لالَه خدا نومی نَه
🔵📝 #اشعار_تالشی #شاعران_تالش✍🏻 "شعر تالشی
تالٚشيمَه صاف و سادَه، بيريا
كو نَه هَمسادَهيمَه، دَريا نَه بٚرا
ويندَهمَه چَن صٚخبَه يا آفتاو پِرا
يا دیيَرمازون كييا كو سا دَرا
زٚندٚگيم تاريخی اَندازَه دٚراز
رَمزٚ رازَه، رَمزٚ رازَه، رَمزٚ راز
هَر وَرَق اَی كو طٚلا رَنگی مونٚه
خٚرگِتَه آفتاوی و مَنگی مونٚه
دولَه دَريا يَه، تونٚش پَيدا نييَه
آسٚمونَه، سٚردٚه نوئَه جا نييَه
سَربٚلَندي ثَبتَه ها كو خَط بٚه خَط
راستی ثَبتَه نیويشتَش نی غَلَط
وارٚش و آفتاوی نَه هَمساليمَه
اَملِكَه وا، دَس نِگٚنَه ياليمَه
صٚخبی نَه اِستيمَه دايیم هَمنَفَس
بازيمَه، مَندَهنيمَه هَرگٚز قَفَس
خاوي ماقِع سَر پِنَم كو زٚنگی سَر
خونٚه لَیلايی مٚه را دَريا ایوَر
شَخنَمی نَه ديم شوروم هَر صٚخبَهديم
وا مٚه را شونَه ژَنٚه هَر وَخت پِپيم
دَست و ديمِنٚم كَوَه دَريا بو دَه
گيريَه گٚلپِرمَه قَشَنگَه جا بو دَه
آفتاوی كورَه شيوار گَرميمَه اَز
دَستونَه آوازی شی نَرمیمَه اَز
كو شي مَنديمَه اييا اَز سَربٚلَند
هيچ كَسی داورٚم نِشا ژَندِه كَمَند
سَر نوئَمنی هيچ گٚلَه بيگونَه را
تِيمور و چَنگيز و هَر ديوونَه را
اَز بٚهاري نَه اييا گٚل كَردَمَه
باغي نَه پاييزی سيللَه هَردَمَه
دارَه ريشَن نَه اييا آو هَردَمَه
سَوزَه خالَن نَه اييا تاو هَردَمَه
تالٚشي یه تالٚشی چَمَن زٚوون
قَندی شی شيرینَه، آوي شي رَوون
قٚصَه و نَقل و اَساطير دارٚم اَز
«روستَم»ی و «لِدو بِه» وير دارٚم اَز
خونٚم اَز اٚم آو و اٚم خاكَه بٚرا
جان كَرٚم تالٚشی نومی را فٚدا
👤 شاعر:
#حسین_مرادی_کوره جان
🔮 #گروه_رسانه_اى_شاندرمن٢٠✅@Shanderman20