حيدر تركي الكربلائي: مولد رسول الانسانيه . . . أعــيـاد .. مــيـلاد .. هــادينه هـاللــيــلـه --------------------------- يالله يطيور السمه . خل نـروح الفاطمه وعلي حماي الحمه انهنـيهم بينه شوگ وعاطفه . للحبيب المصطفى واجب العنده وفه ايوافيهم انرتل أيات الفرح . اويانه كلـمن مافرح ابـدنيـته لامـانجح جافيــهم الفرح كله انجسده . للرسول ابمـولده وكـل ربـيع انـجدده انراويــهم الحقاد .. الحساد .. تدريـنه هـاللــيــلـه --------------------------- الليله مولد مختلف . وفرحته ماتنوصف جازت احدود الوصف انــواره كلشي من نوره انبهر . ابوجها أيات وسور من ظهـر سيد البشر واسراره الدنيه صاحت ياهله . وصوت فرحتها اعتله تنتـظر كـل هالمله اخــباره نـزلت أيـه وراكـعه . امن السـماء الـسابعه رحــمة الله الـواسعه ومختاره وانفاس .. هالناس .. امتانـينه هـاللــيــلـه --------------------------- اويانه اجه روح القدس . بالولاده چن يحس گلبه فرحه منترس هنياله على جنحانه كتب . الفرح لامـو مستحب على كل مسلم وجب مرساله المصطفى حلـقة وصل . والــذي مــايحتـفل هـذا ماعنـده عـقل يبراله اليلعب ابراسه الجهل . انگله وبــلايه زعل هالجهل صوچ الاهل وافعاله والراد .. ينعاد .. يرضـينه هـاللــيــلـه --------------------------- الليله شلنه بالگمر . الهادي للدنيه ظهر خل يجي اويـانه النـطر محـبوبه اگـلوبنه ناخـذها اله . البالأشـواگ امحمله اعـليها كـون البـسمله مكـتوبه ابشوفته انكحل النظر . بحظرته يحله السهر الذي هالشوفه انتظر محسوبه الطاها كلنه ننتسب . وعلى ديـنه نـنحسب كـلمـن ابكـيفه يحب بـسلوبه الماذاب .. الماحاب .. يجفينه هـاللــيــلـه --------------------------- الامــلاك امـحـيره . لـزمـت ابــابـه ســره رايده بــس تـنــطره واليـــها نــاذره چانت نـذر . اتوضت وصلت شكر لمــن اشتمت عــطر غاليــها ابحبه كلها اتوشحت . انغمه عليها وماصحت من عبيده اصبحت تـاليــها آرق هوه امن النده . حقــهـا من اتمـجده بالمــهد هــوه وبــده ايحاچيها هالحال .. من گال .. عن دينه هـاللــيــلـه --------------------------- الـ (أمنه) الحور اعتنت . بالــولاده باركت ومدري ياسوره قرت يم راسه قل هوه مدري الحمد . وچـان بيديها ورد شمت اعطور المجد بنـفاسه المصطفى عطر الأمل . والـي ما يشتمه زل بالـطبع عنده خلل بحساسه والــورد جـايـب سـلام . لچن ماعنده كلام أنـحــنـاله بحـترام وبـــاســه مسرور .. من نور .. والـينه هـاللــيــلـه --------------------------- حيدر تركي الكربلائي