Мансур ЖУМАЕВ шеърлари

#nazm

★ ★ ★

O‘zimni unutib, chorladim seni,
bilmadim bu dunyo o‘ngimmi-hushim?
Azizam, kel, menga eslatgin meni,
azizam, kel, meni yodimga tushir.

Ko‘nglim siniqlarin ko‘zimdan tergin,
og‘riqlarim aytib qo‘rqit, uchuntir;
azizam, kel, meni izohlab bergin,
azizam, kel, meni tushuntir!

Azizam, kel faqat, kelsang bas, tamom,
bus-butun egallab ol borlig‘imni:
bir sen isbotlashing mumkindir
hamon
bu dunyoda men borligimni.

✍ Mansur Jumayev
🎤 Erkin Bozorov

Yoshlikjurnali.uz
@yoshlikjurnali

СИНТАКТИК ПАРАЛЛЕЛЛАР

Паймон топилади бир кунмас-бир кун,
Дармон топилади бир кунмас-бир кун.
Бир кунмас-бир куни дарё бўларсан,
Уммон топилади бир кунмас-бир кун.

Ҳаёт икки юзи икки хил танга,
Икки юзини ҳам кўрсатса санга,
Бир кунмас-бир куни кирарсан жангга,
Майдон топилади бир кунмас-бир кун.

Балки, япроқ бўлиб йўлга қўнарсан,
Балки, ёғин бўлиб чўлга қўнарсан,
Бир кунмас-бир куни ерга дўнарсан,
Деҳқон топилади бир кунмас-бир кун.

Битта боғ бағрида донасан, маъқул,
Доналик ҳолингдан тонасан, маъқул,
Бир кунмас-бир куни гул бўласан, гул,
Гулдон топилади бир кунмас-бир кун.

Бир кун ҳар елка ҳам етармиш кунга,
Сепмасанг бас экан донингни кулга,
Бир кунмас-бир куни омадинг кулгай,
Имкон топилади бир кунмас-бир кун.

Кўнглинг кулбасидан кетмаса иймон,
Кипригинг учида қалқиса виждон,
Бир кунмас-бир куни бўлолсанг инсон,
Инсон топилади бир кунмас-бир кун.

Унут ўйларингга ҳаёт ҳам битгай,
Ҳаёт муҳаббатга сабот ҳам битгай,
Бир кунмас-бир куни қанот ҳам битгай,
Осмон топилади бир кунмас-бир кун.
Мансур Жумаев

​​ҲАПҚИРИҚ

               Дўстим Мансур
              Жумаев хотирасига

Шошма, вақт, дуосиз ўзгармас тақдир!
Кўз — сувга олинган, хаёлим — гилда.
Тўхта! Дўстим қолиб кетмоқда, ахир.
Икки минг
             йигирма
                           тўртинчи
                                          йилда.


@Alibek_Anvariy


ИЗОҲ:  Мазкур сурат 2024 йил, 5 июн куни Андижон шаҳрида олинган. Ўшанда Мансуржон бир автобус йигит-қизга бош бўлиб аллақандай издиҳомга келган экан. Водийнинг бир шаҳрида эканимиз маълум бўлгач кўришамизга тушдик. Ҳамроҳим — шоир Нурмуҳаммад Азиз — рўлда, икков шошиб кетяпмиз... Ҳилла улгурдик. Мансуржон ўт олиб, жўнашга ҳозир автобусдан тезда тушиб, қулочларини кенг ёйиб, бағрини очиб биз томон юриб келди... Дўстимни бағримга босарканман, автобус деразаларидан бизга қараб турган нигоҳларга бир-бир кўзим тушаркан: "Тез кетинг! Шунча олам кутиб турибди!", — дедим. Тезда ҳол-аҳвол сўрашдик. Орқайин кўришишни ният қилдик. Шу орада одатимга зид равишда ўзимизни суратга ҳам олдим негадир. Ҳаммаси кўз очиб-юмгунча содир бўлди... Ўшанда Мансуржон билан сўнгги марта кўришиб турганимизни билмас эдик...

Mansur Jumayev haqida...


Sitora Naimjonova, rahmat sizga! Ijodingiz gullayversin.❤️

* * *
Имтиҳон муддати тугаб бўлган тоб,
Топилган сингари энг тўғри жавоб;

Ота уй дарчасин ёпганинг чоғи,
Сезгандек қанчалар кенгдир қучоғи;

Мусофир тошларга кетгач туртиниб,
Бус-бутун туйгандек туққан юртини;

Чалғисин елкалаб келганда ажал,
Банданинг ёдига тушгандек амал;

Видо қўнғироғи чалинганда, чол
Яшашдан муродин англаган мисол;

Кузга кирганида биз кезинган боғ,
Ногоҳ сезиб қолдим хайрлашар чоғ:

Зулайҳо ичмаган савган эканман,
Мен сени... мен Сени севган эканман!

7 август 2023 йил, Тошкент

* * *
Кўз ёши ҳам кутмагин
севинмаган одамдан;
севги сўрма,
севгилим,
севилмаган одамдан.

Ишқ тиласанг ҳар маҳал,
ошиқ бўлиб сўрагин;
бармоқларингга маҳтал
эшик менинг юрагим.

Йўлинг тушган замони,
ёймай овозасини,
бир йўл чертиб ўт, жоним,
қалбим дарвозасини.

Фақат бир шарт:
чорласам,
кирсанг,
ҳасрат чекиш йўқ,
бу эшикдан, азизам,
кириш бордир,
чиқиш йўқ!

© Мансур Жумаев

* * *
Koʻz yoshi ham kutmagin
sevinmagan odamdan;
sevgi soʻrma,
sevgilim,
sevilmagan odamdan.

Ishq tilasang har mahal,
oshiq boʻlib soʻragin;
barmoqlaringga mahtal
eshik mening yuragim.

Yoʻling tushgan zamoni,
yoymay ovozasini,
bir yoʻl chertib oʻt, jonim,
qalbim darvozasini.

Faqat bir shart:
chorlasam,
kirsang,
hasrat chekish yoʻq,
bu eshikdan, azizam,
kirish bordir,
chiqish yoʻq!

© Mansur Jumayev

#Sheʼriy_lahza

Dunyoning sevgidek rozi yo‘q, jonim,
Yor ko‘zidek rostgo‘y qozi yo‘q, jonim.
Quyuq soya solgan og‘och osti-yu
Sening suhbatingdan sozi yo‘q, jonim.

Mansur Jumayev

Yoshlikjurnali.uz
@yoshlikjurnali

Олдинда чаман бор,
сафо бор,
хотиржам-хотиржам ҳаво бор…
азизим,
унгача озгина
сабр бор,
ситам бор,
жафо бор…

Мансур Жумаев
🎤Баҳодир Жовлиев

ФЕРГАНТРОП

Ўзбекистон археологларининг кўп йиллик қазишмалари натижасида Сўх воҳасининг шарқий қисмида жойлашган Селенғур ғорида тахминан 1,5 млн йил муқаддам яшаган қадимги одамлар ("Фергантроп") манзилгоҳи топилган.

"ishonch.uz"дан


Эй, бир ярим милён йил олдин
Селенғурда кун кечирган зот,
тойдирганми сени ҳам ҳолдан
юрагингга от қўйган ҳаёт?

Бўлганмисан сен ҳам ошино
сирларига тун, моҳитобнинг,
нозларига чидагансан ё
аллақайси фергантропнинг?

Алқаганми сени ҳам кимдир,
сен кимнидир алқаганмисан?
Севиб туриб чиндан, барибир,
севмайман деб алдаганмисан?

Далли бўлиб,
ғорликлар аро
ошиқ-маъшуқ дейилганмисан,
берганмисан сўзингга оро,
севганмисан,
севилганмисан?

Ишонгансан кимгадир, ошнам,
балки, дўстлар ташлаб ҳам кетган,
балки, шундан кўзинг бўлиб нам,
ишончингга илк бор дарз кетган?

Ачингансан,
кимгадир ёки
бергандирсан тамасиз ёрдам?
Тикка қараб алдаган чоғи
қувгандирсан кимнидир ғордан?

Қор кўчган ё сел келган пайти
қўлтиқланиб-суялганмисан?
Овдан қуруқ қўл билан қайтиб
келганингда уялганмисан?

Ёлғизоёқ сўқмоқда ёлғиз
хаёл суриб кезмаганмисан?
Инграганда ғордошинг ожиз,
сезганмисан,
сезмаганмисан?

Варақланган, эҳтимол, қалбинг,
ўқувчиси танҳо китобдай;
тоза бўлган виждонинг, балки,
уйимдаги "фергантроп"дай...

Агар шундай яшаган бўлсанг,
гарчи бугун хоксан, туробсан,
сен ёввойи эмассан, билсанг,
сен одамсан —
фергантропсан!

Ё шунчаки кун кечириб тоқ,
қувонгансан кавшаганингга,
суягинг бор музейда,
бироқ
ишонмайман яшаганингга!

Эй, бир ярим милён йил олдин
Селенғурда нафас олган зот,
тойдирганми сени ҳам ҳолдан
юрагингга ўт қўйган ҳаёт?!

2023 йил 21 март, Дўрмон

МУСОФИР ЎЗБЕКЛАР

Тириклик кимни ҳам этмаган ишғол,
Тилаган муродин айтади ҳар бош.
Ер юзи каттакон дастурхон мисол,
Сувсаган сув дейди, очиққанлар – ош.

Отини атасанг тутгувчи титроқ –
Ё набий, ё валий, ё шоҳ, ё сулув...
Ҳар қандай одамга керакдир бироқ
Бир туюр нон билан икки қултум сув.

Ҳоритиб-койитиб ширин жонини,
Тириклик бахтига банди ошиқлар,
Худо ер юзига сочган донини
Териб-тергилайди кўзи очиқлар.

Мусофир ўзбеклар,
Сиз ҳам Худонинг
Райҳонин термакка кетгансиз гарчи,
Бирингиз – Алпомиш, алпсиз, ишонинг,
Ишонинг, бирингиз, албатта, Барчин.

Мусофир ўзбеклар,
Сиз ҳам бир қучоқ
Оила ўчоғин ёққувчи тансиз.
То оёқ етгунча кетибсиз, бироқ,
Унутманг, ҳар бири битта Ватансиз!

Нондан азиз ном бор, сувдан ҳам азиз,
Шу ном залворини жойлангиз жонга.
Ўзбек бўлиб боринг, қайга борсангиз,
Ўзбек бўлиб қайтинг Ўзбекистонга.
Мансур Жумаев
17 январь 2024 йил, Тошкент

* * *
Мен ҳам интизорман, мен ҳам мунтазир,
Мен ҳам дийдорингга муштоқман ҳануз.
Мен ҳам телба эдим, аммо беназир,
Мен ҳам ошиқ эдим, ушшоқман ҳануз.

Менинг ҳам лоларух майдир ичганим,
Менга ҳам тор келди осмон учгани,
Ҳамма ошиқлардек мен ҳам бир ғани,
Ҳамма ошиқлардек қашшоқман ҳануз.

Эски бир жунунга доирман ҳамон,
Севги саҳросида сойирман ҳамон,
Суюк сўз тўкилган шоирман ҳамон,
Куюк бўз тўкилган машшоқман ҳануз.

Бир йигит умрини сипқорган ўғул,
Бир аёл сочини қорга кўмган ғул,
Бир малак тушларин зийнатлаган гул,
Бир пари пойига тушоқман ҳануз.

Жоҳиллигим аён, оқиллигим рост,
Забонимни ёқар айтилмаган роз,
Кўзинг уммонида хасман сарафроз,
Алвон дудоғингда титроқман ҳануз.

Кўклам андалибдан наво келтирди,
Кузак ҳазин тусли сафо келтирди,
Фалак руҳқушимга ҳаво келтирди...
Тупроқман... тупроқман... тупроқман ҳануз.

© Мансур ЖУМАЕВ
🎤Маҳфуза Бегалиева

* Шеърий лаҳза

НИЯТ

Онамни алдадим соппа-соғман деб,
Отамни алдадим: “Пулим бор доим”.
Оғамни алдадим: “Борарман, насиб...”
Мен сени нима деб алдай, Худойим?!

Ғунчани гул дедим – кулди, қувонди,
Булбул деб айтганим чумчуқми, билмам,
Бунда бахт бор дедим, эркам ишонди...
Роббим, энди мени ёлғончи қилма!

Мансур ЖУМАЕВ

🎤 Шоир Равшан Ҳақмурод

ШЕЪРИМ

Аё шеърим, аё шеърим,
ай, ёширин ҳаё шеърим,
бирам ширин, бирам ширин,
ширин жонимдаё шеърим.

Аё шеърим, ало шеърим,
ўзим вайрон, аъло шеърим,
ўзим куйган қувончим ҳам
ўзим суйган бало – шеърим.

Момо алёр, бобо шеърим,
пир тўзитган қабо шеърим,
ҳазрат Амир Алишербек
бобом кийган або шеърим.

Кўксимдаги сато шеърим,
рукни, ритми хато шеърим;
онам Ҳавво томон борган
отам Одам Ато – шеърим.

Кин, ғараздан жудо шеърим,
чин ва нурул-ҳудо шеърим,
«кун – ярал»дан яралган сўз –
аё қавли Худо, шеърим!

Малаклардан имо шеърим,
булбулоҳанг ҳумо шеърим,
кафтларимдан кабутардай
кўкка учган дуо – шеърим.

Ай муҳаббатсаро шеърим,
маним оқу қаро шеърим,
кетар бўлсам не ғам, сен бор –
икки олам аро, шеърим!

Мансур Жумаев

🎤Rayhona Davronova

Bu o'quv yilida QarshiDUning San'atshunoslik fakulteti Vokal san'ati (an'anaviy xonandalik) ta'lim yo'nalishi 4-bosqich talabalariga Mumtoz she'riyat asoslari fanidan darsga kiryapman.

Darslarga biroz ijodiy yondashib, talabalarga zamonaviy she'riyatimiz namunalaridan ashula tayyorlash topshirig'ini mustaqil ish sifatida bergandim. Bekjon Yo'ldoshev Mansur Jumayevning "Biz kutgan fasl" kitobidan "Yig'laydigan ko'z" she'rini kuyga solibdi.

Nazarimda, yomon chiqmagan. Siz ham Bekjonning ijrosiga baho bering (bu uning bahosiga ta'sir ko'rsatadi 😊)

KANALGA ULANISH:
👇👇👇
https://t.center/navoiyshunoslik_rasmiy

Худойназар Тангиров Мансур Жумаевнинг "Ҳазрати ишқ" китобини олиб кетиш учун кечаси бўлса ҳам келди. Улуғ ўқирманлар шундай бўлади.

26 та китоб ўз эгасини топди. Баъзилари эгалари олиб кетса бўлди.

Шошилинг, китоб унча кўп эмас. Донаси 100 000 сўм. Олмоқчи бўлсангиз, шу ердан ё шахсийга ёзинг ёки ушбу рақамга қўнғироқ қилинг: +998909967125

Эълонни улашиб қўйинг.

Фозил Фарҳод

"Chig'anoq"dan ikkinchi "DUR" ham chiqdi!
✔️Chin shoirning dini Ishq, mazhabi Ishqdir.
Chin she’rda Ishq kuylanadi.
Shoir Mansur Jumayevning “Hazrati ishq”i ayni shu azaliy va abadiy tuygʻuni tarannum etadi.
📌Oʻzbekiston Yozuvchilar uyushmasi a’zosi Mansur Jumayevning ushbu kitobi «Chigʻanoq» loyihasi doirasida «Mikrokreditbank» homiyligida “Ijod nashr” nashriyotida chop etildi.
📖 Bu kitobni oʻqib koʻnglingiz Muhabbatga toʻlishidan umidvormiz.

Murojaat uchun quyidagi raqamlarga qo'ng'iroq qilishingiz mumkin.

+998909967125
+998908681897

https://youtu.be/OtPZNuh6BME?si=c-6TWMEI0bQT3kcd

Ovozni, suhbatlarini sog‘inganlar uchun

* * *
Мен ҳам интизорман, мен ҳам мунтазир,
Мен ҳам дийдорингга муштоқман ҳануз.
Мен ҳам телба эдим, аммо беназир,
Мен ҳам ошиқ эдим, ушшоқман ҳануз.

Менинг ҳам лоларух майдир ичганим,
Менга ҳам тор келди осмон учгани,
Ҳамма ошиқлардек мен ҳам бир ғани,
Ҳамма ошиқлардек қашшоқман ҳануз.

Эски бир жунунга доирман ҳамон,
Севги саҳросида сойирман ҳамон,
Суюк сўз тўкилган шоирман ҳамон,
Куюк бўз тўкилган машшоқман ҳануз.

Бир йигит умрини сипқорган ўғул,
Бир аёл сочини қорга кўмган ғул,
Бир малак тушларин зийнатлаган гул,
Бир пари пойига тушоқман ҳануз.

Жоҳиллигим аён, оқиллигим рост,
Забонимни ёқар айтилмаган роз,
Кўзинг уммонида хасман сарафроз,
Алвон дудоғингда титроқман ҳануз.

Кўклам андалибдан наво келтирди,
Кузак ҳазин тусли сафо келтирди,
Фалак руҳқушимга ҳаво келтирди...
Тупроқман... тупроқман... тупроқман ҳануз.

© Мансур ЖУМАЕВ
🎤Муҳайё Рустам ӯқиди

ЎТМИШДАН ЭРТАКЛАР

2019 йил Австралияда ӯрмон ёнғинлари бӯлди

Болаликнинг боғлари ёнди
яшил қитъа ўрмонларидай,
лабларимга май тутди ҳаёт —
ўта аччиқ май.

Шундан бери учолмадим бот,
шундан бери кафтимдадир жон,
оёғингга ёпишдим, ҳаёт,
ўтдан қочган каоласимон.

Одамларга боқдим умидвор,
гарчи бари нораста, сабий,
ҳар сув тутган касни билдим ёр,
ташна, куюк кенгуру каби.

Эсимдадир:
апрелми ё май,
тутун мисол ўсди зоримиз,
яшил қитъа ўрмонларидай
ёниб кетди буғдойзоримиз.

Зир югурди отам тўрт томон,
оғаларим чопди ёнига:
ўт қўйганди қай бир мусулмон,
мусулмоннинг дастурхонига.

Отам сўкди,
онам йиғлади,
момом узоқ қарғади айтиб;
оғаларим қора пайкалга
бир дона дон сепмади қайтиб.

Бир болакай ўлди ичимда,
муштдек танда ўсди бир одам:
буғдойзорга қўшилиб шунда
ёнган эди болалигим ҳам.

Энди мавзу — нон-сув, ризқу рўз,
энди гўдак хаёллар абас,
энди синчков боқиб турган кўз,
бошқа эди,
олдинги эмас.

Ўша йили қишнинг бўрони
лашкар суриб келганида тик,
дориланган уруғлик донни
тегирмонда тортиб егандик.

Айтолмасман нонга навбат ҳам
тингламоқни кас-нокасини...
ўлчаб берар эди сўнг онам
"магазиннинг буханкаси"ни.

Унутмайман
ўз ҳаққин отам
итга элтиб ташлаган онни,
еб қўйгандим ахир мен нодон
Қоравойга аталган нонни.

Эсимдадир яхмалак йўллар,
ғичир-ғичир эски ароба,
калиш,
чопон,
қизарган қўллар,
темир сувдон — бўйим баробар.

Маош нима билмасдик,
шунча —
ишласа ҳам қайдадир отам;
иситмалаб йиқилмагунча
айтмас эдик дардимизни ҳам...

Кўпга келган тўйдир,
меҳмондир,
бари ўтди,
бироқ,
не қилай,
болаликнинг боғлари ёнди
яшил қитъа ўрмонларидай.

Шундан, балки, тўлишган сабот
қайғуни ҳам қаршилар тикка,
ўтиш оғир аммо,
эй ҳаёт,
тирикликдан тирикчиликка...

Димоғларни ёндирсин атр,
ёндир,
ҳаёт,
ғамнинг барини,
олов тутиб ёқиб қизартир
келинларнинг тандирларини,

бахтдан ёндир мудом кўзларни,
кўнгилларни ёқсин муҳаббат,
ўтга солиб тобла сўзларни...
болаликни ёндирма фақат!

Фақат шуни сўрайман,
ҳаёт,
тоза ҳислар ёнмасин дерман;
шам ёқажак гугуртни, ҳайҳот,
ёмонларнинг қўлига берма!

Тошкент, 2020.

© Мансур Жумаев

МЕН ҚАЙТАМАН

Мен қайтаман, кипригинг соясига қайтаман,
ирмоқларга – дунёнинг доясига қайтаман,
бошларини тошларга урган кекса бургутнинг
полапони кўз очган қоясига қайтаман.

Мен қайтаман, дилу ёд орасида қайтаман,
мен қайтаман, кўзларинг қорасида қайтаман,
бир қизчанинг кулгичли чеҳрасида порлагум,
бир жунунваш ўғилнинг оразида қайтаман.

Мен шундайин куюк дил порасида яшарман,
мен шундайин беғубор, норасида яшарман,
мен шундайин беқарор – тупроқ, ҳаво, ўт ва сув
ҳимматидан зарралаб бино бўлган башарман.

Англамайман қандайин туғилмоқда айтарим;
қулоғингга шивирлаб айтаётган байтларим
андозаси руҳимда яралгандир, эҳтимол,
раббим билан фалакда ваъдалашган пайтларим.

Мен қайтаман, кетди деб суюнма бир лаҳза ҳам,
ё қароқда жимирлаб ўйнамасин зарра нам,
ғам чекмагин, Сендаман – пок дилингда зиндаман;
шоирлар ўлиш учун туғилмайди, жонгинам!

© Мансур ЖУМАЕВ

"Men qaytaman" - Mansur Jumaev she'ri
Art direktor: Jalol Rahimov
Instagram | Youtube | Facebook | Tik tok