View in Telegram
☦️Молитвы о спасеніи Россіи
#Православіе
1-ая
Господи Боже, Спасителю нашъ, къ Тебѣ припадаемъ сокрушеннымъ сердцемъ и исповѣдуемъ грѣхи и беззаконія наша, имиже отвратихомъ Твое благоутробіе. Отступихомъ бо отъ Тебе, Владыко, и заповѣдей Твоихъ не соблюдохомъ, ниже сотворихомъ, еще же и попустихомъ прикоснутися Помазаннику Твоему. Сего ради разгнѣвался еси на народъ нашъ, простерлъ еси руку Твою и восплакася земля наша и болѣзни смертныя объяша насъ. Гладомъ, скудостію и нестроеніемъ поразилъ еси страну нашу и далъ еси насъ на попраніе врагомъ нашимъ. Умалихомся паче всѣхъ языкъ и быхомъ поношеніе даже до конецъ земли. Вѣмы обаче, якоже наказуеши насъ, яко Отецъ сыны, да скорбьми обратиши насъ къ Себѣ, тѣмже въ покаяніи зовемъ Ти: остави намъ долги наша и избави насъ отъ врагъ нашихъ. Боже силъ, Царю царствующихъ и Господи господствующихъ, призри милостивымъ окомъ на лютѣ страждущую Церковь нашу Россійскую, устави гоненіе, огради ю молитвами святителей ея и вѣрныхъ служителей олтаря Твоего. Ты вѣси, Всемилосердый, бѣду нашу, слышиши рыданіе всего народа нашего, стенанія сирыхъ, вдовицъ и младенцевъ неповинныхъ, зриши множество изгнанныхъ и въ горькихъ работахъ сущихъ, мучимыхъ и тмами темъ погибающихъ. Пощади насъ грѣшныхъ, Господи, умилосердися надъ Отечествомъ нашимъ, многіе годы въ порабощеніи безбожнымъ властемъ страждущимъ. Помяни вѣру и смиреніе отецъ нашихъ, помяни милости, яже показалъ еси имъ отъ лѣтъ древнихъ, многажды избавляя отъ бѣдъ Державу Россійскую. Услыши, Господи, теплыя моленія угодниковъ Твоихъ въ странѣ нашей просіявшихъ, помилуй землю нашу Русскую. Призри на скорбь нашу, на потребленіе царствующаго града и всѣхъ градовъ и весей страждущей Родины нашей, въ нейже искони призвася имя Твое. Господи Боже силъ, Боже спасенія нашего, творяй чудеса единъ, призри на ны, смиренныя рабы Твоя и человѣколюбно услыши и помилуй ны, се бо врази наша собрашася еже въ конецъ разорити святыни наша. Тѣмже въ покаяніи со слезами молимся Тебѣ: избави насъ ради славы имени Твоего, еже отъ врагъ Твоихъ хулится. Возстави, Господи, во благочестіи Православное Царство наше, да въ покаяніи сердецъ нашихъ отъ грознаго посѣщенія гнѣва Твоего въ путехъ правыхъ ходити начнемъ и узримъ на земли нашей судъ и правду, миръ и тишину въ истинѣ Христовой и тако прославимъ святое и великолѣпое имя Твое Отца и Сына и Святаго Духа всегда и нынѣ и въ безконечныя вѣки вѣковъ. Аминь.
2-ая
Господи Іисусе Христе, Боже нашъ, пріими отъ насъ недостойныхъ рабовъ Твоихъ усердное моленіе сіе и, простивъ намъ вся согрѣшенія наша, помяни всѣхъ враговъ нашихъ, ненавидящихъ и обидящихъ насъ, и не воздаждь имъ по дѣломъ ихъ, но по велицѣй Твоей милости обрати ихъ: невѣрныхъ ко правовѣрію и благочестію, вѣрныхъ же во еже уклонитися отъ зла и творити благое. Насъ же всѣхъ и Церковь Твою Святую всесильною Твоею крѣпостію отъ всякаго злаго обстоянія милостивно избави. Страждущую страну Россійскую отъ лютыхъ безбожникъ и власти ихъ свободи и возстави престолъ Православныхъ Царей. Вѣрныхъ рабовъ Твоихъ, въ скорби и печали день и нощь вопіющихъ къ Тебѣ, многоболѣзненный вопль услыши, Многомилостиве Боже нашъ, и изведи отъ погибели животъ ихъ. Подаждь же миръ и тишину, любовь и укрѣпленіе, и скорое примиреніе людемъ Твоимъ, ихже честною Твоею Кровію искупилъ еси. Но и отступившимъ отъ Тебе и Тебе не ищущимъ явленъ буди, во еже ни единому отъ нихъ погибнути, но всѣмъ имъ спастися и въ разумъ истины пріити, да вси въ согласномъ единомысліи и въ непрестанной любви прославятъ пречестное имя Твое, терпѣливодушне незлобиве Господи, во вѣки вѣковъ. Аминь.
☦️Списокъ приходовъ Р.П.Ц.З.
💬Нашъ чатъ
💛Вступай въ наше движеніе: https://t.center/solidarnostrussia
Love Center - Dating, Friends & Matches, NY, LA, Dubai, Global
Find friends or serious relationships easily