١٠ نصائح للأزواج لضمان حياة زوجية هادئة: ١. لو مراتك قالت لك أنا زعلانة منك قل لها "أنا آسف" من غير ما تعرف ليه. ٢. لو مراتك قالت لك إنت مبقتش بتحبني قل لها؛ والله بحبك أكتر من الأول ومتخشش في جدال؛ وصوم ٣ أيام بنية إهداء ثوابها لزوجتك حبيبتك. ٣. علميا الست بتفكر وهي نايمة؛ فخد أحلامها على محمل الجد؛ لأنها بالنسبالها مش أضغاث أحلام؛ دا يقين. ٤. والله لو انت "بل جيتس" مراتك هتعرف الباسوورد بتاع تليفونك؛ فبلاش تاخد راحتك؛ إن كنت عاوزها ما تاخدش روحك؛ دا غير إن الاستقامة حلوة. ٥. اتعصب واستغرب وشهد طوب الأرض لما "أنثى بكبريائي" تعملك لايك؛ واتهم الناس انها مش بتراعي الخصوصية؛ وصرح إنك بالشكل دا هتقفل الأكونت بتاعك. ٦. إنت دايماً غلطان.. هي دايماً صح .. ٧. العيال الصغيرة أجهزة تصنت وتجسس بالغة الدقة.. هتصدقهم وتكدبك. ٨. إياك ثم إياك ثم إياك تعرفها إن حد من اصحابك اتجوز على مراته؛ ولو حصل وعرفت قل لها إن حد الله بيني وبينه؛ واغلط فيه؛ هو هيسامحك بس هي لا. ٩. كراجل بتؤمن بالمنطق؛ والتفسير الواقعي؛ معها يجب أن تضيف لمنطقك منطق جديد يسمى "هي كدا" بلا أي تفسيرات أو سياق واقعي؛ "اللي تشوفيه" مخرجك من هذا المأزق. ١٠. لو قالتلك صدقني هتندم؛ يبقى صدقني هتندم.