المشايه/نزال
حـــسـيـن طلعـت شيعــتك مشايـه
علـــعـهــد مــــولاي ألـك وفــايـــــه
=========================
طلـعــت الالاف طـلـعـت شـيـعـتــك
عالــيـه ومايـــوم طـاحــت رايـتـــك
تبقه شــامــــخ ياحُـسيـن وگــبـتــك
كعبه ويگـصـدونها
العالم يطـوفـونهـا
وعالـــيـه بدربك تِـظــل الـــرايـــــه
=========================
حسين ياثوره الجديده بكل سـنــه
حسين كل مابـــ الارض ليك اعتنه
حسين اسـمـك ربّـك ابـــــدر كوّنـه
اسمك بماي الذهــب
علعرش اسمك كتب
ومـيّـــزك رب الـســـمـــاء ابـهـايـه
=========================
يلطريجك يختلف عن كل طـريج
يعتنيك الگلبه بهمــومه يـضــيــج
كعبة احرار امتلت ارضك حجيج
يلطريجك صايـــر
كل شبر بي زايـــر
وكــــربلــه الكل الـعــوالــم أيـــه
=========================
الشايب بدربك مشه بكٓل همّـتـه
والطـفـل والشاب رفت رايــتــه
والنسه الخِـــدّر الدربك گصدتـه
شايب اطفال ونساء
والطريق الكــــربلاء
هــاي ثايـــه وما تطيح الثايــــه
=========================
والخدم متحزمه تخدم بالشمس
شما يقدم الخادم مقصر يحــس
يوم يوم الموكب اكبر من أمـس
تحسب ايام الخَدم
شباقي ليّام النِـعـم
مطي لحسين اليخدمه أحچايـه
=========================
زايرك يدلل اشــرايـــد يـصـيـــر
بدربك الزاير يـبــــو اليمّه أمـيـر
بلا حدوود ولا عُمر حتى الزغير
لجلك ايخدمــونـه
شرايد يقــدمـولـه
الغايه أنت حــسيـن هـيّـه الغايه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
✍️عباس مالك العفريت
#محرم_الحرام١٤٤٦هـنسألكم الدعاء
اللحن
👇
