Bugungi kunda ko‘plab kanallarda turli xabarlarni ko‘rib, tezda odamlarning e'tiborini tortishga urinishayotganini kuzatyapmiz. Ayniqsa, birovning mol-mulkini yoki cho‘ntagidagi pulini hisoblashga bo‘lgan qiziqish kuchli. Bu kabi qarashlarning ildizlari, meningcha, Sovet Ittifoqi davridan boshlangan. SSSR davrida iqtisodiy tizim qat'iy nazoratda bo‘lib, har bir fuqaroning daromadi va mol-mulki davlat tomonidan kuzatib borilgan. Oddiy aholi uchun me'yoriy daromad belgilangan edi. Agar kimdir ushbu me'yorlardan oshib, 3000 rubldan ortiq pul yoki boylikka ega bo‘lsa, darhol tekshiruv boshlanardi. Davlat undan ushbu boylikning qayerdan va qanday yo‘l bilan topilganini isbotlashni talab qilardi. Agar fuqaro bu daromadni qonuniy ekanini isbotlay olmasa, mol-mulki musodara qilinib, o‘zi qamoqqa tashlanishi mumkin edi.