خادم اهل البيت وسام عبد الجليل

الكل عفيفه وفاطميه زينب تخلي وصية
كربله وذاك المصاب ـــــ وابد ماطاح الحجاب
ـــــــــــــــــــــــــــــــــــــــــــــــــــــــــــــــ
الدنيا يبنيتي متاها والظلم بيها يسود
والبنيه بلا عبايه كالفريسه ابين اسود
بالج تغضبين ربـچ بالشريعة والحدود

باچر بيوم الحشر ..... مايفدج كل عذر
آه من يوم الحساب... وابد ماطاح الحجاب
ـــــــــــــــــــــــــــــــــــــــــــــــــــــــــــــــ
صيري رفعت راس صيري لاتذلين الأهل
البنيه اشگد جميله الترتدي اثياب الخجل
العاشت بعفـة شرفها تصير مضرب للمثل

خلي بالدنيا شــــــعار..... لاحياة بلا وقار
بالچ يغشچ سراب...... وابد ما طاح الحجاب
ــــــــــــــــــــــــــــــــــــــــــــــــــــــــــــــــــ
الحذر واجب عالبنيه بالچ مــــــن اهل الغدر
الشــــرف مـو سلعه يمه ولاله سوم ولاسعر
الحرمه من دونه ذليله تعيش وتخلص العمر

لاتأمنين ابشر..... واجب اعليچ الحذر
بعض وادمنا ذئاب..... وابد ماطاح الحجاب
ــــــــــــــــــــــــــــــــــــــــــــــــــــــــــــــــــ
لومشيتي امشي بسكينه ولاتتبعين الجــهل
خلي طبعچ كربلائي وصامده اشلون الجبل
وهــــــيج اطباع الموالي التابع الخير العمل

من تتبعين الهوى انت..... والمامش سوى
صيتج يساوي التراب... وابد ماطاح الحجاب
ـــــــــــــــــــــــــــــــــــــــــــــــــــــــــــــــــ
لاتتطعنين الحســـــين بسهـــم وتزيدي الجراح
مــــــن تحضرين المجالس كـون باحزان ونياح
حسين ضحى بدم وريده من اجل دين الصلاح

الرايده تعيش ابأمان.... منهج حسين الضمان
مثل سكنه والرباب..... وابد ماطاح الحجاب

خـــــــــادم اهل البيت
وسام عبد الجليل الركابي

المايمشي بدرب حسين تيه رايه
ـــــــــــــــــــــــــــــــــــــــــــــــــــ
يوليدي ارد اوصيك انصت وانتبه زين
بالك يبني فد يوم تترك خدمة حسين
كـــــــل العافه والله ما يسواله فلسين
عمرك كله افنيه وادفــع فوگ ضعفين
وحبك يابو السجاد اعظم غايه
ـــــــــــــــــــــــــــــــــــــــــــــــــــــــــ
اسأل وانشد عليه وتاريخ المضى اقراه
كل العاده الحسين عكست دنيته وياه
حب حسين توفيق ونعمه ومنزله وجاه
صرخـــه الكل الاجيال ضلت وحسيناه
زلزل عرش الطغيان اسمك ايه
ـــــــــــــــــــــــــــــــــــــــ
خلها تلومني الناس المايفهــــــــــم شحاچيه
العنده حسين شيريد يدعــــــي وربه ينطيه
حبه يزيح الهموم ومفتاح الفــــــــــــرج بيه
عمري بدون الحسين ادعي مــن الله يگظيه
شلي بعمري المابيه يبني قرايه
ـــــــــــــــــــــــــــــــــــــــ
الله مخلي ميزان وحبهــــــــــم يبني مقياس
صارت كربلــــــــــه حسين كعبه وقبلة للناس
مــــــــــن يگصدها محتاج يرجع رافع الراس
بوسط الحضره اليبات يشعر هذا الاحساس
زمزم شباج حسين خيره هوايه
ـــــــــــــــــــــــــــــــــــــــ
هــــــــاي الدنيا ايام وعمــــــــــرك بيها خلصان
وكـــــــــــون تريد الحسين واضب واقره قرأن
يبني انصار الحسين اتصـــــــلي بوكت الاذان
ضــحى حسين للدين ورادك تصبـــــــح انسان
رادك تصبح انسان بيك كفايه

خادم الحسين
وســــــــــــــام عبد الجليل الركابي

اه ياليل اهـدعش مامثله ليل
لاخـــدر وخيام زينب لا كفيل
ــــــــــــــــــــــــــــــــــــــــ
آه ياليلــــــــــة الوحشة ليلة احزان ورعب
چانت ام الخــــــدر زينب هس مابين الغرب
شلون لوچتفوها باچر والله هالموقف صعب
وعالهزيل اتروح زينب عالهزيل
ــــــــــــــــــــــــــــــــــــــــ
بوحشة الليل وظلامه حايرة اعيال النبي
والخيام اركام صارت حضروا نوگ السبي
والعقيلة بظهر محني تحبي ياويلي حبي
وجرت نيرانها بوسط الدليل
ــــــــــــــــــــــــــــــــــــــــ
والعيال اعليها لمــه خــــــــــيل واسياط وزجر
الينجو من سحگ الحوافر تلهب اجدامه الجمر
ايست مــن عند اخوها وشدت احزام الصبـــــر
اودعت وليانها بمدمع يسيل
ــــــــــــــــــــــــــــــــــــــــ
بسكته عن عين الاعادي كصدت حسين الشهم
وصــــــــل صاير ابن ابوها وگامت احشائه تلم
المثلث طــــــــــر جبدته وسحگته خيول وزلم
اشلون اجمعك يالشفية بلايه حيل
ــــــــــــــــــــــــــــــــــــــــ
منين اجيب الحيل گلي مره انهض مره اطيح
للغـــــــري دارت وجها ياعلي حيــدر تصــــيح
هم دريت حسين بوية من القفا بخنجر ذبيح
وين حامي الجار حمّاي الدخيل
ــــــــــــــــــــــــــــــــــــــــ
گصدت الدرب الشريعة راحت الصوب الگمر
اعثرت وافتر وكتــــــها ولزمت بچفها الظهر
بالسهـــــــم مطفيه عينك هـاك عيني والنظر
العمر ماريده بغيابك مستحيل

خادم أهل البيت
وسام عبد الجليل الركابي

الليله عيني شلون ياعالم تنام
حتى كاروكه احترك ويه الخيام
ــــــــــــــــــــــــــــــــــــــــ
التهمت النيران كلشي وركضت بحرگه الرباب
ذكرى من عبدالله جابت گطعة اكماط وثياب
اه ياريحت اوليدي المـــــاوصل حلم الشباب
عمره ستة اشهور ماحل الفطام
ــــــــــــــــــــــــــــــــــــــــ
گصدت الميدان تنشد وين عبدالله تصيح
وهي تمشي يدر لبنها عرفت اهنانه ذبيح
لگت اثار بمچانه من دمه نحره الجريـــح
ترف نحره زغير موگد السهام
ــــــــــــــــــــــــــــــــــــــــ
تسأل رقية اعله اخوها وامه حست بالوجع
يمه چاوينه اخي هواي نايم مـــــــــــا شبع
اختنگت بعبرت حزنها وجاوبت اخته بدمع
ذبحت سيوف الغدر طير السلام
ــــــــــــــــــــــــــــــــــــــــ
گبل موعد كل فريضه چان عبدالله يفز
ورباب تناغي ابنها وتگعد بمهده تهــــــز
آه ياذيج الليالي الچانت اعله امك تعــز
روحي بغيابك صفت ذاري وركام
ـــــــــــــــــــــــــــــــــــــــ
خاوية وكلش حزينــــه وعلگم ارياگي عليه
ياصبر يگدر يجرعه الراياح اوليده من اديه
يبقى كل ايامه عايش ينتظر بلكت يجيـــه
ياحرام امالي راحت ياحرام
ــــــــــــــــــــــــــــــــــــــــ
شنهو ذنبك ليش يمه بكربله دمـــــك مباح
انت اصغر طفل ضامي تعلگ براس الرماح
زغير فـراگه شيحمله عمري من بعده نياح
يمه فجعوني بفعلهم هالئام

خادم الحسين
وسام عبد الجليل الركابي

طال الغياب... گوم يامحيٌ الشريعه والشعائر
طال الغياب...والبقيـع بلايـــه گبـه ولامنايـر
نسجت اعليها العناكب.... ماتمر بيها المواكب
طال الغياب....... طال الغياب
ــــــــــــــــــــــــــــــــــــــــــــــــــــــــــــــــ
شحچيلك شسولف والجروح هــواي
اخاف اتجاوز حـــدودي العذر مولاي
ليليه الهمــــوم بگلبي تعــــــــزف ناي
واگول الجمعه ياروحي الفرج هالجاي

آه يغالي... بياجرح مشغول بالك الله يدري
آه يغالي...اليامصيبه ويامصاب دموع تجري
صحت يا أبن الأطايب..... ماتمر بيها المواكب
ـــــــــــــــــــــــــــــــــــــــــــــــــــــــــــــــ
دمـــع العيــن وشـــل مابقتلي دمــوع
مثل ون اليتيم بكل وكت مــوجـــوع
وتخيل گبر مخفي وطفل وضلـــــوع
ومسمار ونحر مدمي وعرس وشموع

وينه وعدك... شوكت بركانك يبن حيدر يثور
وينه وعدك... الك كـــم ثار انتظر يوم الظهور
جارت اعلينه النوايب..... ماتمر بيها المواكب
ـــــــــــــــــــــــــــــــــــــــــــــــ
يبـــــــو صبر الچبير المانفذ صبــره
شوكت لمنه الزچيه اتشيد الحضره
وضلعها المنكسر بچفوفك اتجبـــره
وتگطعها الچفــــــوف الأذت الزهره

يبو صالح.... هــــــدموا دار الأمامه اعله البتول
يبو صالح.... التدعي اصحاب الرساله والرسول
شنو اعليها الحرايب...... ماتمر بيها المواكب
ــــــــــــــــــــــــــــــــــــــــــــــــــــــــ
شوكت جرح الحسن ياسيدي يلتم
وتبنيلـــــــــه ضريحه وگبره المهدم
يالچـــــفك عـــلاج الكــل ألم بلسـم
شيعتكـم يبـــو الغـيره لفاها الهــــم

گبر جدك... مــــهدم وممـــنوع يوصل يمـه زاير
گبر جدك... شوكت خدام الحسن تنصب چوادر
بالصحن نلتم يغايب.......ماتمر بيها المواكب
ـــــــــــــــــــــــــــــــــــــــــــــــــــــ

سل سيف الحرايب اذن واطلــــع
واخذ حق البقيع من العدى مربـع
وخليـــــها المـناير بالذهب تلمــــع
علي اشـــهد اذان من الفجر نسمع

بسم حيدر... تصــــــــدح الأصوات من فوگ المنابر
بسم حيدر... تقيم حكمك سيدي وتصحي الضماير
بسيفك اعدائك تحاسب.... ماتمربيها المواكب
ــــــــــــــــــــــــــــــــــــــــــــــــــــــــــــ

خادم أهل البيت
وسام عبد الجليل الركابي

الليلة مفجوعة الهواشم ياعلي هاالليلة
وزينب اتوگت صبرها ومابقت كل حيله
،،،،،،،،،،،،،،،،،،،،،،،، ،،،،،،،،،،،،،،،،،،،،،
الليله بدموع العقيله انرسمت ادروب الخطر
طاح حـماي الحميه وخاطــر ايتامه انكســر
انهدمت اركان العدالة بالسمــه انذاع الخبــر
علـي مــا يحصل شبيها و لا يجـي مثله بشر
والحسن حودب ابضهره وإخوته اتجيله
،،،،،،،،،،،، ،،،،،،،،،،،،،،،،
لبست إحرام المصيبه والحزن غاطيّها
وي صلاة الفَجـّـر زينب شيّــعت واليّها
هامـته بسيـّف الخيانه والدمّه محنّيها
هاي مو اول مصيبه الله اليگـــويها
وحظنت عباس اخوها وانحنت تشكيله
،،،،،،،،،،،،،، ،،،،،،،،،،،،،،،،،
اه ياجمـرة ابـونه وگامــت بحسـره تون
منهو اليعوض حنانه صـارت الدنيا سجن
حالة الفاگــد عزيزه مثل المضيع وطــــن
امنيتــــه روحــــه تمـــوت ويلفها الجـفن
بلكي يخلص من عذابه والوكت يصحيله
،،،،،،،،،،،،،،،،،، ،،،،،،،،،،،
عظم الله اجرج يزينب بالولي خير العمل
شدي حيلج للمصايب كربله وطفها اكتمل
الگمر كفكف دمعها وضمها يم صدره بوجل
وضلمت الدنيا بكبرها بوالده حل الأجل
مصاب حيدر فاجعه وهد حيله
،،،،،،،،،،،،،،،، ،،،،،،،،،،،،،،،،،،،،،
راح أبو الحمله وسافه وبعده عالدنيا العفى
هــــــــي دنيا بغير حيدر نور وتحس انطفى
والله ماتســـــوى حياتي بغير حب المرتضى
جنة الله بوسط گبره غصبا اعله المارضى
اسم حيدر بالقلب ترتيله
خام اهل البيت
وسام عبد الجليل الركابي

ذوله اهل الكـــــــــرم واهـــــل العزوبيه
والله تعجب العالــــم بالخدمه العراقيه
مدوا سفرة الزوار طول الكره الأرضيه
حسين بيوم المحشر هو اليوگف للخدام
ــــــــــــــــــــــــــــــــــــــــ
زوار واجينــــــــــــــه انعـــــازي المظلــــــوم
هذا اليطلب الصحه وذاك من الضنه محروم
حاجــــــت شــكثر والام عدنه ياعلي وهموم
امشي اعليك الزهره تنظر حال المحتاجين
ــــــــــــــــــــــــــــــــــــــــ
محمد اسس الاسلام حيدر عله بنيانه
ومــــــــــــــاخاب التمسك بيك مولانه
وماضنك يبو الحسنين يوم تنســـــانه
ينبض شريانه الشيعي ابأسمك حيدرك
ــــــــــــــــــــــــــــــــــــــــ
گلي شعطلك عنه وانت الحاضر الشدات ياحيدر
يافارس بـــــدر وحنين ياليث الدحى خيبـــــــــر
بين الخيل والعدوان طشت عيلتك بالبــــــــــــــر
وانت الحاضر كل شدات حسين اشلون اتعوفه
ــــــــــــــــــــــــــــــــــــــــ
حيدر ياعلي الكرار ياسيد مشارقها ومغاربها
روس اهـــــــــــل الكفر بالسيف ضاربهــــــــا
داحـــــــــي الباب يمـــــــذبح نواصبــــــــــها
داحي الباب يسمونه الليث الجندل مرحب
ــــــــــــــــــــــــــــــــــــــــ
خل يتأكد من امه حيدر كلمن ايعاديه
موطاهر حليبه وامه فاحش بيـــــــــه
حيدرى فحل الفحول حيدرى نفس الرسول
حيدرى زوج البتول وذهب صافي وربك امصفيه
تمسك بهل البيت تمسك هما الدگو ساس الدين
ــــــــــــــــــــــــــــــــــــــــ
تكابر بالصــــبر ويهل دمعها العين
راح الگمر عنها وراح عنها حسين
جسمه اعله الثرى مطروح دمه من النحر مسفوح
مصوب كل عضو ومجروح وذاك مگطع الجفين
گطعو جفينه عباس وجتفو زينب
ــــــــــــــــــــــــــــــــــــــــ
عابس مـــــن تجنن لاتلوم اعليه
حب حسين كل عاقل تجنن بيه
دور الكــــون كله حسين ماتلگيه
شفيع بساعة المحشر امام الكل شدد يحظر
ما مره وعلي اتعذر امراد الگاصده ينطيه
ينطي امراد الزواره حسين ومايتعذر
ــــــــــــــــــــــــــــــــــــــــ
خادم الحسين
وسام عبد الجليل الركابي

ياعليل الغاضريه ...... ليلة مصابك رزيه
ـــــــــــــــــــــــــــــــــــــــــــــــــــ
بساعة وداعك يغالي الشيعه مفجوعــــه وتون
والدمع سچاب مدمي عليك مشتد الحـــــــزن
والسگاك السم نعرفه بالظلم ســـــــمـ الحسن
ناس باعـــت دينها ابزيف آل اميه
ــــــــــــــــــــــــــــــــــــــــــــــــــــــ
الشيعه من تذكر مصابك تذكر ايام الســبي
وتذكر دموع الثكالى من عيالات النبـــــــي
شلون فخر الخدر زينب تمشي بيد الأجنبي
شلون لبن زياد مچتوفه وسبيه
ـــــــــــــــــــــــــــــــــــــــــــــــــــــــــــ
انت يالصبرك حدوده ينضرب بيه المثــــــــــل
ياعليل الطف محنتك خالده ليــــــــــــوم الأزل
عيله مسبيه ويتامه وراس ليزيد انحمـــــــــــل
وظلت اجساد الهواشم يااسف فوگ الوطيه
ـــــــــــــــــــــــــــــــــــــــــــــــــــ
تذكر الشيعه بمصابك معجزة دفن الحســــــــــين
الگاع مولا انطوت لك هذا برهان المبيــــــــــــــن
بدفن سلمان الطواها الك تطوى هم يقيـــــــــــــن
واليرد شمس الله بيده ورثك هاي السجيه
ــــــــــــــــــــــــــــــــــــــــــــــــــــــــ
جسم ابو اليمه التوذر بالفله سبط الرســــــــــول
بيش لميته بعباتك رضرضت صدره الخيــــــــول
الكسروا اضلوعه بغدرهم كسروا ضلوع البتــــول
الحرگو الخيمه احرگو باب الزچيه
ــــــــــــــــــــــــــــــــــــــــــــــــــ
خادم أهل البيت
وسام عبد الجليل الركابي
https://t.center/wesam21286

يشرفني انضمامكم ودعمكم للقناة

دمعة عيونك بخدودك تشرحلي السبي
ونار المخيم حسراتك ياشبـــــل النبي
قصة آلآم وحرب
والفواطم بالغرب
والفواطم بالغرب
آه يدهري... آه يدهري
ـــــــــــــــــــــــــــــــــــــــــــ
تلچم اجروحـــــه الليالي... كل شخص فارگله غالي
ليلـــــــه مانام
ايسامر الآهات عمــــره.... شلون دله بوسط جمره
يخاوي الأركام
تشغــل الحسبات باله.... وذابل ومكسور حالــــه
كومــــة اعظام

جروحه مملوحه
تاكل بروحـــــــه
ينعى ابوه حسين والدمع يجري
آه يدهري.... آه يدهري

ــــــــــــــــــــــــــــــــــــــــــــــــــــ
أهمومك تهـــد الرواسي... والدهـــــر وياك قاسي
طول السنين
خلصت عمرك مناحـــــه .... ماشفت مولاي راحــه
تدمع العين
ياجــــــــروح الغاظريه.... المابـرت حد المنــــــه
بفگد الحسين

ادموع ابوالباقر
اتسولف العاشر
وبرجعت الميمون كسرتلي ظهري
آه يدهري... آه يدهري
ــــــــــــــــــــــــــــــــــــــــــــــــــــــــ
اهتزت السبعه الشداد... ولبسن بعاشر سواد
بذبح الأطهار
وانترس خشم الطفوف... منحر ودم وچفوف
وخيم بالنار
بالسلاسل والحبال.... گيــــــــــدوا كل العيال
اكبار وزغار

سلكوا الوادي
ايتامك تنادي
وزينب بياحال تصرخ يخدري
آه يدهري.... آه يدهري
ــــــــــــــــــــــــــــــــــــــــــــــــــــــ
عالهزل رچب الفواطم... يازمن غدار ضالم
تنصر عْدّاي
انظر الزينب سبيـــه... تعاين الخوله ورقيه
يطلبن حماي
علتي وفگد الأحــبه... والأصفاد ابأيدي صعبه
تگطر دماي

محنتي محنه
ياعلي صحنه

ادخيل ابو الحملات مايطفى جمري
آه يدهري.... آه يدهري
ــــــــــــــــــــــــــــــــــــــــــــــــــــــ
والأشد وصعب عليه.... من وصلنه للدعيه
المجلس الشام
أحمد المختار جدنه.... محكم التأويل عدنه
احنه الأسلام
اذبحو سبط الرساله... انضامت اطفاله وعياله
اه يظلام

الشاب واليرضع
امطبـر مگطـع
وبهذا المصاب تيهت فكري
آه يدهري... آه يدهري

خــــــــــــادم أهل البيت
وسام عبدالجليل الركابي

عباس منطي الزينب احچاية اداء الملا الحبيب عبدالأمير عبدالحسين