#السلام (٨) 🌾كتير من علاقتنا بأقرب الناس بتتهد بسبب أسباب وهمية أو أسباب حقيقية بس متعالجتش صح 🌾كتير من علاقتنا باللي حوالينا بتكون سبب في صراعات بينا وبين نفسنا. زي تلاقي نفسك في علاقة بتسبب لك التوتر النفسي مع إن المفترض فيها إنها تسبب لك السكينة والهدوء زي علاقة بزوج أو أخت أو صديقة أو جارة، او زميلة في العمل، علاقات ايا كانت مدى قوة درجتها إلا إنها في النهاية بتصب في مصب واحد وهو إنها بتتعبك. 🌱وأوقات أحنا اللي بنكون سبب في ده للي حوالينا وبنكون مصدر التوتر ليهم تعالوا نشوف نتعامل صح ازاي في النوعين دول من العلاقات وازاي نوصل للسلام النفسي بإذن الله أثناء التعامل مع اللي حوالينا. 🌴النبي صلى الله عليه وسلم بيوصف صفة أساسية من صفات المسلم فبيقول: "المسلم من سلم المسلمون من لسانه ويده يعنى أنت كمسلم إسلامك عشان يكتمل ويكون إسلام صح لازم اللي حواليك يسلموا أثناء التعامل معاك من حاجتين من إيذاء لسانك وإيديك. 📌وده يديهم شعور بالسلام النفسي وهما عايشين معاك أو وهما بيتعاملوا معاك أو حتى وإنت بعيد عنهم لإنهم واثقين إن مش هيطولهم منك أذى وأنت بعيد. فهل أنت فعلا حققت ده؟ ✍🏻تعالوا نطبق ده كاختبار خفيف مع أقرب الناس وهما ولادنا. لما بتكون في البيت وابنك الصغير يغلط غلطة سواء كبيرة أو صغيرة ويلاقي كف إيديك نازل على وشه تحت دعوى التأديب تفتكر إنت كده حققت السلام النفسي لابنك اثناء التعامل معاه؟ تفتكر ابنك كده سلم من ايديك؟! 🍂لما طول ما أنت قاعدة في البيت عمالة تقولي لابنك يا كسلان، أو أنت مش بتفهم، أو تقوليله يا تخين، أو يارفيع، يا طويل، يا قصير، تفتكري كده حققتِ السلام النفسي لابنك، وتفتكري كده إنه سلم من لسانك؟ لما تقارن بينه وبين ابن عمه وابن خاله وابن صاحبك وابن الجيران هل حققت له السلام النفسي، وهل هو كده سلم من لسانك؟ 🍃الإمام الغزالي بيقول: "ولن يوصف بالسلام و الإسلام إلا من سلم المسلمون من لسانه ويده" 🌙طيب يا ترى ايه اللي يخلي ولادك يحسوا بالمعاناة النفسية وعدم السلام النفسي معاكِ 🍁العنف البدني ضد السلام تماما 🍁العنف اللفظي ضد السلام تماما 🌾لو اتحكمتِ في دول كويس جدا وعرفت تسيطر على نفسك وقت الغضب ووقت الاحباط ولادك هيشعروا فعلا بكل المشاعر الجميلة اللي هتحقق لهم السلام النفسي. 💫هتقولي لي مش بقدر أسيطر على نفسي، بغضب وبتعصب وبنفعل وبرجع أبكي وأحزن إني عملت كده في ولادي، وقتها هاقولك لو عرفت تحققي السلام الذاتي مع نفسك صح بالنقاط اللي اتكلمنا عنها سابقا هتقدري توصلي للسلام النفسي مع ولادك بسهولة شديدة جدا جدا. احذروا إنكم تنفجروا في ولادكم بسبب ضغوط العمل 🌱يعنى أنت لما تكون راجع من شغلك، أو من أي مكان كنت فيه ودخلت على ولادك وقلت لهم السلام عليكم 🍃يعنى أنت بتقوللهم أنتم في أمان من أي أذى يصيبكم منى قولا أو فعلا 🌾أنتم في أمان من أن أيدي تمتد عليكم بسوء، أو لساني يصيبكم بكلمة تأذيكم نفسيا. 🌾ده معنى الكلمة وأنت بتقولها .. يعنى ببساطة أنت أخدت عهد على نفسك أمام الله بده طيب طالما أنت اديت العهد ده والأمان لولادك ليه بتخلف الوعد عند أول لحظة غضب؟ 🍃هفكركم بالكلمة اللي بقولها دايما في معظم دوراتي التربوية 👇 👈🏻ولادكم مش ملك لكم تعملوا فيهم اللي أنتم عاوزينه. 🍃ولادكم ملك لله عز وجل، أمانة ربنا استودعها عندكم. 🌱 تخيلي إنك وانت بتضربي ولادك وتأذيهم عشان بتنفسي عن نفسك وعن الضغط النفسي اللي بتعاني منه من زوجك ولا حماتك ولا الضغوط المادية الضرب ده خيانة للأمانة اللي ربنا سبحانه وتعالى استودعها عندك. 📌تخيلي إن السب واللعن اللي بينزل على ولادك زي المطر هتتحاسبي عليه لإن ولادك دول نفس وروح وليهم حقوق وليهم عرض يجب أن يُصان . ❌دلوقتي مع المصيبة الكبيرة اللي بنعملها في ولادنا واللي بتهد العلاقة بينا وبينهم فعلا وهي 👈🏻الدعاء عليهم ✍🏻أنت في وقت الغضب مش عارفة تعملي ايه تروحي تدعي على ابنك ومش واخدة بالك إنها ممكن تكون ساعة استجابة والدعاء يتحقق وتفضل اثر دعوتك معاه طول عمره ويفضل ابنك فاكر بينه وبين نفسه إن اللي حصل له ده بسبب دعوتك أنت عليه. 🌾 وأيا كان غلطه هو طفل أو مراهق وأنت الأم الكبيرة الناضجة الحكيمة العاقلة اللي المفروض تستوعبه مش هو اللي يستوعبها. 🌱لما تعملي ده للأسف بتبقي نزعت السلام من العلاقة بينك وبين ابنك تماما وبيفضل طول عمره حاسس بشيء من النفور النفسي تجاهك. فرجاء تذكروا الحديث دهقال رسول الله صلى الله عليه وسلم: (لا تدعوا على أنفسكم، ولا تدعوا على أولادكم، ولا تدعوا على خدمكُم، ولا تدعوا على أموالكُم، لا تُوافقُوا من اللهِ تعالى ساعة نيْلٍ فيها عطاء فيستجيب لكم) رواه أبو داود بإسناد صحيح. رضا الجنيدي #أسماء_الله_الحسنى