يا محله الوداع ابهالمسيه     لاحضان المنيه بدموعه علي ايودع الزچيه ـــــــــــــــــــــــــــــــــــــــــــــــــــــــــــ علي الليله انصبغ شعره مثل نيته    او بجروحه يگابر طلع من بيته رايح يدفن ام بيته    بتراب المگابر كَالْعُرجُون محني طوله تاليته    الگبل مثل المناير حگه ظهره مايل     اجنازة عمره شايل ورايح بالظلام ايدفنه ضيه ـــــــــــــــــــــــــــــــــــــــــــــــــــــــــــ ثِـگُـل وزن الجنازه چنه ريشه ابريح    من گد ما نحيله وأعينوني عليها علي گام ايصيح    فرگتها ثگيله كل خطوه دمعته وگلبه منه يطيح    خلص سكته حيله بالفرگه الصميده    يرجف گلبه ويده اومچتوف ابحبل ذيچ الوصيه ــــــــــــــــــــــــــــــــــــــــــــــــــــــــــ ابشبگه ودمعه يگضي اوداع اليحبون    واخر نضره ذكره وعلي خايف ضلعها من يشبگه اشلون    لا يلچم العصره او كل ما حاول اعليها يصد لعيون    يلگه ابخدها سطره يحاچيها ابونينه    يگلها يالحنينه بسمار الضلع ياريته بيه ــــــــــــــــــــــــــــــــــــــــــــــــــــــــــ حفر بيده گبرها او ترجف الأيدين   يا شدة دفنها واتراب الگبر بلله ابدمع العين   من غمض جفنها وغفت وسط التراب اليغفه چان حسين    ليليه ابحضنها الچان يشم عطرها    ظل يشم گبرها ومن عطر الگبر يترس الرّية ــــــــــــــــــــــــــــــــــــــــــــــــــــــــــ يگلها ابلايه إيدچ بيش ارد للدار    غير انتي تجوتي ارجعي ابأذنچ اهمس چن صده وبغار    يرد اعليه صوتي ابدونچ روحي شمعه وليل فگدچ نار    شويه شويه موتي ياريت ابدفنتچ     مِـت ولا فرگتچ وا يضمنه گبر واحد سويه ــــــــــــــــــــــــــــــــــــــــــــــــــــــــــ رجع من الدفن محني اعله طوله اتراب    باقي من گبرها او طاح ابعتبتة من نظر حرگ الباب    واثر چف العصرها طب بيته ولگه زينب بديها احجاب    أمها البي عطرها وحسين ابدموعه    يلطمهن ضلوعه وبجروحه الحسن ناصب عزيه ــــــــــــــــــــــــــــــــــــــــــــــــــــــــــ جرحه چن مضيفه كل وكت مفتوح    او صعبه تطفه ناره وكل ما شاف بابه تهيج بي لِـ جروح ويُرمُق ذو فقاره وداخل روحه تلگه شوغة المذبوح    وعياله أساره من بعد الحبيبه    اتضل روحه غريبه او تبقه تنعصر كل مغربيه ــــــــــــــــــــــــــــــــــــــــــــــــــــــــــ - احمد عباس المياحي