مع الوضع الصعب الماره بيو البلد دي و تقفيل الجامعات كل فتره والتانيه.. كترت شديد عند البنات جملة " عايزه اعرس" عشان تطلع من حبسة البيت، انتظار الجامعه، المستقبل، او حتى عشان يقولوا عليها متزوجه بس و فعلاً 90% منهم بكونوا فعلاً عايزين يعرسوا بس.. بغض النظر عن هل العريس دا صالح ليها هسي و مستقبلا و العمر كلو أو لا فبتلقى اغلبهم كانوا متسرعات شديد في اختيارهم اللهم عريس مقتدر على التكاليف في الوضع الصعب دا اللهم بس زي ما بقولوا ضل راجل ما بتكون فكرت في ما بعد العرس الحيحصل شنو الحياة بعيداً عن الماديات حتكون كيف.. اعرفي انو انتي لما تختاري شريك حياتك ما بتختاريو ليك براك انما ليك و لأولادك مستقبلا، اولادك مُوكّلينك الاختيار فأحسنيه و ما تكوني سبب في معاناتهم بعدين بسبب تسرعك و عدم صبرك هسي او جهلك بالامور مستقبلا اتريسي و اختاري صح اختاري اللي بتشوفي فيو الصلاح و التقوى ما القروش و العربيه بس و اختاري اللي خلوق و امين ما الاخدر اب وجنات براو.. اللي حيسندك و يرعاك و يطورك و عارفه إنه شخصيته تنفع تبقى محل ثقه و مسؤولية قدام ربنا و المجتمع و اولادك بعدين لأنو لا القروش و لا الوجنات  و لا الحب الاعمى ساي داك حيصنعوا أب و أسره بدون خُلُق و دين و صدقيني بالدين و الخُلُق كل الحاجات ديك بتجي ♥️ .. الموضوع كبير و صعب و محتاج وقفه و تفكير ألف مره، لأنك حتتسألي قدام ربنا عن اسرتك و اولادك و حيكون عليك انك تنشئ نشأ صحيح و صالح يفيد الأمه.. عشان كدا قدُر ما الله أداك عقل فكري، و قدّري و ضربيها في راسك.. وأبداً ما تستعجلي ربنا يرزق كل واحده فينا الزوج الصالح الطيِّب الأمين المُؤتَمن و من ثَم الذريه الصالحه 💙 #إلهام_سليمان