من الحاجات اللى الرسول عليه الصلاة والسلام ذكرها إنه قال على 3 أنواع من أشكال التعامل بين الناس ومهم جداً تبص عليهم وأنت بتختار شريك حياتك وال 3 كانوا بالتفصيل كده 1- سريع الغضب سريع الفىء (فتلك بتلك) يعنى بيزعل بسرعة بس بيتصالح بسرعة والرسول قال (فتلك بتلك) يعنى دى بتشيل دى لأنه بيزعل بسرعه بس فى نفس الوقت بيتراضىٰ بسرعة. 2- بطىء الغضب سريع الفىء (خيرهم) مش بيزعل بسهولة وبيتراضىٰ بسرعة والرسول قال عليه (خيرهم) يعنى ده أفضل نوع فيهم لأنه مش سهل يتعصب ولو أتعصب بيتراضىٰ بسهوله. 3- سريع الغضب بطىء الفىء (شرهم) بيزعل بسرعة ومش بيتراضىٰ بسهولة وده الرسول قال عليه (شرهم) يعنى ده أصعب نوع فيهم وأكتر نوع متعب لأنه بيزعل بسرعة وبياخد وقت طويل عقبال ما تصالحه وده حتى احنا بنقول عليه فى علم النفس إنه بيدخل تحت الشخصية التجنبية (القماص) اللى كل حاجة يزعل منها وعايزك أنت تجري وراه طول الوقت عشان ترضيه والنوعيه دى فعلا أبعد عنها تماما لأنها هتستهلك طاقتك ومجهودك وهتبقىٰ بتتعامل معاها بالشوكة والسكينة عشان ميزعلش منك وتدخل فى حوار مش هتخلص منه.