Смотреть в Telegram
="ضحكت" .. حكلم ليك ننا.
_ما حيكون فارق معاها كرهي ده .. المهم شفت حاجة غريبة وقتها.
=يا ولي الصابرين .. أها وبعدين؟
_ما تتزاهجي يا زولة هسي ما بحكي.
=طيب شُفت شنو يا أب عيون عسلية إنتَ؟
_ما تتغزلي يا زولة هسي ما بحكي.
=كريم خليو معاك سمح.
_شنو هو؟
=الموضوع العايز تحكيه.
_خلاص حأكشح العشا.
المهم اليوم داك أنا كنت زهجان طبعًا وقافلة معاي وكارهكم كلكم .. مشيت قعدت وشربت قهوة بكل القروش المعاي .. ولانو يوم الجمعة خلصت بدري ولمت حاجاتا وأنا فضلت مكاني .. بعدين هي مشت بيتا وأنا مشيت على الظلط عسى ولعل أشوفك لو جيتي ولا لسة .. لما زهجت جيت راجع شايفا طالعة من بيتا "سكت".
="ضحكت بصوت هادي" .. كريم ما تقول لي جبتني عشان توريني إنك كنت كارهني وكاره المعاي وشربت 10 كبابي قهوة بكل قروشك؟
_لأ يا نود .. شفتها طالعة بنقاب.
=وإنتَ عرفتها كيف وهي منقبة؟
_ياخ أنا بحب لي وحدة غبية كده ليه .. ما هي عايشة براها طبيعي تكون دي هي الطلعت من بيتا وقفلتو بالمفتاح ولا محتاجة دليل تاني.
=طيب لنفترض إنك عرفتها بنقابا .. أها كمل.
_المهم حسيت في شي غلط تبعتها.
=عيب.
_بتاع عينك.
="ضحكت" .. خلاص كمل.
_المهم ركبت المواصلات.
=بس كده؟
_لو صبر القاتل لمات المقتول وحده.
=يعني شنو؟
_يعني أصبري أتم ليك.
=طيب تِم.
_المهم اليوم داك ما قدرت أنوم ما بسببك عشان ما تفرحي ساي.
="ضحكت" .. أي بسبب الخالة زينب الشاغلة بالك.
_حصل .. وتاني بقيت أراقبا لحدي ما يوم تبعتها محل بتمشي ده وما عايز أصدمك وأقول ليك مشت بيت المساكين.
="بمفاجأة" .. يعني الشخصية دي عندها علاقة بـ سر بيت المساكين.
_للأسف يا نود.
=كريم الموضوع ده خطير.
_إنتِ الورطينا فيهو.
=كريم إنتْ معاي صح؟
_معاك لأخر يوم في عمري.
_____
"بـ لسان عزيز"
صحيت بدري كالعادة طبعاً شربت مع أمي ونتالي الشاي وكنا بنتناقش في تفاصيل اليوم الفات والحيحصل بعد كده .. بعد ياسين طلع سمعت صوت الباب قلت يكون هو نسى حاجة مشيت وفتحته لقيتا حبوبة السُرة .. إنبسطت شديد لما شفتها:
_يا حبوبة ياخي عاش من شافك والله مشتاقين.
=عزيز يا ولدي .. بالحيل والله.
مسكتها من يدها .. قالدتني بحنية شديدة وهي بتقول:
=والله يا ولدي مما سمعت بالخبر السمح ده قلت إلا أجي أحصلك قبل تمرق شغلك .. ختبت ست الناس يا ولدي .. مبروكة عليك.
_"ابتسم" زيما بقولو يا حبوبة شحدت الله والله أداني ننا الحمد لله رب العالمين.
=هي يا يمة إت ذاتك يا ود أحمد ماك هين .. راجل والرجالة عندك وقفت إن شاء الله الف مبروووك وربنا يسعدكم ويهنيكم .. ننا ماشاء الله رايقة وسميحة وإت رايق وعاقل يا ولدي ربنا يسعدكم ويهنيكم.
حبوبة لما قالت كلماتها دي حسيت العالم كله واقف ببارك لي .. حبوبة السرة دي عشنا معاها أكتر من حبوباتنا الحقيقيات فكونها تشيل رجلها وتتعب روحها عشان تصلني وتباركني ده عندي بالدنيا كلها والله.
_كتر خيرك يا حبوبة وأنا المفروض أجيك والله لحدي عندك وإنتٍ ما تتعبي لي.
=بري والله عريسنا يتعبو ليو .. ورجلي ما تغلى عشانك .. ومن هسة دي حنتك علي و في بيتي فاهم ولالا يا ولد ؟؟
_كده كتير والله يا حبوبة.
=ود متين آت هو .. أسكت ساااكت وخليني .. فاطمة قاعدة مش كدي؟؟
_ايوة بتلقيها في العريشة.
=خلاص أبقى مارق على شغلك الله يوسعا عليك ويرزقك يا عشا البايتات.
طلعت من البيت وإتصلت لـ ننا .. اول ما فتحت الخط قل:ت
_ننا
=يا عِزو .. إزيك حبيبي.
_حبييك مبلول بس دعواتك.
=معاك معاك والله.
_أسمعيني .. أمي حتجي عليكم بعد شوية كده.
=تشرف والله.
_ننا العرس قرب وأنا صراحه ما عاوز شي ينقص ليك فهمتي .. عاوزك جاهزة بي كله ؟؟
=جاهزة كيف يعني !؟ عاوزني أعمل شنو كده قول.
_عاوزك تستلمي القروش من أمي وتمشي السوق تظبطي أموري كلها شيلتك تفاصيلك كلها بالله تكون جاهزة ولو في شي نقص تكلميني
=عزيز ده شنو هو !؟ ما عاوزة أشتري حاجات كتيرة أصلًا وبعدين ليه الموضوع بقى جادي كده أنا خفتَ.
_يا بت إنتي قايلاني بهظر معاك ولا قعدتي مع الرجال ما أقنعتك ؟؟
=ما قصدي ياخ .. بس يعني الميزانية وإنت...
_"قاطعتها" ميزانية شنو! ما عندك شغلة بشي .. أنا عاوزك تختاري اي شي بعجبك زيك زي البنات يا ستهم.
=خلاص نتفق العرس يكون بسيط شديد وتفاصيله بسيطة.
_بسيط كيف وأنا معرس الصحفية إيناس تمدين بحالا؟
=حنّاااااك بس برضو ما أقنعتني.
_ياااخ خلاص بسيط بسيط قايلة روحك متزوجه أسامة داؤود .. ما ياني زاتي الكحيان.
=ما تنفعل الله!
_أسمعي الكلام أول
=سمعاً وطاعة .. يلا أمشي ياخ.
_"ضحك" .. أنا بس راجي اليوم اللي تقولي لي فيهو أمشي وأقول ليك أمشي وين من بيتي .. وقتها أشوفك حتعملي شنو.
=وقتها حأغيير الجملة لـ ما تمشي.
____
"بـ لسان ننا"
بعد المكالمة صحصحت وشربت الشاي .. أثناء ما بنضف جاتني نتالي ماشة المدرسة قالت لي:
Love Center
Бот для знакомств