View in Telegram
نعي للولد
////////////✍✍✍////////
شمحلات الولد لوكال يمة
يطيب جرح كلبي يزيل همة
انه شتاكيتله بس ارد اشمة
////////////✍✍✍////////
فتحولي الكبر خل احجي وياه
انة اشتاكيت صدكوني لحجاياه
شلون اكظي العمر صعبه بلياه
/////////////✍✍✍//////
افتح باب كبرك يالولد لمك
وخليها بكلبها الواسع تضمك
وين تروح خليها تضل يمك
///////////✍✍✍////////
وي وجه الصبح تمرلي تمنيت
وابجيتك ييمه يصير زاهي البيت
بس حقق امنيتي بحزن ضليت
//////////✍✍✍//////////
اذا شفت الشباب يهلن عيوني
واصيحن حيل ببني لاتذكروني
يوليدي الخسرته وخابت ضنوني
///////////✍✍✍//////////
اشم ريحت هدومك والك حنيت
بقت بس ذكريات الحلوة خليت
انه أتذكر مكانك يبني وبجيت
///////////✍✍✍//////////
ارحمني يالولد مابيه انوح اكعد
انة ناديت بسمك بس عليه رد
اريدن ناركلبي تهود وتبرد
////////////✍✍✍/////////
يالنمت وسط اللحد حاجيني
ليش يايمة غبت عن عيني
وليش رايح عدمن مخليني
////////////✍✍✍/////////
تمت بعون الله
بقلم الشاعرة زينب المحمداوية
Love Center
Find friends or serious relationships easily