قناة الشاعر سيد محسن الجابري

نزله لمولاتي الزهراء روحي فداها

من نور الزچيه  .. متروسات اديه
حبج يسري بيـه  .. يازهراء
########################
خدمتچ يم الحسن ماكو مثلها
حصراً الشيعة علي ربچ جعلها
ماتملنه الخدمه واحنه ما نملها
الخدمه عدنا اغله من هالدنيا كلها
الدنيا بينه تزغر  .. بس الخدمه تكبر
الخادم چنه منبر  ..  يازهراء
#########################
الخادم ابخدمتكم ايضل افتخاره
وبيكم ايعيش ابوجاها وابوقاره
واللي يعادينه يضل هوه وقراره
الله جاعل بينـه يافاطم شـراره
حبكم بينـه يلسع  .. نار الخدمه تنفع
فوك الهامه نـرفع  .. يازهراء
###########################
فاطـمه انتـي الشفاعه و الـوسيله
وانتي نور المصطفى وانتي الفضيله
كوثر الله ورحمته وانتي الجليله
شما نقدملج نحس كلش قليلـه
الكون بأسره مفجوع  .. بيج ويهمل ادموع 
ولجلج يكسر اضلوع ..  يازهراء
##############################
انتي يالصدرچ يسيع الكون بسره
انه حيل امقصر ومحتاج نـضره
ارضي عني عليج الهشموا صدره
الله يرضه لو رضت فاطمه الزهره
يرضه الله الرضاها .. وانعيش ابهواهه
يامحله ضواها  .. يازهراء
###############################
بعالمج بالزهره ارد اگضي حياتي
واحله شي ابمجلسج لو حل مماتي
كون اضل وياج حته اضمن نجاتي
انتي روحي ودنيتي وعايشه بذاتي
لبابج بيه كسره  .. وانتي بناري ادره
بگلبي باني حضره .. يازهراء
###############################
للأمام الحجه بالمجلس دعينه
الحضرة الغايب يزهره وفقينه
مقصرين هواي بس انتي حنينه 
كون من انصاره يمـه اتسجلينـه
يمته ايمرنه نوره  .. وانعيش ابحضوره
وگبرج هم نزوره  .. يازهراء

سيد محسن الجابري

نزال_لمولاتي_فاطمه

يازهراء .. يافاطمه
#####################
احنه تربات المجالس يم حسن وفايه
ما نحس بالدنيـا كلها نحس بس بقرايه
من بقاع الدنيا جينه وترف بينه الرايه
كلشي ماعدنه يزهره وانتي النه هوايه

دوم اعيش ابونـه .. وما اعيش ابمنه
انتي ام الجـنه .. يافاطمه
#######################
مصيبة الزهراء عظيم وفـاز ليواسيها
كون ذني عيوني دوم الخدمتج اعميها
الدمعه لو رادت تطيح اليـا وجه ننـطيها
وانتي بادرتـي بدمعنـه وكلتـي انه اشريها

يالخدمتج تسوه .. نارج اشكد حلوه
من رحتلج فدوه .. يافاطمه
#########################
للأمام الهادي جينه وبالمدامع نحـدي
والحسن ياخذ بدينه وصرنه مثل الجندي
شما يطول العمر بينه نرد بسمج نبـدي
لأرض سامره اجينه انواسي امام المهدي

بالضلع والحسره .. جينه ننعه الزهره
وتبقه بيـنه الكسره .. يافاطمه
##########################
العاشك الخانگته نارج ما يحس ابحالـه
واحنه يالزهراء بعـزائج كل وكت رحاله
اليموت ابدرب عشگج هذا الف هنياله
الخادم بوكت الشدايد تحجي بس افعاله

ما يحس بجروحه .. ودمعته مفضوحه
انتي صرتي بروحه .. يافاطمه
##########################
صرتي بس انتي حياتي والعمر ما اذكره
وبس الج تحله المدامع والج تجري العبره
اهلي ربوني اعلى حبج يم حسن عالفطره
وابد ما سموني بسمي كالوا ابن الزهـره

اسمج العلاني .. وبيج رافع شاني
جرحج الربـاني .. يافاطمه
##########################
ابد ما يبرد حزنه توج دوم الحرگه
لچن يالزهره الحزينه متنه من الفرگه
يمه من نذكر المهدي تضل بينه الشهگه
هم يجي يوم ونشوفه ونحضنـه ونشبگه

نقبـل ابرجلينه .. ونمسح ابچفينه
والنه تنـظر عينه .. يافاطمه ############################

#سيد_محسن_الجابري
#ونسألكم_الدعاء

عاشك الضامن

يضامن طلبتي طلبة خادم عاشك الدربك
خايف ينگضي عمري وما مشتم عطر كبرك
____
نخيتك والدمع بالعين يسولفلك على احوالي
يبو محمد دخيل اسمك رايـد ترئف ابـحالي
مقصر واعتذر منك واريدن نضره تبـرالي

يسلطان الكلب والروح
خاواني الحزن والنـوح
محلفك بالوكع مذبوح
رزقني زيارتك مولاي وخلينـي اشـم عطرك
_____
خليني اشم عطرك وانعـه ابحضرتـك واقره
اقره الزينب الكبرى وانـعه الفاطمه الزهره
ولحسينك اجر حسرات واجزع للوذر صدره

تحب اليجزع اعله حسين
وتـوزع دمـوع العـين
وتضمن راحـة الداريـن
لكلمن منچوي من الماي ويعطش لو ذكر نحرك
_____
من اذكر نحر جدك اهيج جرحك وجرحـي
واعيش ابوحشة العاشر وخايف ما يطر صبحي
دخيلك حصن احروفي وراقب فكرتـي وطـرحي

نخيتك والگلب ممرود
وادمـوع الليالي شهود
كـمل جزئي المفـقـود
بحسينك اريد اكمـل واريداً نضره من عطفك
_____
اريد اوصلك وبيدي اجيبن حـنة القاسـم
واجيبلك عطر وياي من گمر بنـي هاشـم
واسولفلك على العباس سوالف من كلب خادم

سوالف عبره والعبره
تخنگني من اشم گبره
عجيب الكافل ابأمره
اطبله من الحزن مخنوك واطلع منه بس اضحك
___
واجيبلك سلام وياي من حضرة علي الاكبر
ومن انصار ابو اليمه سلام بـنبرة المنـبر
واخلي جروحي بجروحك وبجروح النحر اكـبر

انه اول بشر طبعه
يفرح من يهل دمـعه
وحيل امكيف ابوضعه

خليني اعله هذا الحال وزيد شويه من دمعك
_____
محلفك يالرضا بموسى ذاك اليگضي كل حاجه
مـد اچفوفك الروحـي روحـي هوايـه محتـاجه
يتاج الهيبه ياسلطـان لبـس خـادمك تـاجـه

تـاجي الدمعه والفطره
منك بس ردت نظـره
بـلكت تفـرح الزهـره
من اتشوف ابنها الليل يخلصه بالبچي الجرحك
___
ختاماً يا انيس الروحي منك روحي محـرومه
لا تحرمني من عندك ومن اخـتك المعـصومه
اقبل دعـوتي ودمعي عليـك امـك المظلـومه

وعـد انذرلك اضلوعي
واطيح حيلي ودموعي
يـضامن هذا موضوعي
وبكـيفك بعد مولاي بـس رايـد اشم گبـرك

سيد محسن الجابري

#ميمر

اليوم السمه .. تذرف دمه .. تنعه اعله والد فاطمه
والعنكبوت البالغار يدمع حزن لزهره
~~~~
نادت الزهره مودع الله الغالي
عكبك صفه بس الحزن يبرالي
ريتك تشاهد بويه بعدك حالي

طگني ودفع بابي و طلع ومن عندي جن محسن وگع
ونيران يابويه هواي وشحجيلك اعله السطره
~~~~
خانوا وصيتك يالنبي وغدروها
ودار الوحي بعدك تره حركوها
وبتك يبويه العده حيل اذوها

الكون انعمه وسابع سمه بحكم السقيفه الضالمه
للعالم يريد الخير لبيت النبي يبث شره
~
أتكله بويه فدوه ارحم بنتك
ريت العمر يابوي يخلص بعدك
وياك اعيش وكون اموت ابلحدك

رغم المحن وجور الزمن كللها يا ام الحسن
انتي اول وحده تعيشين يمي وتطول النظره
~~
دمعت الزهره بهالخبر وبتشرت
بنفس الدقيقه ناحت وهم فرحت
فسريلي كلها عيونج المن دمعت

دمعي الترف وبابي الصلف ومصابك اهوايه كلف
براحه اشعر وياك وبدونك اهوه الحسره
~~~~
من ونة حسين الحجر ون وياه
والحسن بهروش الكلب ضل ينعاه
وزينب بعدها زغيره وتصيح اااه

سيل الدمع مثل الشمع وبحركه تلطم عالضلع
ما تطفه بضلوعي الاه وبكلبي وجت جمره
~~~~
الدنيا بعدك سيدي حزنانه
والعين من كد الدمع ذبلانه
والمهدي حاضر هم نحس ويانه

يبجي ويحن ينعه ويون ومخضر بكلبه الحزن
والمجلس يترسه ادموع ويواسي ذيج الحره
~~
سيد محسن الجابري

يا نبي الرحمه يا سر السمه
الدين عاش بأسم والدفاطمه
~~~~~~~~~~~
الدين عاش بأسم خاتم الانبياء
شكثر انطه اجروح واتحمل عناء
اليوم مفجوعه بمصابك هالسماء
والأرض حزنانه كلها ومضلمه
~~~~~~~~~
يالترف طبعك ولا مثله طبع
يا ثكلها جدامك الما تنسمع
يا سلاسة حجيك بنص الربع
زمرة الأحقاد ذيج الضالمه
~~~~~~~~~
خلصت ناس شكثر من الضلام
ناس جانت لا حلال ولا حرام
بيا مكان تروحله تخضر كلام
ايقضت ذيج العقول النائمه
~~~~~~~~
يالي شخصك بالوصف ما ينوصف
يالي خيرك فايض وكلك عطف
ابيتك القران خط اول حرف
وكمله بعدك علي حامي الحمه
~~~~~~~~
للفقير اتصير يالهادي وطن
واليتيم اتحسبه جن مثل الحسن
انطيت كلشي وثبت هالدين بعلن
وأسست بيت الكساء الفاطمه
~~~~~~~
فاطمه بعدك تره تبجي وتكول
بعد عمرك كون عمري مايطول
ضاجت الدنيا بدمع هاي البتول
وبنت بيت احزانها بحزن السمه


سيد محسن الجابري

من خلـصت   الزياره ما نشفت  العين
من طاحت المواكب اشتاگينه لحسين
     يا ابو علي مشكور عالخدمة
____
تذرف ادموعه .. الخادم ابـلوعه
من يفلشون الموكب يـرتعش كـله
دنيا ما تسوه .. وعشرتك حلـوه
حسين عيشني ابجروحك جرحك الاغله
عمري بس وياك اعيشنه بكرامه
ارزقني يحسين الزياره والخـدامه
الما يحس ابلذتك ايعيش ابندامه
مني اخذ كلشي وانطيني دمعات
يوميه يحسيني تخنگني حسرات 
   يا ابو علي مشكور عالخدمه
__
بگلبي احچيلك .. سيدي ادخيلك
قوي حيلي وياك لتخليني واهـم
اصعب ايامي .. تدري يالضامي
من اشوف الخادم ايودع ابخادم
جرحك امكبرني والسواني اسمك
وانه كل همي المجالس حته اخدمك
كـون اگضي العمر يابو سكينه يـمك
ما تخلص الخدمه حد گطع الانفاس
ولو بردت اجروحي يقويني عباس
    يا ابو علي مشكور  عالخدمه
__
شحجي والبيه .. كلش شويه
وانه شمقدملك ومنطيني كلشي
عندي بس انته .. والعمر سكته
كلها عايفها واريد ابدربك امشي
فدوه دليني الدروبك يامناي
والله يابو سكينه بس انته هواي
ياشمس كلبي اريدنك ضواي
ابضجت الدنيا تستوحش الروح
من اوصل الگبرك  اطيب الجروح
      يابو علي مشكور  عالخدمه
____
روحي متعوده .. ارزقني العوده
كل سنه خليني اخدم بالمواكب
خدمتك ديني .. فدوه خلـيني
اخدم ابزوارك وانتـه تـراقب
كلشي منك يختلف حته الجراح
من اتعب ابخدمة الزاير استراح
وياك يامحله يمولاي النـياح
يالملموا جسمك بذيج الحصيره
لتمينه بخيامك وصرنـه عشيـره
يا ابو علي مشكور  عالخدمه
_____
بأخر ايامك .. احجي كدامك
حچايه عندي واختصر بيها النهايه
والله احبنـك .. وما امـل منك
وبالختام النيـه هم نفس البـدايه
يالمتت ضامي لجل عين العبـاد
راح اضل ابثوبي ما ابدل السـواد
وكل حياتـي وياك اسويها حـداد
ما تبرد اجروحك والدمع عندي
من المهد يحسين لجيـة المهدي
   يا ابو علي مشكور  عالخدمه

#سيد_محسن_الجابري

ترويج( تيك توك)  حقيقي عراقي

1- مشاهدات
2- لايكات للمقطع
3- تسجيل اعجاب بالصفحة
4- رسائل
5- متابعين
للتواصل واتساب 07732320742
تلجرام
@ahmed_alziwar0

للأمام الحسن عليه السلام

شما نكتبك .. ما نوصفك
يالحسن بيك.. عاش طفك .. يامولاي يالحسن
##########################
للحسن .. بدموعي اسولف ما يلي
بالزمن .. ناصب ضريحه ابداخلي
بالمحن .. وكت الشدد واگف الي

مقصر الك انـه اعتذر مولاي سامحني
اسمك علي لمن يمر اهواي يجرحني
طيفك على رموش السهر يوميه ذابحني
اخفي عشگ گلب الجمر بس دمعي فاضحني

مـره اكتبك .. مـره اندبك
گلبي سولف .. صاح احبك
#############################
بالفضل .. لو نحچي انته اول علم
بالاصل .. صرت الوتد لهل الخيـم
بالفعـل .. ميت ويرموك ابسهم


شما نقره ببطون الكتب ما ينكشف دورك
گاموا يحرفون ابجهل عالا يضل طورك
رادو يطفوك العده بس عالي ضل نورك
رغم الظلم يالمجتبى مشيت دستورك

الما يعرفك .. ما يثمنك
كلشي بينه .. خيره منك
##############################
يالهرم .. علمك وسع كل الارض
بالكرم .. خيرك ولا لحظه يفض
موحرم .. نبني ضريحك بالنبض

صدر المحب من يختنك تتنفسه الريه
وضل اسمك ابگلبه يدك يـالحسن ليـليه
اليندبك وشايل جبل اتگلـه مگضيه
وتگضي الحوائج سيدي للمـاله ذريه

مـا ترده .. العده شده
خيرك هواي .. وهو وحده
##############################
بالعقل .. لو نقره عنك سيدي
نستدل .. بيك الشراره تبتدي
للـهزل .. چن ماي صاير للعبي

خطيت احرف من ذهب رغم الحكم ظالم
هيئة كلشي يالحسن لحسينك الـعالم
ولكل فرد صرت الهوه هم قائد وخادم
سمـوك وسفه سيدي بس عاشت الوادم

كِلـك ايثار .. بدرب الاحرار
بفضلك الناس .. تمشي زوار
############################
بالحرب .. ينقاس چفك چن رمح
بالدرب .. تطوي الارض ليل وصبح
بالگلب .. اخفيك يالـگلبك سمـح

لو بسمك الساني يهچ يرتاح دلالي
لو شفت حاتـم بالكرم اتمر على بالي
انته الضوه لهاي النفس مولاي والغالي
لو بيك انه اكـتب حـرف اي والله هنيالي

شگدر اكتب .. شگدر احسب
انته الـهواي .. واني مذنـب

سيد محسن الجابري

انوي العطش بالقصيده .. تلكه الكمر مدلك ايده
من جوده ينطي التـريده .. ويگلـك ابيـا هـله
يمحـزم الكربـله
_________
اعطش بدرب المراجل .. ولتفكر انته ابمقابل
وكت الضمه عدنه كافل .. من جوده يفتح نهر
خلي الضعن نص دليلك .. واتحزم وانطي حيلك
من رزقه يترس شليلك .. ويصير ماي وظهـر

شلت رايه .. وصرت ايه .. ودرس للماله .. تالي
اخـذ فكره .. بألم حسره .. بجرح عيش .. الليالي
تره الخدمه .. الك نعمه .. وتصير بحبه .. غالي

خط ابدموعك حكـايه .. تشرح احوال الضمايه
بدروبـه عيش السبايه .. ولا تمشي وي حرمله

يمحزم الكربـله
________
تمعن ابناتج خدمتك .. نعمه اشكبرها أجتـك
الكمر يمسح دمعتك .. والجرحك ايضل دوه
عيْش الخدمه ويه دمك .. واتصور المهدي يمك
واتخيل الزهره امـك .. واتشمها مثل الهوه

يدك كلبك .. قبل نبضك .. عشك للجرحه .. اخضر
يصير اسمك .. فخر وامك .. تشد ابعزمـك .. اكـثر
تطش عينك .. على اسنينك .. يهيل ابكلشي .. عمبر

ياعطر مسك المجالس .. بالـخدمه مالك منافس
حزمك بالخدمه عابس .. يم كلشي صوتك عله

يمحـزم الـكربـله
________
كل خطوه أتأنه بيها .. خيرك على الله وعليها
خل غايتك عد نبيها .. ويحصنك امن الذنب
اقصد نبيها الخدامه .. يعني الحسين الكرامه
من الزهره جتك علامه .. تلزم ابأيد المحـب

تمد ايدك .. يضل صيتك .. فقط بالـخدمه .. لابـد
ارض بسمك ..سمه تحبك .. تحس جن بيها .. كاعد
تره العاشك .. يضل شابك .. حلم بس كلبه .. بارد

ياعشك نغديله فدوه .. من منحرك كلنه نـروه
بـلا حبك احنه منسوه .. يـالصرت چن نافله

يـمحـزم الكربـله _________
شفنه بطريقك سوالف .. حيرت بيهـا المواقف
تنفتح كـل المضايـف .. ويعزب ابن الحسن
باجـر نعيش ابطفوفك .. ويموت كلمن يعوفك
بعـالم الجـنه نطـوفك .. واتصير الـنه الوطن

تصير النه .. صدك جنه .. ونحسك كلشي .. بينه
يـماي انته ..العطش سكته .. ضمه وبيك .. ارتوينه
يـسر اللـه .. ودرب اللـه .. وعشك الله .. ونبينه

بمأتمك تحله المنيـه .. يابو سُكينه ورقيه
عمري الك كـله هديـه .. يالتشـبه البسمله

يمحـزم الكربـله
________
بالمشي اتنور ضلامـك .. كل خطوه احجي ويه امامك
من صدره طلع سهـامك .. واتحسه يمك يـون
حاضر الحجه ويجيلك .. وبالخطوه ثـق يندعيـلك
يصبح المـهدي دليلك .. ويخلـي كلـبك يحـن

قذف نوره .. بأسم سوره .. بكلب كل خادم .. ابيض
تصد اكثـر .. ترى الكوثـر .. تون للصدره .. منـرض
منـو اليسمع .. جرح ينفع.. منوه الثاري .. ينهض

البكلشي يخدم امامه .. يتفاخـر بهالخـدامه
ويضمن ناجاة القيامه .. الماشي بسبي القافله

يمحـزم الـكربـلـه
___________
بكـل رايه خطينه ايـه .. نختصر بيهـا النهـايه
غايـتنا نفـس البدايه .. انواسي ضيم اليسر
ايـتنا چلـمه وقلـيله .. بس بوزنها ثـكيله
لا مـانعوف العقيـله .. نحچيها طول العمر

نضل ننحب .. بسم زينب .. نصير اعليها .. خيمه
الجرح خلـه .. حزن رملـه .. يعيش ويانه .. ضيمه
رقيـه النـه .. وتـرد سكنه .. اميـره وماكوا .. هيمه

بالمختصر يمشي بيـنه .. جرح العقيله الحزينه
والمعترض عن حچينه .. يتگيـد ابسنسلـه

يمحـزم الكربـله

سيد محسن الجابري

حياهم الغياره .. قد قامت الزياره
حسين حسين .. يااباعبدالله
#######################
بده وكت الاخيام .. بزياره العالميه
تحضروا يخدام .. وسروها الزچيه
ولا يهمكـم الغير .. قضيتنا قضيه

ترف رايه ندك ثايه .. تصير الدنيا مشايه
نحزم كلشي بينه .. نسير ويه السفينه
خدم تكثر.. خدم تكبر .. خدم للخدمه تتنطر
ولا همهـم عدونه .. الخدامه امنه وابونه

نسد عين الضوه .. نهب مثل الهوه
نرف ويه اللوه .. لبن حامي الحمه

خطينه هـالعباره .. قد قامت الزياره
حسين حسين .. يااباعبدالله
##########################
خبار عاجل وهام .. للحشود الشريفه
ورد مـن الخـيام .. للگلوب النظيفه
اجت هاي الافواج.. بالصفوف المخيفه

مطر تنزل دمع تهمل .. ابد ما يتعب المجبل
يحس ابمشيه راحه .. نطيـب كـل جراحه
نشد عزمه نحب جدمه .. نقدم كلشي للخدمه
البعيد ايحسها داره .. بفضل هـاي الزيـاره

ولا يحس ابغـرب .. نحطه بنص گلب
ونسهـله الـدرب .. يفيض امن الضمه
كل زاير وقراره .. قد قامت الزياره
############################
نهر نمشي عالگاع .. لجل عين العقيله
كرم عدنـه معروف .. مواكبنه اصيله
بطبق ننطي الاروح .. نحس كلش قليله

ابو الموكب ولا يحسب .. نشوف الشايب معزب
يشيل السفره بيـده .. لأن عنـده عقيده
خدم تحضر لبو الاكبر .. من البصره الى المنحر
زحف تمشي ابهيامه .. نهـر يجري الخيامه

نلوذ ابكل عشگ .. بخدمتك نحتـرگ
گلب حبنه يدگ .. الك يبن السمه

ماتطفه هـالشراره .. قد قامت الزياره
###############################

اجه موسم الخير .. يمولاي ابسلامه
نطوفك مثل طير .. نخدمك للقيامـه
البقه ابيته مازار .. يموت من الندامه

الك كلشي الك اي شي .. الجدم لو ما الك تمشي
اكص جدمي وازورك .. زحف وبگلبي نورك
فخر حبك فخر درب .. فخر لو اندفن گربك
واعيش ابكل جروحك .. واموت ويمي روحك

اعيش ابنظرتك .. واموت ابخدمتك
واضل ابخيمتك .. يمهجت فاطمه

ابگلبي هـالمناره .. قد قامت الزياره

#############################
بدرب نهج الحسين .. نشوف احنه العجايب
طفل يخدم وشاب .. ويعزب حته شايب
بخيم نترس الگاع .. نخضرلك مواكب

السمه تندب ارض تحسب .. الامام الحجه المعزب
يضل صاحب عزانه .. يرف بيـده لـوانه
گمر كافل نهر شايل .. امام الغيره ابو فاضل
يحـزم بيـنه زوده .. ويگويـنه ابزنـوده

امام المرجله .. الگمر نستقبله
يجينه وياهله .. ببن حامي الحمه

نعيش ابـوقاره .. قد قامت الزياره

##############################


#سيد_محسن_الجابري

‏مقطع صوتي من محس الجابري

من طاحو زلمنه وخلص العاشر
شتعلت بيه نار الـهيمه والحافـر

للزغار .. اركض واعثـر والحجار .. عليه يتشمر

اه يروحي .. اه يروحي
______
من طفت خيمتنا والكل طايـحه
بيـه نـار الهضم نـصبت فـاتحه
واليعزينـي يجينـي ابـنايـحه
التعزيه ارمـاح وسهـام الجـارحه

واللـيل اليـجيني ايــزيد ابنـوحي
من غير الحاجي الما ينحجي بروحي

والعيال .. ويـايه مفجوعـه
والحبال .. بيدي مطـبوعـه

اه يروحي اه يروحي
_______
كـل شـراره بگلبـي تحرك بيـه
شحچي وهواي السوالف هيه
بجال عزكم چنت انه مـحميه
هسه سـموني الخلك مسبيه

بيد اشگف ضربهم بيد ادورهـن
والراحن يـخويه شلون ارجعهن

بالرماح .. يدفع الخايـن
والصياح .. يعله ويـاهن اه يروحي اه يروحي
________
ولسبي ياخويه من مشونـه
بـكل درابين العـرف فـرونـه
ابـاب ساعات القهر وگفونه
وزينوها الشـام من دخـلونه

وارد اسئل سؤال وعوف المـلاگه
شيخلـص طـريق الشام بالـناگه

والجواب .. شفته بعيـونك
بالعتـاب .. لا يأذونـك اه يروحي اه يروحي
________
الخطوه امشيهـا ابمنيه وعاشر
يعني كل خطوه احس بـالحافر
يـومي ما يخلص يضـل امناطر
ولو خلص يـومي شيخلص باجر

باچر تـكعد ارقيـه ابـواجيها
وتمـوت اللي منها اخذوا تراچيها

بالحساس .. شافت الوالد
وعـالراس .. يضرب الحاقد اه يروحي اه يروحي
______
خويه وابن زيـاد تخـزر عينه
وراد خـدامه تـصير اسكينـه
والله لـو موجود انتـه اتهينه
وما تخلـي واحد ايـحاجينـه

خويه المعذره خوما زدت هـمك
عذراً يـبو فاضل بـس احـبنك

بالظلوع .. جمرة اسنينك
والدموع .. هايه من عينك اه يروحي اه يروحي
________
سيد محسن الجابري

زينب حيرتج يايمه حيره
فوك امصيبتج اخذوج اسيره

هينه جروح الخيام ٠٠ شلون ابطبة الشام
________
بغيمه جيتج بالسمه.. انه امج فاطمه
المطرت عيوني عليكم بس مدامع
ترقبت اعظم حدث .. من العليله للجثث
شفت كلشي وياج بطفوف المواجع

اول اشموع الهواشم الاكبر بناره انطفه
وصاح يمه حسين ويلي بعد عالدنيا العفه

وصاحت ليله بالنبره العجيبه
زينب الاكبر منين انه اجيب

مخضب وجه الاسلام .. شلون ابطبة الشام
_______
تقربت يم الضعن .. شفت هم شبل الحسن
طايح اعله حسين وبأيده الوصيه
كله شلك بالحرب .. يبني ما تحمل ضرب
يكله حلوه وياك ياعمي الـمنيه

رمله تترقب طلعته وطشت ادموع العرس
وصل يابس للمخيم ويلي حاركته الشمس

كل النسوه من شافنه ناحت
واملاك العرش ويايه صاحت

مات ابعرسه جسام .. شلون ابطبة الشام
________
يمه يوجعني النهر .. طايح ابصفه الكمر
وصلت يمه وبالدموع اصبح حجينه
نايم ابراسه العمود .. بلايه ايد ولا خدود
وفـوك كـل الصار يـمه مـكطعينه

عينه مطفيه بسهمها وكتله عينك بيها دم
كلي خلي اتروح عيني يمه توجعني الخـيم

عركت كصته بلحظه وثواني
كلي مستحي من اسكينه اني

زينب عكبي متنام .. شلون ابطبة الشام
________
شهگه انفاسج جرح .. يمه جيتج بالذبح
جـية العطشان ملهوف اعله مايه
بالذبح شفت العجب .. كلشي بحسين انسلب
لچن الاصعب يمه من رحتوا سبايه

صعدوج ابنوك عرجه من تميل وياج اميل
وامسح ادموعج بديه واشد حيل ابني العليل

چن كسرة ضلع طيحة رقيه
وكل هذا الضرب حسيته بيه

وعشت وياج الالام .. شلون ابطبة الشام
_________
نار الخيام وجمر .. مو مثل ضيم اليسر
والله صعبه ابسوك فروج الشماته
هذا اليجمع حجر .. ذاكه يضحك عالنحر
الاخر ايسب بـ علي ويضرب بناتـه

يمه والحد ماوصلتي الشام شوفوج القهر
من التعب الاطفال نامو ونايم ابعينج كـمر

كل ما شافج ايون ابونينه
بس راس ويدمع من تجينه

يمه ودهرج اشضام .. شلون ابطبة الشام

سيد محسن الجابري

ياجسام .. ياجسام
ياجسام .. ياجسام
_____
جاسم العريس خط ابدمه احكام وعبر
جان ناصح لشباب ابدرب نار وبي خطر
فرزن الحاكم الضالم وانتمه لجيش النحر
كال لجل الدين افني بعمري واتكطع وذر

بعده ازغير عمر
لچن شـايل فـكر
كـال اجيب النصر

وارفع هـام .. ياجسام
_________
تعلمينه هواي منه والسوالف تنذكر
بين اعلينه الفوارق والحقائق والذكر
لازم الانسان يسعى ويفهم اسرار الصبر
كال ياناس المعاصي تصير حاجب بالعمر

صار مرجـع قـيم
عرسه صار بخيم
بوجه عمه انرسم

وجه اسلام .. ياجسام
_______
رغم زغره وجان يروي لشباب ابجوده
عبر خط الطف رسايل صار ينطي بزوده
سفرة القاسم جبيره وبالعلم ممدوده
ترقه يا شاب ابفكرته وصولته المشهوده

فكره ماچان ضمه
چان سـر ابـسمه
يسوه ابن فاطمه

نرفله اعلام .. ياجسام
________
شايل ابكلبه الوصيه وسيفه چان ابطوله
صاح قافل عالمنيه وامي هـم مسـؤؤله
كـله ياعمي دخيلك اني كـلي ارجـولـه
اليوم اوزع جسمي يمك وافرح بهلهوله

عشك الكلوب حرب
وانـي ارجع صعـب
لچلك اشبـع ضرب

بـلا ألـلام .. ياجسام
_________
كالوا ابعمر المراهق ينترك فترة زمـن
جاوب القاسم بسيفه وصار لضايع وطن
يبين العامل العابد وكت شدات ومـحن
واختبار الشاب قاسي وفاز بيه ابن الحسن

فـاز فكره التـرف
جـان شـابـع نـزف
شـاب بس يختلف

كله اسهام .. ياجسام
__________
عجنوا الحنه ابدمائه وصارت الزفه حرب
طـر الجيوش ابنزلته وانطوه ويـاه الدرب
عاشك المنحر وكله يـحله ويـاك الضـرب
كون بس انته الِترضه ويسهل الكلشي صعب

وياك كلشي شفت
بلا وجودك متت
بنص خيرك عشت

وبكل عام .. ياجسام

سيد محسن الجابري

غيرة كربله شايل .. نزل للحومه ابو فاضل
###########################
گمر وتنخه بحسين .. نذرها چفوفه والعين
مثال الخوه والدين .. ابن ذاك الفحل
نزل للحومه رواي .. يصير لخيمته فياي
شافوا گاصد الماي .. وقائدهم ختل

فر الجيش من ابعيد شافوا رايته الخضره
وابرجلي ايطخ الگاع وهـوه صاعد ابمهـره (بها روايه)
وجوه الناس من لمحوا بسرعه تغيرت صفره

فگره الفكر ايقاتل .. نزل للحومه ابو فاضل
#############################
شافو من برز صار .. تجدح عينه چن نار
ايده اتگـول فقـار .. وتطبر يمنتـه
بچفه خله طعنات .. عيشهـم مـعانـات
البرزله مات لو مات .. برمحه وطعنته

طر الجيش يسره ايمين خله الما شرد يگزل
من الخوف كلها تصيح دخيلك ياگمر شحمل
مو بس سيف لا ذرعان حته خزرتـه تـكتـل

حته الطف صبح مايل .. نزل للحومه ابو فاضل
##############################
كسرة حاجبه ارماح .. بيده يقبض ارواح
ليخطفه بعجل طاح .. وطاحت هيبته
نازل عـود عـالمـاي .. مـا نازلهم ابـراي
صار الكافل هـواي .. هـوه وجربتـه

من كل صوب ياخذ روس گام يموت بأمره
طش اجساد يم حسين مداهم مثـل سفره
من ايميل گلها اتميل منه وما تضل عشره

صيته للسمه واصـل .. نزل للحومه ابو فاضل
##############################
فلاح الحرب عـاد .. بسيفه يحصد اجساد
ضربه ابضربه تزداد .. واسبعهم وگع
نـار ابگلبـه وتـفور .. منهم خـاطف النور
چـنه سورة الطور .. ويشتد الوجع

غيمة خوف ترعد موت واحدهم طلع نبضه
ليفـگد ايـد لـو رجـلين هـذا يـاكبـر حضـه
بيهم صال والله وجال صارت كربله فرضه

عذاب الكافل ونازل .. نزل للحومه ابو فاضل
############################
حتـه ابـأخر انفاس .. خله بجربته احساس
محـله اچفوف عباس .. ويامحله الگمر
طعم بالماي موجود .. مـن نگعـها الزنـود
لجل الـگلبـه ممرود .. نذر چف ونضر

لجل حسين ڪلشي يهون گال وكلشي مادايم
كلـها اتهون يامولاي بـس كونـك تـضل سـالـم
خيـر الـناس و العبـاس يمـك يـنحسب خـادم

ليحبك ينحسب كامل .. نزل للحومه ابو فاضل

#سيد_محسن_الجابري