو، ازيك يا عمي. -عمك!.. مين معايا؟ -أنا أدهم ابن أخوك. -مممم.. وعاوز ايه بعد السنين دي كلها يا ابن أخويا؟ لسه فاكر تسأل على عمك؟ -أرجوك يا عمي اسمعني، مافيش وقت نفتح في اللي عدى، انت لازم تلحقها دلوقتي.. أرجوك. - ألحق مين؟ -نورهان، لازم تلحقها، اختي كلمتني وهي منهارة وبتعيط وفهمت من كلامها انها بتفكر تنتحر. -تنتحر!.. وأنت ماتلحقهاش ليه؟ -ما ماما ونورهان عندك في مصر. -طيب وأمك فين من اللي بيحصل ده كله؟ -ياعمي الله يخليك اطلع على العنوان اللي هبعتهولك وطمني عليهم، وياريت تخليك معاهم لحد ما ارجع.. أنا خلاص اهو، هحجز في أول طيارة وهتلاقوني عندكم. -طب ابعت العنوان، لما أشوف اخرتها معاكوا يا ولاد أخويا، ما هو برضه مهما حصل، الضفر عمره ما يطلع من اللحم. -حاضر يا عمي حاضر، بس خد بالك من نورهان لأنها خارجة من عملية صعبة في المخ. -عملية ايه دي؟ وأنا اخر من يعلم!.. هو أنتوا بتتصرفوا من دماغكوا.. خلاص مالكوش كبير ترجعوله؟ -كان عندها ورم في المخ والعملية كانت ضروري تتعمل وماكنش في وقت، أرجوك خليك جنبها وطول بالك عليها. - حاضر يا ادهم، ربنا يجيب العواقب سليمة. دخلت على الويب سايت بتاع شركة الطيران ولقيت ان اقرب رحلة لمصر هتبقى بكره بالليل، خدت شنطتي ونزلت على الشركة اللي شغال فيها، وأول ما وصلت طلبت أقابل المدير وفعلا دخلتله وشرحتله باختصار ان عندي مشكلة متعلقة بحياة اختي، واني لازم.. لازم أنزلها ضروري، طبعا مانع في البداية، لكن لما ألحيت عليه وطلبت منه يبص للتراجت بتاع شغلي، اقتنع أخيرا واداني أربع أيام أجازة، وفي الخامس قالي اني لازم أكون موجود في الشركة، شكرته… @stories_adjective