قصائد المقصّر سجاد ناجي العديل الأحسائي

ابوذية لميلاد الإمام الصادق عليه السلام

الموالي ما قطع ويّاك وصله
لو إنّ ايقطعونه وصله وصله
اومع هب الهوى حبّه يوصله
إلى أرض البقيع ابهالمسيّه

تمَّت بحمد الله و منّه
1445هـ
العبد المقصّر : سجاد ناجي العديل
https://t.center/sajjadnaji2015

هوسه لمولد الإمام جعفر بن محمد الصادق عليه السلام

نحـبـك يا ولينه و حبنا عالفطره
نـهنـي ابهالولاده فاطمه الزهره
يَـمـن بـيـك العوالم كلـها مسترّه

يا مذّهبنا و سرّ برهانه
و الله نحبّـك يا مولانـه


تمَّت بحمد الله و منّه
يوم الأثنين : 16 / 3 / 1442هـ
العبد المقصّر : سـجـاد نـاجـي الـعـديـل

https://t.center/sajjadnaji2015

أبوذيات في المولد الشريف

اوگع ليكم ابدمّي و صادق (1)
و أماشي من يواليكم و صادق (2)
هالليله انولد هادي و صادق (3)
يالله هنوا الـزهـره الزچيّه


حزني الليله خليته ورايه (4)
ولفيت احمل الك بيرگ ورايه (5)
المعادي ابد ما يهمني ورايه (6)
و افرح يا ولينه بهالمسيّه


شرح الجناسات:

1- الصدق
2- اصادق او ( الصداقه )
3- الإمام عليه السلام
4- خلفي
5- العَلَم
6- رأيه


تمَّت بحمد الله و منّه
يوم الأثنين : 16 / 3 / 1442هـ
العبد المقصّر : سـجـاد نـاجـي الـعـديـل

https://t.center/sajjadnaji2015

ميلاد الرسول الأكرم صلى الله عليه واله وسلم


وُلِدَ المختارُ أصلُ البَركاتْ
سيدُ الأكوانِ نورٌ للحياةْ
طاهرُ الأعراقِ ابنُ الطيّباتْ
مشعلُ النورِ هُدًىٰ للكائِناتْ
مَن أرادَ المُعْجِزاتِ الباهِراتْ
عاليًا يرفعُ صوتًا بالصلاةْ

اللهم صلِّ على محمد وآل محمد

تمَّت بحمد الله و منّه
15 / 3 / 1445هـ
العبد المقصّر : سجاد ناجي العديل
https://t.center/sajjadnaji2015

هوسه في حق الرسول الأكرم صلى الله عليه و آله و سلم


جيـنـه الـمـحـفلـك هـالليـله يـا طه
بْخِدمتك هالمسه كل شيعي يتباها
الـمـوالـي حـضـرتــك ودّه يتعناها

اوخسران الما يرفع ايده
يا بلسم گلبي و تغـريـده

لخادم العتره الطاهره
سجاد ناجي العديل
الاحد 27 / 7 / 1441هـ

https://t.center/sajjadnaji2015

( جلوه في ميلاد رسول الله صلى الله عليه وآله )


طه نبينه و محلى حضرته
بارض المدينه تلالي گبته
******************
يامـحـلى گْبـته نبينـه الخضره
اتمنى اوصل و أطُـبّ الحضره
و اهتف دَخـيـلـك يَـبـو الزهره
اسأل امْن الله اروح ازْيارته
******************
اتـمـنى اوصـل إلى ارض الشفيع
و عـگـب الـزيـاره اروحـن للبقيع
وباصوتي اصرخ يا حصن المنيع
كل شيعي مشبوح إليكم نظرته
******************
يَـبـو الـزچـيّه البتـوله الطاهره
كل گلب مكسور نريدن تجبره
ويّـا العلـيل الـنـريـدك تنـظره
تشافي اوجاعه وتعدل صحته
******************
و شـكـثـر مـشـتـاگ يـا طـه الرسول
اتمنى بس ليك و للحضره الوصول
و انـدل گـبـرهـا ابـنـيـتـك الـبـتـول
كل المنى انزور و نشوف امنارته


تمَّت بحمد الله ومنّه
يوم السبت : 16 / 03 / 1443هـ
العبد المقصّر : سجاد ناجي العديل

https://t.center/sajjadnaji2015

🔸 قصائد ميلاد الرسول الأعظم صلى الله عليه وآله و حفيده الإمام جعفر الصادق عليه السلام 👇🏻

موشحات وابوذيات

من روض النخيل انشدها ابياتي
او بابيات الشعر أنسج عباراتي
و غيركم أنا ما امدح يا ساداتي
و ابكل محفل ارفعها صلاواتي

إذا رايد نجاة ابساحة المحشر
إذا رايد شفاعه امن الولي حيدر
إذا تريده يعينك بالشدد يحضر
صلاتك عالنبي خليها تتكرر

اللهم صل محمد وآل محمد

إذا رايد رضا الباري تعالى
تعاله المحفل الليله تعاله
و صلاتك هالمسه خلّها اتعاله
على الهادي و عترته الهاشميّه


العبد المقصّر : سجاد ناجي العديل

https://t.center/sajjadnaji2015

الإمام المهدي عليه السلام


صلاة الله على المهدي إمامي
*********************
صلاة الله على روح الشفيّه
او على جدّه النبي خير البريّه
اوعلى امه فاطمه الزهره الزچيه
اوعلى حيدر علي عالي المقام ِ
*********************
ولينه رحمه للعالم وجوده
او مثل حيدر علي ابعزمه او صموده
إلهي اجعلنا من صفوة جنوده
اولنا اكتب أسم بين الأسامي
*********************
عظيمه ليلة المولد علينه
اوعلى اجناح الأمل طرنا اودعينه
عسى الله ايعجّل ابطلعة ولينه
اويروّي كل قلب من عدنا ظامي
*********************
دعيت ابفاطمه أم السّياده
إلهي ارزقنا ويّاه الشهاده
سعاده او ما مثل هاي السعاده
مع المهدي إذا أصبح ختامي
*********************
ابظهور المنتظر نحيا ابكرامه
اويعم خيره علينا والسلامه
اولنا يشفع إذا اتصير القيامه
عقيده راسخه او بيها التزامي
*********************
حقيقه اوللخدم بيها أجاهر
وحق المرتضى تاج المفاخر
مع المهدي نطب الجنه باچر
اونشوف المصطفى او آله الكرام ِ


نال شرف النظم :
أبومظاهر الأحسائي
سجاد ناجي العديل

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
في استشهاد الإمام الحسن العسكري عليه السلام
-------------
للعسكري في هاليوم هذا العزا امسوّينه
*****************
نلطم اعلى الصدر قوّه اوما نسينا امصيبته
اوندري المهدي ولينا ذب ياويلي اعمامته
يلطم اعلى الرّاس اوينحب بويه مردوا چبدته
بويه ما رحموه الاعادي وافجعوها امّيمته

وسط العزا نشوفه حاسر وسف مهدينا
*****************
يظل مولانا مصابك بينا يسعر چالجمر
مثل ما چبدك يويلي يسعر ابسم الغدر
نذكر احنا اللي جرى لك والمدامع تنهمر
تعذّبت وانت ابشبابك وانقصف منك العمر

افراقك ولينا يفجع سهم الدهر چاوينه
*****************
جسمك الطاهر تغسل بعد ما العمر انختم
وعلى جسمك يا امامي صلّى مهدينا بألم
ويلي عاللي ماتغسّل ابو الغيره والشيم
بالجراح امتلى جسمه وقلبه مشلوع بسهم

وبكل حقد هالجمّال ويلي قطع چفّينه
*****************
يبومحمّد يا ولينا سلم منّك هالجسد
ما إجا طاغي يويلي وابنعل صدرك صعد
كبّك اعلى الوجه قوّه اوقطّع المنحر بعد
مثل بواليمّه ياوسفه ابخيله داسه بن سعد

جسم ابواسكينه بالقاع خيل العدا امطشرينه
*****************
يمتى مهدينا نشوفه وراية الحق ترتفع
نسمع الصرخه تدوي ويمه كلنا نجتمع
ناخذ ابثار الايمه ويه ثارات الضلع
نقلّه ما انهاب المنيه هالعهد منا استمع

بدم النحر يمولاي هذا الشرف شارينه
*****************
تحت ايدك يا امامي كلنا جند امجنّده
نقسم بهيبة محمد قلب فاطم نسعده
وكل عدو ليكم ياغالي بالتراب انوسّده
وننتظر بس امر منّك فقط انت تحدّده

يمتى يجينا هاليوم والله شكثر تانينه


حسن الناصر
سجاد العديل
1446هـ

( في حق الإمام الحسن العسكري عليه السلام )

على ولينا واويلاه
****************
مات الإمام العسكري اليوم
عنّا رحل وسفه بالسموم
عايش حياته كلها بهموم
وأملاك وسط السّما تنعاه
****************
شاف الهظم ويّا البلايا
عايش حياته بالرزايا
المصحف ينوحه آيه آيه
والدين ينعى اويجذب الآه
****************
قامت تنوحه كل الأحكام
فرض الصلاه وي فرض الصيام
وابنه ينوحه امنكّس الهام
حاضر معانه العزا شفناه
****************
وسط العزا مهدينا موجود
ينادي اودمعه فوق الخدود
والدي چبده ابسم ممرود
والسم ياويلي زاد بلواه
****************
سالم أبويه ما هو مذبوح
جسمه ما هو ممتلي اجروح
ولا بقى فوق القاع مطروح
مرمي اوزينب تون تنعاه
****************
احسين جدي ابشهر عاشور
عطشان منّ القفا منحور
اوجسمه الأعادي حوله اتدور
عريان ويلي سلبته اعداه
****************
عمْتي حكيمه ما سبوها
مثل العقيله يسّروها
وسط المجالس شهّروها
والسّوط منها المتن ادماه
****************
المهدي انا اودمعي مدرار
منّ العدا باخذ انا الثار
ثار الأبو السمّته الأشرار
اوثار الشهيد احسين ماْ انساه

تمَّت بحمد الله و منّه
العبد المقصّر : سجاد العديل
1446هـ

https://t.center/sajjadnaji2015

( في رثاء الإمام الحسن العسكري عليه السلام )
(اعقيلي)

في بوالمهدي انعزّي الزهره
********
الزهره شيعتها اتعزّيها
في فجعتها بتواسيها
فگدت بوالمهدي واليها
كل مؤمن ايدگ الصدره
********
بوالمهدي من سمّه الظالم
حضرت يَمَّه الزهره فاطم
صاحت او مدمعها ساجم
انسيت انا ضلعي او كسره
********
يالعسكري امصابك يفجع
لاچن موقف اعظم وافظع
اللي الشمر صدره اتربع
اوهبَّر عدوّ الله نحره
********
جدّك يفجع والله حاله
من بعد ذبحه أوصاله
اترضها عشرة خيّاله
تطحن صدره ويّا ظهره
********
جدّك جسمه ظل امسلّب
فوگ الغبره وسفه امترّب
او ظلت تبچي اخته زينب
اوتلطم فوگ الراس ابعشره
********
اوزينب اتفجعك حالتها
بعد الهيبه ويَّا اخوتها
لَنْ لاَعدا اتگود الناگتها
او ودوها ليزيد ابگصره
********
يالعسكري كلنا جينه
انطلبك طلبه ابحگ مهدينه
ارزقنا ازياره لبواسكينه
نوصل لطّامه للحضره
********
اومن بواليمّه نگصد گبرك
اونشتم يامولايه عطرك
اوبلطمتنا انداوي الجرحك
وانرجّ هذا الكون بأسْرَه
********
نطلب طلبه بمدمع هالي
بنار امصابك ياهالوالي
خلنا بخدمتكم للتالي
واحنا منكم ما نتبره
********
اخر طلبه يگوم الغايب
بثاراتك يبن الأطايب
اوثارات ابواليمّه ايطالب
واللي ظلوا فوگ الغبره


تمَّت بحمد الله و منّه
ليلة الأحد : 8 / 3 / 1445هـ
العبد المقصّر : سجاد ناجي العديل

https://t.center/sajjadnaji2015

( توسّل بالإمام الحسن العسكري عليه السلام )


نخوه يا مولاي نخوه بالبتول
واقف ابّابك انا بدمعي الهمول
***************
نخوه يا مولاي يا بوالمنتظر
لاتردها طلبتي ابجاه القمر
واللي يسمع نخوتي اوكلمن حضر
اقضي حاجاته يبن طاها الرسول
***************
شكثر عندي من حوايج سيدي
جيتك اطلبها او رافعها يدي
واحترت من وين ياهم ابتدي
وانت بابك للفرج كله حلول
***************
بلوعة امصابك يا مولاي أسألك
ابعمّتك زينب الحرّه اتوسّلك
واللي يبعد سيدي عنكم هلك
باچر ابالحساب يحتار اشيقول
***************
اسألك باللي جرى في كربلا
بالحسين او جثته لمعطّله
والطفل ذاك اللي صابه حرمله
او جاه سكنه عنّي اهمومي تزول
***************
بالشدد مولاي انتَ الملتجى
ما ترد كلمن على بابك اجا
واللي يتمسك ترى ابدربك نجى
اوبيني اوبينك ترى محّد يحول
***************
على بابك جيت خانقني البچي
واحترت من وين ابدي بالحچي
واحترت مولاي بيمن اتچي
جيت اطلبك سيدي وانا خجول
***************
جيت يا مولاي مكسور اظهري
بلوعة امصابك إمامي العسكري
اطلبك تجبر لي بالله خاطري
بجاه من داست على جسمه الخيول
***************
سيدي او مهدينا طالت غيبته
يمتى ايجينه وانشارك نصرته
اونقصد المظلوم كلنه بحضرته
اونحمد الباري اللّي بلّغنا الوصول


تمَّت بحمد الله و منّه
ليلة السبت : 7 / 3 / 1445هـ
العبد المقصّر : سجاد ناجي العديل

https://t.center/sajjadnaji2015

( في رثاء الإمام الحسن العسكري عليه السلام)

يا زچيّه يا زچيّه
العسكري جاته المنيّه يا زچيّه
*****************
ايعظم الله اجرچ يا زهره الطاهره
على اوليدچ چبده وسفه بالسموم امفطّره
اوحالته تفجع يا زهره الينظره
في بلد غربه اوليدچ انختم عمره ترى

حالته حسره اوشجيّه وانگضى عمره الشفيّه يا زچيّه
*****************
ابنچ الغالي يا زهره عذّبوه
لچن ما ظل على الغبره عاري ويلي سلّبوه
اولا عشر خيّاله جسمه يسحگوه
مثل أبواليمّه الشفيّه مات ظامي ما سگوه

في فيافي الغاضريَّه جثته ظلَّت رميَّه يا زچيّه
*****************
هالدهر ويّاچ يمشي بالعكس
و لأساس الظلم هذا يا زچيّه اللي رفس
باب دارچ ضيّگ اعليچ النفس
خلاّ زينب وسط غربه والعِدَا ليها حرس

جاب حق زينب مطيّه او راحت المجلس هديّه يا زچيّه
*****************
باب دارچ صار اصل الكل مصاب
او گيد حيدر علي ذاك الوصي دحّاي لابواب
خلاّ بالغربه اشكثر راحوا شباب
بين سم او چتل راحوا يا زچيّه هالأحباب

واحد ابسجن الدعيّه جرع كاسات المنيّه يا زچيّه
*****************
الرضا جالچ خبر عنّه أكيد
سمّه ذاك الرجس غيله اولا اختشى رب العبيد
اومضى في اخريسان محزون اوشهيد
لچن ما ظل يا زچيّه مرمي ابحر الصعيد

مثل ابواليمّه الشفيّه صار ميدان أعوجيّه يا زچيّه
*****************
اوعن جواد الآل جا عندچ عِلم
سمّته ذيچ اللعينه او خلت الگلب ابألم
وابنه الهادي بالغربه والهظم
جرّعه سمّ المنيّه بالحقد ذاك الخصم

خلاّ چبده ملتضيّه من أثر سم الرزيّه يا زچيّه
*****************
او جاتچ الفجعه بمصاب العسكري
حين بالسم گضى عمره بأمر ذاك المجتري
او بگى هالسم يفري ابچبده فَري
اوناح لمصابه الشفيّه اللي ساكن بالغري

او كربلا والكاظميّه ناحوا لمصابه سويّه يا زچيّه
*****************
او آه من حين الوداع او ساعته
اجا المهدي على صدره ظل يطوّح ونّته
نادى يا بويه اوسالت دمعته
ليش بالغربه عفتني والحزن فت مهجته

گوم بويه ابعجل ليّه لا تروح ابهالمسيّه يا زچيّه
*****************
گله اگرب والدمع منّه انحدر
ارد اوصّيك ابوصيّه استمع يالمنتظر
اطلب الثارات من أهل الغدر
ثاري او ثار الزچيّه او ثار محزوز النحر

والتي راحت سبيّه من على ظهر المطيّه يا زچيّه
*****************
او عگب ما انهى الوصيّه بالأنين
لن جبينه اعرگ يويلي واسبل الموته اليدين
اومدد ارجوله اوخفَت منّه الحنين
لاخر أنفاسه الشفيّه ظل ينادي ياحسين

او عگب ما انهى الوصيّه اخفى وسفه الموت ضيّه يا زچيّه
*****************
اوتالي شبله گام حسره ايجهّزه
اعليه صلّى بالمهابه و الجنازه امعزّزه
وادفنه ابگبره اونصب لجله عزه
انشاركه جينا اوردنا منّه يعطينا الجزا

انشاركه جينا العزيّه انواسي بن خير البريّه يا زچيّه


تمَّت بحمد الله و منّه
ليلة السبت : 7 / 3 / 1445هـ
العبد المقصّر : سجاد ناجي العديل

https://t.center/sajjadnaji2015

( موشح في حق السيدة سكينة عليها السلام )


يالله يا شيعة علي الوفّايه
نروح لسكينه بعد مشّايه
*************************
يالله يا شيعة علي گوموا بأنين
نگصد السكنه او نبچي بالحنين
من نجي يمها ننادي ياحسين
ونْنصُبْ ابجنب الگبر الگرايه
*************************
نقرا امصابچ او نبچي بالدمع
بالصدر لجلچ نكسّر چم ضلع
والصدىٰ يوصل سماوات السبع
نلطم او نْنّصبْ إلچ تعزايه
*************************
هاي بت فاطم او ما إلها مثيل
بيها هيبة حيدره ذاك الجليل
بيها غيرة بوعلي اوزعل الكفيل
واصبحت منّ الله لينا آيه
*************************
يالتريد الفوز اگصد ليها
حاجتك يالشيعي هي تگضِيها
هاي سكنه الشيعه مَتخَلِيها
اوما ترد كل من تجي شچايه
*************************
اقسم اعليها بعبّاس الگمر
بجاه بوها ويلي محزوز النحر
و باللي ضيّعها يا وسفه هالدهر
ما تردك والله هي وفّايه
*************************
گلها يا سكنه نريدن هم نزور
ندخل الحاير على لطم الصدور
نروح حضرة والدچ ذاك الغيور
او ندخل بوسط الصحن نعّايه
*************************
كلّنا انّادي يا سكنه كلّنا
گبرچ اندله المنى كل المنى
او مع المهدي انجي نزورچ كل سنه
او بسمچ اترفرف يا حرّه الرايه
*************************
اونبني الصحنچ ياحره والضريح
مع گبه سيده اتعانق الريح
مع امناره امذهبّه مثل الذبيح
او نجي الها كل سنه عنّايه


تمَّت بحمد الله ومنّه
يوم الأثنين : 04 / 03 / 1443هـ
الإضافة في عام 1445هـ
العبد المقصّر : سجاد ناجي العديل

https://t.center/sajjadnaji2015

( نخوّه لمولاتي سيدة الأكوان السيدة فاطمة الزهراء عليها السلام )


نخوه يا مولاتي يالمظلومه
*************************
نخوه فاطم و النذر بيچ انعقد
و انتِ حاشا و الله مْتخيبي احد
جينا ننخى فاطمه نريد المدد
بجاه مولانا علي و ادمومه
*************************
نقسم اعليچ ابعلي يافاطمه
شافي كل اگلوبنه المتأَلِمه
ابجاه من غسله صبح امنْ الدِمَه
ويّه كل شاب الوگع بالحومه
*************************
نريد منّچ فاطمه هذا الأمُر
تنگضي الحاجه اوينزاح العسر
ابجاه من راحت سبيّه باليسر
تنجلي عن كل موالي اهمومه
*************************
على بابچ فاطمه جينا وگوف
وانتِ حاشا ما تردين الضيوف
جينا ننخى ابجاه مگطوع الچفوف
ويْ عامود الراس ويلي او يومه
*************************
يالعليمه ابحالتي اوكل الأمور
اقسم عليچ ابعلي ذاك الغيور
ويّه صدر احسين البيه الكسور
نريد بارينا عزانا ايدومه
*************************
فاطمه و المهدي طوّل ما حضر
يمتى يرجع من عگب هذا السّفر
او ياخذ ابثارات محزوز النّحر
اويجلي عن گلب المحب اهمومه


تمَّت بحمد الله و منّه
16 / 5 / 1442هـ
31 / 12 / 2020مـ
اخر تعديل
7 / 6 / 1444هـ
31 / 12 / 2022مـ
العبد المقصّر : سـجـاد نـاجـي الـعـديـل

https://t.center/sajjadnaji2015

( نخوه بالصديقة السيدة فاطمة الزهراء عليها السلام )


نخوه يا أم احسين يالمقهوره
*************************
على بابچ يالبتوله قاصدين
لاتردينا يازهره خايبين
بجاه مولانا أمير المؤمنين
كل مُحب عندچ قصد بانذوره
*************************
نخوه يا أم حسين فرجي شدتي
لاترديها يازهره طلبتي
حاجتي عندچ تراها حاجتي
ابحق ضلوعچ فاطمه المكسوره
*************************
دخيل يازهره اوعليچ المُعتمد
منهو غيرچ نقصد ابوقت الشدد
فاطمه يا فاطمه نرجوا المدد
كشفي الشدّات يا معصوره
*************************
يا زچيّه انصيح والمدمع همول
اقضي الحاجات يا بنت الرسول
اونبغي الباري يبلّغنا الوصول
قبر ابوچ اونشم زاكي اعطوره
*************************
لاترديني ولا اتردي الحضور
يا زچيّه سَهلي هاي الأمور
نقصد البوچ النبي كلنا اونزور
بالمدامع فاطمه المنثوره
*************************
فاطمه والله تعبنا امن الزمن
يمتى يطلع حجة الله ابن الحسن
نعتني مشّايه لچ كلنا ابشجن
اونجي قبرچ فاطمه وانزوره


تمَّت بحمد الله و منّه
1445هـ
العبد المقصّر: سجاد ناجي العديل

https://t.center/sajjadnaji2015

نعي في أحوال السيدة فاطمة الزهراء عليها السلام


واويلي على الزهره
واويلي على الزهره
*************************
الف وسفه على الزهره بعد فقد النبي المختار
إجاها ويلي الظالم ابكل قوّه اوهجم عالدار
اوما بين الجمع نادى لزوم ايبايع الكرار
لون بحرق عليچ الدار اوضلعچ قوّه بنكسره
*************************
اوقامت بالعجل فاطم اولاذت هيّه خلف الباب
اوقالت له ياهالظالم رد او هالعدو ما هاب
اولا تدخل علي بيتي تراني ما عليّه احجاب
اوبس حس الرجس بيها للحايط سند ظهره
*************************
سند ظهره العدو الغدّار اورفس باب الطهر قوّه
انفتح باب الطهر ويلي اوفاطم خلفه تتلوّه
ولا راعى النبي المختار اوهوَ مندفن توّه
اوسطر أم الحسن قوّه والعين اصبحت جمره
*************************
اوسقط محسن على الغبره يويلي غارق ابدمّه
او ينادي فاطمه حسره ذبحني هالعدو ابظلمه
اوحرمني ابجوره هالظالم أقلّچ يُمَّه يا يُمَّه
ولا تقدري تضمّيني يا يُمَّه ابسبت العصره
*************************
تالي طاحت الزهره ياوسفه حسره مدميّه
من ضرب العدا الأشرار صارت هيّه مغشيّه
اوعدوّ الله دخل للدار وأعظم من هالرْزيّه
اوحيدر علي امچتف او مقيود ابحبل حسره
*************************
اوتالي حسّت الزهره اونادت لحقي يا فضه
لحقي اعليّه هالساعه ترى صدري العدو رضّه
اوشوفي محسن الغالي على الغبره وقف نبضه
او شيلي اوليدي المحسن يافضه من على الغبره
*************************
اوطلعت تالي للمسجد تجر اذيال حسرتها
تقومن مره مره اتطيح او تصعب والله حالتها
خلوا عن علي الكرار لوترفع الشكوتها
او لن ارض المدينه اتموج واسماها صفت حمره
*************************
او لن قنفذ اجاها ابسوط يا ويلي او تولاّها
اومن ضرب العدو وسفه تونّ يا ويلي خلاّها
اوما قبلت ترد للدار إلا الوالي ويّاها
اولچن هذا العدو ابحقده سطرها عالوجه سطره


تمَّت بحمد الله و منّه
1445هـ
العبد المقصّر: سجاد ناجي العديل

https://t.center/sajjadnaji2015

( قصيدة في رثاء سيدة الأكوان السيدة فاطمة الزهراء روحي فداها )


الزّهره الزچيّه روّعوها
ولا راعوا الـ أمها و أبوها
**********************
چانت الزّهره ابْوَسطَتْ الدّار
او لانّه يا وسفه إجا الغدّار
ابگوّه عصرها اونبت مسمار
اوفي محجر العين اسطروها
**********************
او تالي خَذوا حيدر وليها
اوطلعت تلحگه ابْچِيهَا
ردو ولا سمـعـوا حچـيها
اوردوا إليها اولوّعوها
**********************
دمعي عليها بالوجن ساح
لما ارتفع منها هالنياح
كلما اوْگُفَتْ اتْريد ترتاح
ايجوها الزچيّه اويضروبوها
**********************
وصلت إلى المسجد ابحاله
ونّتها يا ويلي اتّعاله
تركوا الوصي اوفكّوا اغلاله
اوجاها العدو يشَّتْم أبوها
**********************
اوراحـت إلى گبر الشفيّه
اودمعتها فوگ الخد جريّه
تگلّه استمع هاي الرزيّه
منّي فدك بويه اغصبوها
**********************
بويه الأعادي لوّعوني
اومنّ البچي اعليك امنعوني
اوبرا المدينه طلّعوني
بنتك ياطه مرمروها
**********************
اولانّه النّبي يگلها دصبري
يا بنتي اعله الذي يجري
باچر ترحلي و آنه ادري
اضلوعچ يا بنتي كسّروها
**********************
اوحين الإجا وگت المنيّه
حنّت اونادت هالزچيّه
والحيدر اتْبَدِّي الوصيّه
ابْليل الجنازه شيّعوها
**********************
اوحين الذي خلّص التغسيل
نادى الوصي وادموعه اتسيل
يالله يا اولادي گوموا بعويل
هاي البتوله ودّعوها


تمَّت بحمد الله و منّه
يوم السبت : 28 / 3 / 1442هـ
العبد المقصّر : سجاد ناجي العديل

https://t.center/sajjadnaji2015

( قصيدة لذكرى استشهاد السيدة فاطمة الزهراء عليها السلام )


يا نبينه بضعتك هذا المسا هجموا عليها
يا نبينه زمره باحقاد اوضرب متحاوطيها
لاگت انواع العذاب هالطهر ويّا المصاب
يا نبينه يا نبينه
*************************
من غبت يا نور طيبه شافت الزهره الألم
هجمت اعليها الاعادي والضلع منها انهشم
لوّعوها اوعذبوها اوهم بعد خدها انلطم
اوبالضرب ويلي ولوها واشعظم هذا الهظم

يا مصيبه شافت الزّهره يويلي من الزمره
يا مصبيه اوّل المحسن تسگطه على الغبره
من بعد دفعت الباب لاگت انواع العذاب
يا نبينه يا نبينه
*************************
انتَ وصّيت ابوصيّه اومارعوها اوصيّتك
بعد عينك يا نبينه عذّبوها بضعتك
الطموها اوما رعوها واهضموها ابنيّتك
واحرموها بعد تبچي يا وسف لمصيبتك

اگطعوها شجرة الـ تبچي تحتها كل مسيّه
اگطعوها اوما خلوها تبچي اعليك الزچيّه
والله خانگها المصاب لاگت انواع العذاب
يا نبينه يا نبينه
*************************
اوحين ما جات الاعادي لعد باب الطاهره
لو مايطلع هددوها اتگود گوّه حيدره
ابتحرگ الحجره عليها والضلعها تكسّره
اومحسن الزّهره ابتسگطه اوينعفر فوگ الثرى

اوهم وليها ابتگوده هالعدا وسفه للجامع
اوهم وليها بالغصب هالگوم بتخلّيه ايبايع
او تجر ونّه بانتحاب لاگت انواع العذاب
يا نبينه يا نبينه
*************************
او صاحت الزّهره ابحزنها لاتدخلوا حجرتي
وخروا عن بابي يا اعادي لا تروّعوا ابنيّتي
لا تدقّون ابقساوه والله ذابت مهجتي
من فعلكم يالأعادي والله فجعه فجعتي

و الوصيّه ما رعيتوها يا أشرار البرايا
و الوصيّه من هجوم الدار گولوا شنو الغايه ؟!
اوسگط محسن عالتراب لاگت انواع العذاب
يا نبينه يا نبينه
*************************
ماتت الزّهره الزچيّه يا نبينه بالحنين
من بعد فقدك يابوها اسطروها على العين
تيتموا ويلي بعدها الحسن ويّا الحسين
او زينب الحسره تجرها على امها و الونين

تگلّه بويه صرت من بعد امي يابويه يتيمه
تگلّه بويه ابكربلا الحسين بيحزوا كريمه
و بيشبوا هالاطناب لاگت انواع العذاب
يا نبينه يا نبينه
*************************
طالت الغيبه ولينه گوم يا مهدي ابثار
ثار امك هالزچيّه الهجموا اعليها بالدار
واخذ ثار الولي جدّك من بني اميّه لاشرار
اوثار عمتك هالخذوها بالسبي فوگ الأكوار

والرزيّه حين ماْ خذوها سبيّه لبلدة الشّام
والرزيّه يوم وگفت هالسبيّه ابمجلس العام
واگفه ابّين الأجناب لاگت انواع العذاب
يا نبينه يا نبينه


تمَّت بحمد الله و منّه
يوم السبت : 30 / 5 / 1444هـ
العبد المقصّر : سجاد ناجي العديل

https://t.center/sajjadnaji2015