#اسماء_الله_الحسنى #السلام (2) واحنا بنتكلم عن اسم الله السلام لابد ويجي على أذهاننا شخصية عظيمة وصلها السلام من الله عز وجل وهي ما زالت في الدنيا وعلى قيد الحياة. عن أبي هريرة رضي الله عنه قال أتى جبريل النبي صلى الله عليه وسلم فقال: "يا رسول الله هذه خديجة قد أتت معها إناء فيه إدام أو طعام أو شراب فإذا هي أتتك فاقرأ عليها السلام من ربها ومني وبشرها ببيت في الجنة من قصب لا صخب فيه ولا نصب." صحيح البخاري 🌾الشخصية العظيمة دي هي أمك وأمي، السيدة خديجة رضي الله عنها. يبشرها الله عز وجل ببيت في الجنة خالي من المتاعب والهموم بيت في الجنة خالي من كل ما يكدر الحياة بيت في الجنة كله راحة و هناء وسلام، مش بس البشرى بالجنة ولكن جبريل عليه السلام يبلغها السلام من الله عز وجل 🎁يا ترى قلوبنا حاسة المعنى ده ؟ معنى إن حد عايش في الدنيا ويجيله سلام مخصوص من ربنا سبحانه وتعالى؟ ياه احساس جميل جدا جدا 🌹 تعبت السيدة خديجة جدا عشان تؤدي رسالتها وتدافع عن الاسلام. ضحت بمالها وصحتها وكل ما تملك عشان دين ربنا سبحانه وتعالى. 🌹دخلت في حصار شعب إبي طالب وهي امرأة عجوز رغم إن كان لها الخيار لمكانتها إنها تظل في بيتها معززة مكرمة، ولكنها اختارت عزة الآخرة، وكرامة الآخرة. 🌹اختارت تتعب بس تكون سند للنبي صلى الله عليه وسلم ومتتركهوش لوحده في أزمة كبيرة نالت من المسلمين زي دي. ✍🏻يا ترى احنا عملنا ايه لرسالة الإسلام نستحق عليه إن ربنا يلقي علينا السلام في الدنيا أو في الآخرة ؟! بقول الكلام ده مش تقليل من شأن جهد أي حد فينا أو دوره فالله وحده أعلم ببواطن الأمور وأحوال القلوب ولكن من باب التحفيز الإيجابي. لو عاوزين نكون من أولياء الله -عز وجل- اللي بيلقي عليهم السلام في الآخرة لابد إننا ناخد قرار إننا نبذل جهد أكبر عشان دينا، ولو بإننا نكون سبب في هداية إنسان واحد بس. 🌱نخلي خدمة ديننا من أولوياتنا زي ما أولوياتنا إننا نعلم ولادنا أحسن تعليم ونشترك لهم في احسن نوادي عشان يلعبوا رياضة، و يشاركوا في أنشطة ويتعلموا مهارات مختلفة. 🌱خلي عندك هدف إنك تعرفي الناس بدينهم صح في زمن انتشرت فيه الفتن وأصبح ناس كتير كل علاقتهم بالدين خمس صلوات وطرحة بتتحط على الراس وخلاص للأسف . ✍🏻تعقيبا على سلام الله للسيدة خديجة تعالوا نشوف هي ردت على النبي صلى الله عليه وسلم إزاي السيدة خديجة قالت: "إن الله هو السلام ومنه السلام وعليك وعلى جبريل السلام يا رسول الله" 🌱السيدة خديجة امرأة كلها حكمة وفقه وعقل وعلم مقالتش وعلى الله السلام لإن الله عز وجل هو السلام ده يعلمنا أدب من آداب التعامل مع الله عز وجل، يعلمنا إننا لازم نخلي بالنا من ألفاظنا أثناء الحديث عن الله عز وجل لإن أحيانا الاقي في النت كلمات غريبة القصد منها حلو ولكنها لا تليق بالله عز وجل زي واحدة كل ما تتكلم تقول ربنا هيطبطب عليك😳 حد تاني يقول ربنا بيتكسف من عبده انه يرده لما يدعي 😱 الكلام ده خطأ ❌ لإن ربنا مش من صفاته انه يتكسف ولكن ورد أنه يستحيي والحياء غير الكسوف يا جماعة. طب ليه مش بنقول السلام على الله؟ 🌴لإن كلمة السلام من معانيها الأمان والاطمئنان، وإنك بتدعي للي بتلقي عليه السلام إنه يسلم من كل شر وسوء، وإنك بتأمنيه على نفسه من أي ضرر ممكن يصيبه منك. تخيلوا بقا طب كده ينفع نلقي السلام على الله عز وجل؟! 🌱طبعا لا يجوز ممكن حد يستنكر إن في حد ممكن يقول كده؟ ✍🏻أرد و أقولك ده حصل من بعض الصحابة لعدم علمهم بالأمر في بادئ الأمر ففي الحديث الصحيح عن ابن مسعود رضي الله عنه؛ قال: كنا إذ كنا مع رسول الله صلى الله عليه وسلم في الصلاة قلنا: السلام على الله من عباده، السلام على فلان وفلان. فقال النبي صلى الله عليه وسلم:"لا تقولوا السلام على الله؛ فإن الله هو السلام" ✍🏻 رضا الجنيدي ✍ كلنا راحلون ويبقى الأثر.. فلنترك أثرا قبل الرحيل. #أسماء_الله_الحسنى 🌸تابعوا جديدنا على 🌸 🌸قناة الكاتبة رضا الجنيدي على التلجرام👇 https://t.center/redaalgeneedy 🌸صفحة الكاتبة رضا الجنيدي على الفيس👇 https://m.facebook.com/Reda.Geneedy.