عشان كده لما فتح لي سيرة الزواج من أخته بدون تفكير وافقت ..ما فكرت إذا البت دي عايزاني أو أنا عايز شنو أصلًا .. وحتى لما كلمت أبوي ما إتوقعته أصلًا يدي الموضوع إهتمام بس فاجأني لما إتصل لعمي أحمد وأخد منو موعد وياهو هسي ماشين ليهم .. حاسي نفسي متوتر لأعلى درجة .. مودة رغم إنها بت عمي إلا إني ما متذكر ليها اي موقف .. ما كانت النوع البجي للناس ولو جات في مناسبة بتسلم من بعيد .. ونسبة لإني ما موطد علاقاتي بالأهل .. بعد سافرت علاقتي بيهم شبه إنتهت .. وصلنا ولقينا عمي وصلاح إستقبلونا وضيفونا .. شوية أنا وصلاح طلعنا عندهم محل ورا البيت كده عاملينه زي مشتل وببيعوا فيهو شتول .. قعدنا وسألته: _صلاح ممكن أعرف ليه لما قلت ليك عايز الاقي مودة في الجامعة رفضتا؟ =ما رفضتا بس هي أصلًا ما قاعدة تمشي الجامعة .. هسي أناديها ليك هنا وأقعد معاها إتفاهموا. _طيب ياريت تناديها عشان ضروري عايز أسمع منها كم حاجة. طلع مشى .. كنت حاسي بتوتر ما طبيعي .. لما جات داخلة تلقائيًا وقفت .. ما عرفت أمد يدي ولا تطلع ما بتصافح تحرجني .. أنا ما متذكر اخر مرة لاقيتا متين .. طلعني من تفكيري صوتا وهي بتقول: _السلام عليكم. =وعليكم السلام مودة كيفك؟ _كويسة الحمدلله. =إتفضلي. قعدت في الكرسي الكان قاعد فيه صلاح .. سحبت كرسيي بعدتو شوية وشلت الولاعة من صينية القهوة شكلو صلاح نساها .. حسيت بحرج من نظراتا المشمئزة بعد الموقف ده .. سكت شوية ولقيت نفسي بقول ليها: _قاعد أحاول أبطل تدخين وقللت شديد بس مرات بضطر أرجع ليو. =عادي. _عادي إني أدخن؟ =على الأقل إنت حر في إختياراتك. _ولو كانت سيئة؟ =إحساس إنو إنت اللي إخترتها بنفسك حيشفع ليك .. جرب تتجبر تعمل حاجة صدقني حتى لو كانت كويسة وقتها ما حتحس بقيمتا. _بتتكلمي من واقع تجربة ولا كلام ساي؟ سكتت وبدت تجهز ليو قهوة مدتا ليو وهي بتقول: =ما مهم. _بتقري ولا خلصتي؟ =لسة مشواري طويل. _في كم؟ =أنا هسي قلت قاعدة اقرا؟ _"بتوتر" .. ما لكن أ... =عندك مشكلة مع البنات البقروا برضو ولا شنو؟ _بالعكس وحيكون عندي مشكلة ليه؟ =وراثة يمكن. _فهمت صلاح عامل معاك كيس في موضوع القراية صح؟ =إنت لماح .. ولا هو حاكي ليك؟ _إنتِ شايفة شنو؟ =ما بحب أحكم على الناس. _مودة .. ممكن نتكلم في موضوع بخصنا الاتنين؟! =أكيد يا معتصم .. خير؟ _ بصراحة .. أنا كنت بفكر كتير قبل ما أتكلم معاك .. بس حسيت إن ده الوقت المناسب. ="صمت". _أنا ما عاوز أكون سبب ضغط عليك وجيت أسمع منك إنتي. =تسمع مني شنو !؟ _موافقة بي يا بت الناس ولالا ؟؟ =صراحة؟ _أيوة خليك صريحة. =أنا ما عايزة أعرس. #يُتبع. #على_الهامش: "بيديّ هاتين أبسط لكِ سجادة الزمن البارد -أيتها المرأة الوسيمة- وأدعوكِ للحياة بحرارة)) #نُودين_بِت_مِن_حُب. #ننس_تمدين.