ፀጋን ፀገምን ሕብረተሰብ  ዘድምፅን ፍታሕ ዝናድን መሪሕነት ክትከል፣ናብ መረበቶም ክምለሱን  ፍትሓውነት ዝጎደሎ ፅንዓትን ክፍፍልን  ሰብኣዊ ሓገዝ ክመዓራረየሎም ተመዛበልቲ ከተማ ዛላኣንበሳ ፀዊዖም።  እዚ ዝተገለፀ  ተመዛበልቲ ከተማ ዛላኣንበሳ ምስ ዋና ኣማሓዳሪ ዞባ ምብራቕ  ትግራይ ኣይተ ሰሎሞን ትኩእ ኣብ ከተማ ዓዲግራት ኣብ ዝተሳለጠ መድረኽ ዘተ እዩ።  ተመዛበልቲ ከተማ ዛላኣንዘሳ ኣብ ዘቕረብዎም ሕቶታት  ከም ዘመላኸትዎ መንግስቲ ናብ መረበትና ይመልሰና፣ ብዝመረፅናዮ መሪሕነት ክንምራሕ ንጠልብ ፣ዕድል ስራሕ መናእሰይ ይፈጠረልና፣ምልስ ሰራዊት ይጠናኸሩልና ክብሉ ኣገንዚቦም።  ብተወሳኺ ኣብ ካልኦት ከባብታት ፆታዊ ዓመፅ ዝበፅሐን ደቂ ኣንስትዮ ደገፍ እናተገበረለን ኣብ ዛላኣንበሳ ግን ኣይተሓገዛን፣ከም ካልኦት ከባብታት ምምዝባልና ዝገልፅ እኹል ሽፋን ሚድያ ኣይረኸብናን፣ኣብ ከተማ ፋፂ ዘሎ ኬላ  ጉምሩክ  ይለዓለልና፣ሰብኣዊ ሓገዝ ብኣግባቡ ናብ ሕብረተሰብ ኣይበፅሕን፣ኣብ ክራይ ኮይኑ ዝሰርሕ ዘሎ ምምሕዳር ከተማ ዛላኣንበሳ ግቡእ መንግስታዊ ግልጋሎት እናሃበና ስለ ዘይኮነ ዝምልከቶ ኣካል ፍታሕ ክናድየሎም ፀዊዖም።  ካብ ሕብረተሰብ ንዝቐረቡ ሕቶታት  መልሲ ዝሃቡ ዋና ኣማሓዳሪ ዞባ ምብራቕ ትግራይ ኣይተ ሰሎሞን ትኩእ ከም ዝገለፅዎ  ካብ ተመዛበልቲ እታ ከተማ ዝቐረቡ ሕቶታት ባይታ መሰረት ዝገበሩ ከምዝኾኑን ነቶም ዝፍጠሩ ፀገማት ንምእላይ ድማ ምምሕዳር እታ ዞባ ኣበርቲዑ ከምዝሰርሕ ኣረዲኦም።