#السلام(١٠) بنستكمل مع بعض الملامح العامة لتحقيق السلام النفس والسلام المتبادل بين الزوجين، ولا يمكن يتحقق السلام الداخلي للزوجين أو السلام المتبادل، أو السلام من المشكلات القوية إلا إذا كان خلق التغافل موجود عند الزوجين. 💫التغافل ببساطة معناه إن مش كل طرف يقف للتاني على الواحدة ويفسر كل كلمة وكل تصرف بيصدروا من الآخر بشكل بعيد عن المقصود. 🌾في حاجات كتير في الحياة ابسط من إننا نقف عندها أو نتكلم فيها أو نعمل لها حساب أصلا، والشخصية اللي بتدقق في كل تصرف وكل سلوك وكى كلمة بتصدر من شريك الحياة شخصية بتصيب العلاقة الزوجية في مقتل وبتقضي على السلام تماما؛ لإن ببساطة الطرف التاني إما هيحاول يتقي الله في حياته الزوجية ويحافظ عليها حتى لو تحمل فوق طاقته، فهيسكت لكنه من جواه هيكون تعبان ومنهك نفسيا ومتحطم تماما وربما يجي في وقت ينفجر انفجار يأكل الأخضر واليابس نتيجة للبراكين الداخلية اللي بتتكون كرد فعل للحصار اللي حاصل عليه من الطرف الآخر وبالتالي يضيع السلام الظاهري المتبادل بعد ما ضاع السلام الداخلي. ⚠️ وربما يكون الطرف ده صامت ومش بياخد أي رد فعل بسبب قلة حيلته وضعفه أمام قوة شريك الحياة وسيطرته، وده هيؤدي كذلك لانعدام الشعور بالسلام والسكينة فالعلاقة هتكون على شفا حفرة من نار للأسف.🔥 ⚠️أو إن الطرف اللي بيتعرض للشك في كل كلمة بتطلع منه شخصية ملهاش في التحمل يعنى شخصية معندهاش استعداد لتحمل سوء الظن وتبعات الشك فتقول لنفسها وانا إيه اللي يجبرني على المر والعذاب ده أصلا ؟ فإما تختار الفراق أو تختار الصدام وتبقا الحياة الزوجية في حالة حرب دائمة للأسف. 📣فياريت فعلا نخلي بالنا ونتعامل بخلق التغافل في علاقتنا بالطرف التاني ونعدي الأمور العادية عشان المركب تمشي.. بلاش تكون أو تكوني طرف في إن المركب تتحطم.. بسوء ظنكم وسوء تفسيركم لكل كلمة. ❌وافتكروا ان الشخصية سيئة الظن من اكتر الشخصيات اللي بتدمر علاقاتها باللي حواليها وبتدمر نفسية اللي حواليها للأسف. 📌من أسس تحقيق السلام النفسي بين الزوجين كذلك تطبيق حديث النبي صلى الله عليه وسلم: "لا يؤمن أحدكم حتى يحب لأخيه ما يحب لنفسه" " الحديث ده حديث عام وشامل وتندرج تحته كل المعاني والخطوات اللي بتحقق السلام النفسي في التعامل مع الآخرين. حدؤث لو تعاملنا بيه في حياتنا الزوجية حياتنا هتختلف تماما . مثال واقعي من الحياة الزوجية بيحصل مع كتير من الزوجات والأزواج الجدد👇 ممكن أكون زوجة تضايقة ان زوجي لما بيرجع من الشغل مش بيقعد معايا وبياكل وبيدخل يرتاح وينام شوية وبشعر إنه مش مهتم بيا كزوجة وببيته بوجه عام وبتوقع منه إنه لما يرجع من الشغل يقعد معايا ويُشعرني بالاهتمام فبالتالي بيظهر على ملامح وجهي الحزن والضيق. طيب لو أناحطيت نفسي مكانه وتخيلت إن أنا رجل وطول اليوم مهدود وطالع عينى في الشغل وراجع البيت عاوز استريح هحب ان زوجتي تحاوطني بشكل مبالغ فيه ولا تسيبنى استريح الأول وبعدين أقعد معاها؟ يا ترى الزوجة لو وضعت نفسها مكان الرجل هتحب لنفسها ايه وقتها؟ طيبب الزوج لو حط نفسه مكان الزوجة وقال لو انا زوجة طول النهار طالع عينى في شغل البيت وتربية الولاد وقاعدة في البيت بين اربع حيطان أكيد لما زوجي يجي هبقا نفسي انه يقعد معايا ويدردش معايا ويحسسنى بقيمتي . وقتها أنت كزوج هتحب لنفسك ايه؟ اكيد وقتها هتحب ان الطرف التاني يجي يستريح ويقعد معاك ويتكلم مش ينام وبعدين يروح على الفيس والواتس والتلفزيون وبعدين ينام وبعدين ينزل الشغل وبالتالي تبدأ المشاكل والصراعات وينعدم السلام. عشان تحققوا السلام كزوجين ياريت كل طرف يضع نفسه موضع الطرف الآخر ويحب له ما يحب لنفسه. رضا الجنيدي #اسماء_الله_الحسنى ✍ كلنا راحلون ويبقى الأثر.. فلنترك أثرا قبل الرحيل. #أسماء_الله_الحسنى 🌸تابعوا جديدنا على 🌸 🌸قناة الكاتبة رضا الجنيدي على التلجرام👇 https://t.center/redaalgeneedy 🌸صفحة الكاتبة رضا الجنيدي على الفيس👇 https://m.facebook.com/Reda.Geneedy.