🌼مقتطفات ولائية🌼

#بس_انه_مو_دعبل

اعله گد اِلحاف شعري أمد رجل
عليّه الشطر الاول و انت اللي اتكمّل ..

او بعد ما أدري تقبل هالقصيده اشلون
أهُـو إنته الرضا بس آنا مو دِعبل ..!

اشويعر جيتك ابطرْگ الشعر مولاي
ابقصيده اململمه او ابياتها اتفشّل ..

رغم ماهي ابمقامك لاچن ادري ابهاي
الكريم اشما تگول ابمدحه يستقبل ..

أنا لْوجه الله كاتب و انته وجه الله
لا ريد الجزاء او لاني متأمِّـل ..

بس عيني اعله ثوبك منّه رايد خيط
علگ بزنودي اشدّه او للحشر ميْـفِـل ..

و أقنّع بيه منكر من يريد اجواب
أو أمان ايصير ليّه ابگبري من أنزِل ..

او جواب المنهو ربّك من نبيّك چان
أخلي الخيط يحچي ابدالي مسترسِل ..

ما أمدح صفاتك لا بعدني ابهاي
أنا ابهيبة ردائك عقلي متعطِّل ..

من اخيوط الشمس لو ريش جبرائيل
من ياهو اللي بيهن ثوبك اتفصّل .. ؟!

تنفُض جُبِّتك , منها ثواب ايطيح
ابسِـدِّ اِعبايتك , يمكِن مَـلَك يختِل ..

دخيل اعمامتك صارت صلاة الليل
إذا تجبِل عليها النافله اتهلهِل ..

ترِس طولك قداسه امن الجدَم للراس
او حتى اِغبار خُفَّك مصحف ايْرتِّل .. !

خلق الاملاك ربنه للرزق , للريح
او خلق مجموعه بس ابُّردِتَـك تِغزِل ..

( يسلطان الوجود ) .. الكِل إلك يحتاج
يناموس السمه المستغني عن الكِل ..

إذا بيك احچي آيات او سوَر شيْـزيـد ؟
و إذا ما جيب طاري ابمدحتك شيْـقِـل .. ؟

مثل طير الإجه او منگاره شايل ماي
او يگطّر عالبحر متگلي شيبلل .. ؟!

إجيتك عيني صحره او إنته وجهك غيث
يغيمة مَـي ورِد و اعله البشر تهطِل ..

او صحت لله يا مُحسن و أدگ الباب
اعله مدّة إيدك اشما تنطي متفضّل ..

و إذا ترسل قليلك هم أحسبه اِهواي
لأن قيمة الشيء ابقيمة الـمُرسِل ..

او يحسدوني البشر قالوا عِدِل كل بيت
بيت ابجنّة الله ابشعرك اتحصِّل ..

و أنا القانع ابمُلحق حتى لو إيجار
ابشرط بالجنّه يم أم الحسن أنزِل .. !
--
الميرزا عادل أشكناني
مشهد المقدّسة