في أحيان كثيره بحس إنى الطرف السئ ..
بحس إنى مُخيبة للآمال ..
بحس إنى ما بعرف اعبر بالطريقه الصح
بالتالى بطريقة ما بخلى الإنسان ال معاي حزين أحياناً ..
بعد صراعات بيني و بين نفسي إكتشفتا إنى بخاف ..
و الخوف ال أتولد جواى كان سبب أساسي و عائق كبير لمطبات كتيرة في حياتي .
بخاف أعيش نفس العيشة ال انا كُنت ببكي فيها كتير ..
بخاف نهاية الطريق تكون سيئه زي بدايتو ، و بخاف كل الكلام ال جواى ما اعرف أرتبُ لأني أبداً ما أتعلمت أتكلم في يوم ..
بالنسبه لي التعبير عن ال مشاعر ال انا بمر بيها تجربه جديدة ..
ما كان في ناس في حياتي زمان بتسمعني .. و أبداً ما جربتا احساس اخذ مساحتي و اعبر عن ال كلام ال في راسى ..
الموضوع حالياً بالنسبه لي زي الطفل ال بتعلم كيف ينطق الحروف ..
مهمه صعبه في عُمر كبير ..
فتاة عشرينية بتخونها دايماً الكلمات ..
بت لطيفه لقت مساحه و إنسان يسمع .. ف بدت تواجهة عقبة كيف تتكلم؟!..
كيف ال فتاة ال عشرينيه ال حالية بتحاول تكون احسن .. عشان " زول "
كيف بدت ترتب حروفها و تحاول تصيغ جملة
مره تجرح .. مره تصيب !..
بس وسط كل المحاولات هيا عارفه انها أحسن .. هيا عارفه أنها بدت تتحسن ..
و فكرة انها في المكان الغلط بس مع الإنسان المناسب كانت فكرة مريحه ..
لولا الإنسان ال صح هل كانت عرفت تتكلم في يوم ؟..
لا المكان و لا الزمان حا يفرقو
طالما في إنسان حنين معانا .
إحنا دايماً ضحايا الترومات ال ما قدرنا نطلع منها
و السبب الرئيسي " أحنا .."
كان يفترض نكون أقوى من كده .. نعيش حُزننا و نعمل موف اون ..
ضُعفنا إتجاه ماضينا أثر علينا .. لدرجة حتى الخوف بضحك فينا .
إحنا ضحايا الحُزن ال قررنا نعيش فيهُ .
فقرر يتمسك فينا زى ما كُنا في يوم متمسكين فيهُ .
#Nermeen_Th
