#زيارة_الأربعين مشـايه جينـه ننعـاه
درب المشي ما عفناه
وا حُسيناه وا حُسيناه
.............................
اذّن وصاح الوحي حلّت ايّام المشي
بكربــــلائه نلتقي يوم اربعينه
كل سنه بهذا الدرب. نمشي والمدمع يصب
للحُسين وكل گلب. هايج حنينه
شاب وزغير وكهل. كلها تمشي وتبتهل
للحُسين وتنقبل. من زائرينه
زواره نقســــــم بالله
درب المشي ما عفناه
وا حُسيناه وا حُسيناه
.............................
هذا درب البي عشگ. لبوالأكبر من صدگ
كل گلب بسمه يدگ. يقره الزياره
راحه مابي اي تعب والمشه بدربه انحسب
مثل ما ضحّه وهب. وعلن شعاره
ما يهمنه اي خطر. فدوه لحسين النحر
والعشگ مابي مفر. دمّه انتصاره
لا مو بدينه نهـــــــواه
درب المشي ما عفناه
وا حُسيناه وا حُسيناه
............................
وي مسير القافله. معتنين لكربله
نمشي مشايه اله. شبل الزچيه
نواسي زينب والحرم. من اجت تشكي الألم
تعثر ومدمعها دم. للغاضريه
تشكي لخوتها الجره. من خذوها ميسّرَه
عكب سبع الگنطره راحت سبيه
نشارك حزنها جينــاه
درب المشي ما عفناه
وا حُسيناه وا حُسيناه
............................
جينه نمشي عالعهد بالملايين العدد
نعتني من كل بلد. نوفي بعهدنه
هالزيارة تختلف بيها كل موكب هتف
خدمة الزاير شرف. ترفع مجدنه
والمواكب حاضره عالدرب متكاثره
تخدم بكل مقدره الهم شهدنه
هـذا الدرب عشگنــاه
درب المشي ما عفناه
وا حُسيناه وا حُسيناه
............................
لازم نأدي الفرض نطوي لحسين الارض
غصباً عله اليعترض. نوصل نزوره
حسين يدري بشيعته. ما تعوف زيارته
منّ نطب ابحضرته. نشتم عطوره
لا شك المهدي يجي. يوصل لجدّه مشي
نندعيله ونرتجي يقرب ظهوره
من يظهر المهدي وياه
درب المشي ما عفناه
وا حُسيناه وا حُسيناه
#سيد_زيد_الفحام________
