قناة خطباء المنبر الحسيني للقصائد

#قصائد_في_خدمة_الشعراء
#شهادة_الزّهراء (ص)
صورة شعرية: كأني بزينب صلوات الله وسلامه عليها عندما رأت نعش الزهراء صلوات الله وسلامه عليها مرفوعا على الاكتاف، تخاطب حامليه قائلة..

[طور ودّعتك وظهري انكسر / الجزع ]

١/رِحْمو يبويه الدّمعه بعيوني
خلّوني يمها اللّيله خلّوني
لو بالنّعش وَيّاها حِمْلوني
صَعُب لِوْداع!

٢/خلّوني اشِمها بس بَعَد مَرّه
وْبَس مَرّه اگلها "يُمّه يالزّهره"
معقوله افارگها وتِظَل ذكرى!
حِزنْ وْاوجاع

٣/گعدت تِحاچي أمها وِتْگلْها
بعدِك منو زينَب يِدَلِّلْها ؟!
دمعاتي لَجلِك والله ما مِلْها
وَحَگ لَاضْلاع

٤/مني يريت الموت اخذ روحي
وْلا ظَلّ اعدّن واحسِب جروحي
هاذي بدايةْ ضيعتي ونوحي
دلالي ضاع

#عظّم_الله_أجوركم

فاطمة رزق
نسألكم الدعاء

#قصائد_في_خدمة_الشعراء
#شهادة_الزّهراء (ص)

[وزن الطويل]

وسّدها الگبر حيدر .. وبگلبه جَمُر يِسعَر
وچَن بيده لِطَم صَدره .. يريد ضلوعه تتكَسّر

١/گالِلْها يَبَعد الرّوح .. ريت الْبِالْگبر آني
هسّه لو أرِدْ للدّار .. منهو اللّي يْتِلَگاني؟!
بْدونِك يالزّچيّه البيت .. يصيرَنْ بيتْ أحزاني
عيني لو إجَتْ عالباب .. مَدْري شلون أتصبَّر!

٢/حَنّتْ فاطِمة وأنّت .. وْوَسْط الگبُر صار وْنينْ
چنْها تْگِلّه كافي تْنوح .. دمْعَك مِسْحَه يا بو حسين
أدري فراگنا أصعَب .. منّ اللّطمه فوگ العين!
لكن حكمةِ المعبود .. شاءت والأمُر صَدَّر

٣/تراب الگبُر بچفوفك .. عَلَيّه يا علي هِلّه
وعْلى الألم والفَرگه .. صَبرَك كون لَتْمِلَّه
همّك والحِزِن بالرّوح .. أدري جْبال مَتْحِمْلَه
لكن هالأمُر مَكتوب .. وبسّ انْته عَلِيْهْ تِگْدَر!

٤/ودِّعني بْعَجَل وارْجَع .. وحْشه اللّيله عالأيتام
رِدْ للدّار وِبْدالي .. بْحضْنَك بنتي خلْها تْنام
ويَمّك خْلْ حسَن وحْسين .. وخفِّف عنهم الآلام
وجودَك يَمْهم وْجودي .. يبو الأيْتام يا حيدر


#عظّم_الله_أجوركم

فاطمة رزق
أسألكم الدعاء