🕯️ Бүгүн биһиги табаарыспытын, бырааппытын, үөлээннээхпитин, Дьааҥы чулуу уоланын Вячеслав Вячеславович Слепцову тиһэх суолугар, дойдутун буорун булларар суолга атаарар курус күммүт тирээн кэллэ. Вячеслав чаҕылхай ыччат буолан, киһи быһыытынан үтүө, көнө санаатынан, сахалыы лоп-бааччы толкуйунан бар дьонун итэҕэлин, эрэлин ылан байыаннай дьайыыттан уоппускатыгар кэлэ сылдьан Адыаччы нэһилиэгин баһылыгынан талыллан таһарыылаахтык үлэлээн испитин биир дойдулаахтара бары билэ-көрө сылдьыбыппыт. Дойду бүттүүнүн үрдүнэн бүрүүкээн турар уустук балаһыанньаҕа буойун Вячеслав Слепцов талыллыбыт итэҕэллээх дуоһунаһыгар үлэлии хааларын ситиһэ, туруорса сатаабыппыт... Вячеслав Вячеславович Слепцов 20.03.1992 сыллааҕы төрүөх уол, мотострелковай батальон штурмовой взводун сүрүн ытааччытынан сулууспалыы сылдьан, дойдутун интэриэһин көмүскээһиҥҥэ Донецкай норуодунай өрөспүүбүлүкэ сиригэр-уотугар 2024 сыл ахсынньы 29 күнүгэр сырдык тыына быһынна. Доҕорбут Вячеслав ийэтигэр Анжелика Ильиничнаҕа, кэргэнигэр Нарыйаана Адреевнаҕа, оҕолоругар, аймах-билэ дьонугар дириҥ кутурҕаммын тиэрдэбин. Хорсун хоодуот санаалаах уолбут туһунан үтүө өйдөбүл үйэлэргэ өлбөөдүйбэтин, төрөөбүт дойдутун буора сылаас суорҕан буоллун. Дьааҥы улууһа улахан сүтүктэннэ. Аһыыгытын тэҥҥэ үллэстэбит. https://t.center/SergeySivtsevARKTIKA