يعني "يرزقه من حيث لا يحتسب" حاجة كده مفاجأة ليك، رزق يجي من مكان ماكنتش متوقعه ولا عامل حسابه. وده مش لأي حد، لكن للي بيتقي ربنا. الآية بتقول: "وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ". التقوى معناها إنك بتسعى بكل الأسباب اللي تؤدي للرزق، حتى لو النتايج مش زي ما كنت متخيل، لكن ربنا وعدك إنك هتلاقي مخرج ورزق من مكان مش في بالك. الموضوع مش سهل، لإن التقوى محتاجة جهاد وصبر ومقاومة للأهواء. أما لو انتقلنا للمرحلة الأعلى، اللي هي التوكل التام على ربنا، فهنا الموضوع مختلف تمامًا. الآية بتقول: "وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ". لما توكلك يكون كامل، بتحس بطمأنينة في كل تفاصيل حياتك، لأن أمرك بقى كله في إيدين ربنا. وفي النهاية، صلوا على النبي ﷺ.