Смотреть в Telegram
ياسين: كريم عاين الجوز ديل حاسدين غرامكم إنتَ ويوسف.
كريم: سينا .. إنت عايش بالله .. ليه ما قاعد أشوفك؟
ياسين: عااايش إتخيل بس.
كريم: عاش من شافك والله.
ياسين: الله يشوفك.
عزيز: يا شباب خلونا من السلام الحاجات دي راجياكم ياخ.
عثمان: قوموا يا جماعة نحن الله يخلينا لجنس ده.
يوسف: الله كريم يا صحبي.
بعد مسافة دخلنا الحاجات وناديت أمي تشوفهم وتشيك عليهم .. يداب كده حسيت همي زح.
______
"بـ لسان كريم"
رجعت من عزيز لقيت رونة وأمي قاعدات يتونسوا وأمي بتعمل ليها في شعرها .. سلمت عليهم وأمي سألتني:
_أها يا كيمو بقيتوا على شنو؟
=الحاج قال بعد الصلاة نمشي ليهم.
إتصلت للتيمان جوا إتغدينا وبعدها جهزنا للصلاة .. من المسجد أبوي قال لي هسي ندخل لناس نود طوالي وأفتح الموضوع مع أمها عشان تلمني مع أخوانا ونكون جاديين .. اول ما وصلنا أبوي وقف بعيد برة الدرابزين قال لي كلمم اول .. دقيت الباب ففتحت لي أمهم لما شافتني قالت:
_كريم المحاربنا كيفك يا ولدي؟
=معقولة أحاربكم يا خالتو سنية .. والله كويس إلا الجري بس.
_أدخل حصانك جراي يداب كبينا الشاي.
=معاي أبوي بسلم عليك .. كلمي البنات.
سمح أبقوا قدام لحدي ما أكلمم .. دخلت كلمت بناتا إتضايروا وأي وحدة شالت توبا .. نود شالت كبايتا وبسكويتتا ودخلت جوة.
=مرحب بيك يا أبو كريم إتفضل.
_حبابك يا أم البنات كيف حالك .. إن شاءالله طيبة؟
=بخير وعافية .. إتفضلوا قدام البيت بيتكم.
_البنيات كيفنهن بالله؟
=يا بنات عمكم محمد بسلم عليكم.
سلموا ليهو وسلموا لكريم من بعيد وفضلوهم .. وريف مشت جابت موية ومفاز جابت كبابي شاي من جوة .. فضلوا يعتذروا منهم إنو جوهم في وقت ما مناسب ..
_معليش يا أختي سنية جيناكم بالغفلة والوقت ما مناسب إلا ضروري الموضوع.
=أجي يا محمد أخوي وقت شنو الما مناسب .. البيت بيتكم والله حبابكم الف.
مفاز دخلت لـ نود:
_ما ماشة تسلمي؟
=شوية كده.
_بتتقلي على منو؟
=عاوزة أشرب شايني بمزاج أختيني.
_قولي خجلانة بس.
=موزة أختيني بالله ما ناقصاك.
_موزة في عينك ياخ ما تخربي لي اسمي.
=خلاص طيري من وشي.
_طايرة جيبي بسكويت لأنو البرة خلص.
=تلقيه في دولابي هناك.
_بس لو أعرف بتختي في دولابك بسكويت ليه؟
=عشان المواقف الزي دي.
_"ضحكت" .. يا الله تختني في مواقف زي دي عاجلًا أم أجلًا.
=سيبي الفارغة وأمشي الناس حارسينك.
شالت صندوقين بسكويت رويال وطلعت .. سنية كبت ليهم شاي لبن وضيفتهم وبقوا يتكلموا في مواضيع عامة .. عن الحلة والوضع العام بتاع البلد .. المناخ والطقس .. أيام زمان .. وما خلوا موضوع ما قالوا إلا الموضوع الجوا عشانو.
كريم شال تلفونو رسل ليها:
_البت بتاعتي.
=في عينك.
_طيب تعالي يا نن عيني .. لو نظرة بس أدينا.
=أبيييت .. إنت العزمك منو؟
_الزول ما عايز عزومة عشان يجي لنسابته لكن.
=كريم لو جاي براك أوكي .. بس أبوك جاي معاك ليه؟
_جاي يعقد العُقد التي لن تنحل.
=يعني كنت جادي قبيل وأنا الإفتكرتك بتهظر.
_أنا ما قاعد أهظر في مواضيع بتخصك.
=مواضيع لكن.
_ياخ تعالي في ملل حاصل .. أمك وأبوي شغالين يتكلموا في مواضيع من سنة حفرو البحر.
=أجي أسوي شنو؟
_تسوي شاي.
=ماما قصرت معاك؟
_خلاص تعالي جيبي بسكويتة .. يا بسكويتة إنتٍ.
=كريم إنت جبتو لي ولا ليك؟
_ما نحن واحد يا حبي.
أبيت أطلع لما عم محمد رسل لي .. مشيت وقفت جنب ماما سلمت عليو ونكرت كريم حطب .. كانوا طالعين أصلًا قدمناهم للباب ورجعنا .. ماما قالت لي:
_حتصل لبكري أخوي أكلمو خليك قريبة لو قال داير يسألك حاجة بديك تتكلمي معاه.
=يا ماما لا تسألوني لا حاجتين .. أعملوا العايزين تعملوه المهم ما تدخلوني في قصصكم دي.
دخلت غرفتا وسامعاها بتتكلم بالتلفون مع خالو بكري بعد سلمت ليو وكده الشمار حرقني جيت قعدت جنبها وفتحت الإسبيكر .. لما فتحت الموضوع وكلمته قال ليها:
_يعني أديتي الغريب وولدنا رفضتيه؟
=أنا ما أديت القسمة أدتو.
_سمح يا سنية .. في النهاية ديل بناتك وإنتِ البتعرفي مصلحتهن أكتر مننا.
=العفو يا بكري أخوي .. أنا ما كان قصدي..
_أبشري يا أختي خليهم يجوا أديهم عنواني والمبدية متمومة.
قفل منها اول كلمة قالتا لي:
_بعد كده انا الموضوع طلع من يدي أدي كريم رقم خالك وبتعرفي خوالك كويس لف ودوران ما عندهم والبقت في لين بسبب مشاكل الخطوبة ما بكرروها .. شدي حيلك وأجهزي.
=ماما إنتِ بتخوفيني ليه؟
_عشان ما تقولي ما وريتك.
=اووف كله من كريم ده يصبر لي.
____
"بـ لسان معتصم"
لبست قميصي ورشيت عطر خفيف وطلعت لقيت أبوي جاهز وأمي دعت لينا قدمتنا للباب ورجعت .. أنا ذاتي مستغرب حاسي بشعور غريب اول مرة أحسه .. من فترة طويلة وعلاقتي متوترة مع كل الحوالي .. يمكن الشخص الوحيد الفضل واقف جنبي ومعاي هو صلاح ..
Love Center
Бот для знакомств