أحياناً بتمر علينا اوقات بنكون فيها كئيبين عصبيين مابنسمع كﻻم زول وكﻻمنا جارح مع كل الناس حتى أقرب الناس لينا مع انو ما ليهم سبب في الحاصل لينا دا .مابنكون قاصدين نزعلهم ونسمعهم كﻻم هم في غنى عنو .
بنجرح ناس وبنكسر خاطرهم والناس ديل قد نكون نحنا الوحيدين الفضلنا ليهم او كل حاجه بالنسبه ليهم واتخيلو بعصبيتنا وطريقة كﻻمنا حيكون شعورهم كيف ؟
حيقولو دا مالو بقينا ما مالين عينو، فينا حاجه ناقصه ، لقى ناس غيرنا؟
مستحيل زولنا دا مايكون عندو سبب وحتى السبب دا ﻻ قالو لينا و ﻻ ادانا فرصه نعرفو.
بقسوتك وكﻻمك ماكلهم حيفهموك ويقولو يمكن ماري بأيام صعبه ايام وبتعدي ويعذروك. حتلقى ناس لغوك من حياتهم وناس غيرو طريقتهم معاك مع انو انت ماكدا وﻻ قصدك تعمل وتكون في نظرهم كدا بس ظروفك مابتسمح ليك تكون زي ماهم عايزين.
ولمن يجي الوقت وتقرر انك تشرح ليهم ظروفك وتعتذر حتلقى ناس فاهمنك وعاذرنك وناس حيقولو ليك مامشكله اصﻻ ماكانت من عوايدك وناس ماحتلقاهم أصلا.
حتلقى نفسك خسرت ناس كنت محتاجهم في حياتك بس ﻻ هم فهموك وﻻ انت بررت ليهم الحصل ليك في الوقت المناسب.
#كلنا بتحصل لينا ظروف غصباً عننا بتخلينا نتصرف تصرفات ونقول كﻻم مابيرضى الحولينا وبنلقى نفسنا خسرنا أعز الناس لينا ماكنا عايزين كدا بس الظروف جبرتنا.
#وﻻنو الكﻻم وقت يتقال ويتفهم صعب يتغير ؛ اوزن كﻻمك و جملو قبل مايطلع.
#الســـــــــــلطان
