موقع بعيد ده ما متذكر كم مرة لقيت فيه وظيفة " عن بعد" خلال ال4 سنوات الفاتو ديل .. غايتو ما أقل من 3 مرات لقيت فيه وظيفة مستمرة مع شركات مميزة جداً برواتب مجزية .. ده غير كمية الناس اللقيتها في المجال وحصل بينا تعاون لأعمال كتيرة وفتحت لي فرص شراكات أحياناً الذكرني بالحاجة دي إنه قبل شوية لقيت فيه قبول لوظيفة .. هو في مواقع كتيرة طبعاً في جانب الوظائف "عن بعد" .. لكن هو الموقع الأبسط والأسهل والأكثر انتشاراً في العالم العربي .. يعني من السهولة بمكان تلقى فيه شغل مع شركة خصوصاً في الخليج الموضوع أبداً ما صعب بس داير جدية وصبر شوية في بدايات التعلم.. بالمختصر كده مجال التوظيف عن بعد بقى من أكتر المجالات النامية في سوق الوظائف وبحل مشاكل كتيرة بالنسبة للشركات من جهة وبالنسبة للموظفين من جهة تانية وبخلق إمكانات عالية في جودة العمل مع صرف أقل .. عشان كده هو المستقبل خصوصا بعد جائحة كورونا .. فأنت كل العليك تتعلم واحدة من المجالات القابلة لتقديم الخدمة عن بعد (برمجة - تصميم - كتابة محتوى - مونتاج - تعليم وتدريب - تسويق - إدارة .. إلخ ) وتبني CV كويس ويكون عندك سابقة أعمال كتيرة تقنع بيها الشركة بقيمتك (عشان كده داير صبر في البدايات في التعلم وبناء الهوية الوظيفية) .. والحقيقة العملية الأنا شفتها الشهادات الأكاديمية هنا ما بتفرق كتير .. الأحقية للكفاءة العملية وسابقة الأعمال والانتاج الفعلي ومهارات الذكاء الاجتماعي أو الSoft skills .. في موقع اسمه "خمسات" و"مستقل" للأعمال ما الوظائف .. ديل ممكن تجتهد وتعمل فيهم أعمال مصغرة لعملاء حقيقين بمقابل مادي تبني بيهو أعمالك .. بعد داك تتجه لتكوين سيرتك الذاتية وتقدم في الوظائف في موقع بعيد .. وبيكون بعد داك عندك إمكانية التوظيف من أي مكان في العالم وفي أي زمن وأعتقد دي بتحل ليك مشاكل كتيرة خصوصا مع وضع السودان الما مفهوم من 2017م ده في محاضرة كاملة في القصة دي كان قدمناها لو عندك رغبة حقيقة في البداية في الموضوع ده (1) المحاضرة دي لها زي سنة .. بعرف شباب بدوا كان في المجال ده وقتها والآن هم موظفين في شركات برواتب مجزية تماماً .. واليوتيوب مليااان برضو فتش واستفيد من زمنك. بس زي أي شيء في الدنيا .. الموضوع داير جدية وصبر على تعلم المهارة وصقلها وتخلي إدمان الميديا والفارغة الكتيرة بتاعت الفيسبوك دي .. لكن بتحل مشكلة كبيرة في حياتك والله وبالمناسبة بالنسبة للبنات: واحدة من الحلول العملية لمشكلة "عمل المرأة" اليوم هو العمل عن بعد .. بحل مشاكل كتيرة جدا وبتماشى مع الوضعية الفطرية للمرأة بالقرار في البيوت لو قدرت توفر لنفسها مكان وظيفي هنا. _ (1) رابط المحاضرة :https://www.youtube.com/watch?v=QIp5K8n-9eE