"گرەوی بەختی هەڵاڵە" بەناوبانگترین ڕۆمانی عەتا نەهایی، نووسەری ڕۆژهەڵاتییە. ڕۆمانەکە جگە لەوەی کە خۆی بەسەرهاتی سەرنجڕاکێشی کچێک بە ناوی "هەڵاڵە"یە لە ناخی خۆیدا هەڵگری زۆریەک لە داڵغەکانی نووسەر و کۆمەڵگاکەیەتی. مەسەلەی سەرەکیی ئەو ڕۆمانە بەختی شکەستخواردووی هەڵاڵەیە، کچێک کە لە ڕۆژهەڵاتی کوردستان و لە شاخان و لە هەندەران ئەو جۆرە ژیانە ناژی کە خۆی پێی خۆشە و هەر جارەو کەسانێک پێش بە بەدیهاتنی خەونەکانی دەگرن. ڕۆمان ڕاوێژی شەڕی نێوان حکوومەت و شۆڕشگێڕەکان لە شەستەکان و ژیانی هەڵوەشاوی خەڵک بەبۆنەی ئەو مەسەلەیە و ژیانی شۆڕشگێڕەکان دوای بەجێهێشتنی شارەکان و بڵاوبوونەوە بە سەر شاخەکاندا و دواجار پەرتەوازەبوون بۆ هەندەرانە. عەتا نەهایی لە شێوازی "بازی زەمان" کەڵک وەردەگرێ یانی دەمێک ئێستا باس دەکات و دەمێک ڕابردوو دەگێڕێتەوە. داڵغە و نیگەرانییەکانی نووسەر گەرچی نەک بە زەقی بەڵام بە وردەکارییەکی کەموێنە لە ناو ڕۆمانەکەدا ڕەنگی داوەتەوە، بۆ نموونە: پیاوسالاری، ژن بەسەرهێنان، ترس لە بوونی پەیوەندیی خۆشەویستانەی کچەکان لەگەڵ کوڕەکان، حەرام و تابۆ و ناشایست‌بوونی دەرخستنی خۆشەویستی لە لایەن کچەکان، سەرکوتی هەستی خۆشەویستی لە لایەن کچەکان، ڕەگەزی دووهەم‌بوونی ژنان، مەسەلەی شوناس (چ شوناسی نەتەوەیی چ شوناسی ڕەگەزی و چ شوناسی تاکی)، سەرلێشێواوبوونی تاکی کورد لە هەندەران و قبووڵ‌نەکردنی جیاوازییەکان و خواستی بابەکان لە سەر ئەوەوەی کە منداڵان دەبێ شوێن‌پێی بابەکان بکەون، دیتنی ژن وەک شەرەف و نامووس و ماڵ و موڵکی پیاو نەک تاکێکی سەربەخۆ و ملکەچی و بێ‌دەسەڵاتیی ژن یان خواستی ئەو مەسەلەیە لە لایەن پیاوەکان تەنانەت لە هەندەرانیش، بێ‌متمانەیی بە هەرجۆرە پەیوەندیی کۆمەڵایەتی و سەرکەوتنی ژنان و هتد. عەتا نەهایی باس لەوە دەکات کە بیرۆکە و ئاکارە وەدواکەوتووەکانی کۆمەڵگا تەنانەت لە گرووپە شۆرشگێڕەکان و لە کۆچەرەکانیشدا لەناو ناچێ و بە شێوازی جۆراوجۆر سەر هەڵدەداتەوە، هێزێکی هێندە چڕی هەیە کە تەنانەت ژنێکی بوێری وەک" هەڵاڵە"ش ناتوانێت تا سەر لە بەرامبەریاندا ڕاوەستێت. @MangPub